UM GLÆTUNA

Ég er kennari sem hef í námi mínu og störfum lagt sérstaka áherslu á að nýta heimspekilega samræðu til kennslu í gagnrýninni og skapandi hugsun. Ég trúi því að samræða nemenda, það er skipulagt og gagnrýnið samtal í nemendahópum, sé grundvallar kennsluaðferð sem ætti að vera áberandi í öllum skólastofum. Samræða er valdeflandi og hún er mikilvæg til að efla læsi nemenda, byggja upp sjálfsmynd og félagsfærni. Í samræðu þjálfa nemendur skapandi og gagnrýna hugsun auk þess að efla hæfni sína í lýðræðislegum vinnubrögðum.

Öll störf mín hafa tengst menntun. Ég hóf kennsluferilinn 1996 í Síðuskóla á Akureyri, kenndi í nokkur ár í Garðaskóla í Garðabæ og var þar skólastjórnandi í um 15 ár. Í þrjú ár tók ég þátt í að móta starf á unglingastigi Stapaskóla í Innri-Njarðvík þar sem ég kenndi íslensku, lífsleikni og fleira í samþættu starfi. Ég hef alla tíð unnið með unglingum og hef sérstakan áhuga á því þroskaskeiði. Samhliða störfum í grunnskólum hef ég verið stundakennari við nokkrar kennaradeildir á Íslandi: Menntavísindasviðs, Listaháskólans og Háskólans á Akureyri. Nú starfa ég sem sérfræðingur í málefnum aðalnámskrár hjá Miðstöð menntunar og skólaþjónustu.