Orain arte ikusitakoarekin ia edozein funtzio marraz dezakegu. Jarraian, lana aurrezteko erabilgarria izango zaigun kontzeptu bat ikusiko dugu: funtzioen translazioak.
Askotan, funtzio bat marraztu ondoren horren antzekoa den beste bat marraztu behar dugu. Adibidez: y = 1/2 9,8 x2 erorketa-askeko gorputz baten ibilbidea aztertzen ari bagara, adieraziko dugu. Baina gorputzak 10 m-ko distantzia ibilia bazuen y = 10 + 1/2 9,8 x2 marraztu beharko dugu. Bigarren hori marrazteko prozedura berriz errepikatu beharko genuke; baina ez al dago biderik aurretik marraztu dugun funtzioa erabilita berria ere marrazteko? Bai, badago.
f(x) funtzioa A unitate bertikalki transladatzea, menpeko aldagaiari (y=f(x)-ri) A konstantea gehitzea da. Hau da, funtzioa gora ala behera mugituko da.
Beraz, y = f(x) + A funtzioa lortzen da.
A > 0 bada, f(x) funtzioa gora joango da.
A < 0 bada, f(x) funtzioa behera joango da.
f(x) funtzioa B unitate horizontalki transladatzea, aldagai askeari (x-ri) B konstantea gehitzea da. Hau da, funtzioa ezkerrera edo eskuinera mugituko da.
Beraz, y = f(x+B) funtzioa lortzen da.
B > 0 bada, f(x) funtzioa ezkerrera mugituko da (ezker-translazio bezala ezagutua).
B < 0 bada, f(x) funtzioa eskuinera mugituko da (eskuin-translazio bezala ezagutua).
f(x) funtzioa A unitate horizontalki eta B unitate bertikalki transladatzea, aldagai askeari (x-ri) A konstantea gehitzea eta menpeko aldagaiari (y-ri) B gehitzea da. Hau da, funtzioa ezkerrera edo eskuinera mugituko da.
Beraz, y = f(x+A)+B funtzioa lortzen da. Hau da, (x,y) puntua (x-A,y+B) puntua izatera pasa da. Azken finean, translazio zeiharrak translazio horizontal eta bertikalen konbinazio bat besterik ez dira, eta beraz, aurreko propietateak betetzen dira.