વિરાટ દર્શન
અધ્યાય ૧૧ મો
અર્જુન બોલ્યા :
મારા અનુગ્રહાર્થે જે તમે અધ્યાત્મજ્ઞાનનું;
પરમ ગૂઢ કહ્યું તેથી મારો એ મોહ છે ગયો. ૧/૧૧
ભૂતોના જન્મ ને નાશ મેં સવિસ્તાર સાંભળ્યા;
તેમ અક્ષય મહાત્મ્ય તમારા મુખથી, પ્રભુ! ૨/૧૧
નિજને વર્ણવો જેમ, તેવું જ પરમેશ્વર !
ઈશ્વરીરૂપ જોવાને ઈચ્છું છુ, પુરુષોત્તમ ! ૩/૧૧
મારે એ રૂપને જોવું શક્ય જો માનતા, પ્રભુ !
તો, યોગેશ્વર દેખાડો નિજ અવ્યય રૂપ એ. ૪/૧૧
શ્રી ભગવાન બોલ્યા :
જો તું મારા બધા રૂપો સેંકડો ને હજારથી;
બહુ પ્રકારના દિવ્ય ઘણા આકાર-વર્ણના. ૫/૧૧
આદિત્યો, વસુઓ રુદ્રો અશ્વીનો મરુતોય જો;
પૂર્વે ક્યારે ના દીઠેલા એવા આશ્ચર્ય જો ઘણા. ૬/૧૧
જો મારા દેહમાં આજે એકસાથ અહી રહ્યું ;
ચરાચર જગત આખું; ઈચ્છે જે અન્ય તેય જો. ૭/૧૧
મ'ને તારા જ આ નેત્રે નહિ જોઈ શકીશ તું;
દિવ્ય દ્રષ્ટિ તને આપું, ઈશ્વરી યોગ જો મુજ. ૮/૧૧
સંજય બોલ્યા:
આમ બોલી પછી કૃષ્ણ મહાયોગેશ્વરે, નૃપ !
ઈશ્વરીય પરમ્ રૂપ દેખાડ્યું પાર્થને નિજ. ૯/૧૧
ઘણા મોઢા ઘણી આંખો ઘણા અદ્ભુત રૂપમાં;
ઘણા આભૂષણો દિવ્ય, ઘણાયે દિવ્ય આયુધો. ૧૦/૧૧
માળા વસ્ત્ર ધર્યા દિવ્ય અર્ચાઓ દિવ્ય ગંધની;
સર્વ આશ્ચર્યથી પૂર્ણ વિશ્વ વ્યાપક દેવ એ. ૧૧/૧૧
આકાશે સામટી દીપે હજારો સૂર્યની પ્રભા;
તે કદી એ મહાત્માના તેજસી થાય તો ભલે. ૧૨/૧૧
અનંત ભાતનું વિશ્વ આખું'ય એક ભાગમાં;
દેવાધી દેવના દેહે અર્જુને જોયું એ સમે. ૧૩/૧૧
પછી અર્જુન આશ્ચર્યે હર્ષ રોમાંચ ગાત્રથી;
દેવને હાથ જોડીને નમાવી શિર ને વદ્યો. ૧૪/૧૧
અર્જુન બોલ્યા :
હે દેવ ! દેખું તમ દેહમાં સૌ
દેવો તથા ભૂત સમૂહ નાના;
બ્રહ્મા વિરાજે કમલાસને આ
ને દિવ્ય સર્પો રુશીયોએ સર્વે.
૧૫/૧૧
અનેક નેત્રો, મુખ, હાથ, પેટો,
અનંત રૂપો તમ સર્વ બાજુ;
દેખું નહિ અંત ન મધ્ય આદિ,
તમારું વિશ્વેશ્વર, વિશ્વરૂપ !
૧૬/૧૧
ધારી ગાદા ચક્ર કીરીટદીપો,
બધી દિશે તેજ તણા સમુહે
તપાવતા સુરજ અગ્નિ જ્યોતિ;
જોવા તમે શક્ય ન અપ્રમેય !
૧૭/૧૧
તમે પરમ અક્ષર ને'ય તત્વ
તમે મહા આશ્ચર્ય વિશ્વનું આ
અનાશ છો સાશ્વત ધર્મપાળ
જાણું તમે સત્ય અનાદી દેવ.
૧૮/૧૧
અનાદી મધ્યાંત, અનંત શક્તિ,
અનંત હાથો શશી સૂર્ય નેત્ર
પેખું તમારે મુખ અગ્નિ બાળો
તમે સ્વ તેજે જગ આ તપાવો.
૧૯/૧૧
આ વ્યોમ પૃથ્વી તણો અંતરાળ
દિશા'ય સૌ એક તમે જ વ્યાપ્યા;
તમારું આ અત્યંત ઉગ્ર રૂપ
દેખી ત્રિલોકી અકળાય દેવ !
૨૦/૧૧
આ દેવસંઘો તમ માહ્ય પેસે,
કો હાથ જોડી વિનવે ભયેથી
સ્વસ્તિ બની સિદ્ધ મહર્ષિ સંઘો
અનેક સ્તોત્રે તમને સ્તવેે છે.
૨૧/૧૧
આદિત્યો રુદ્રો વસુ વિશ્વ્દેવો
સાધ્યો કુમારો મારુતો'ય પીત્રી
ગાંધર્વો યક્ષો અસુરોય સિદ્ધો;
આશ્ચર્યથી સૌ તમને નિહાળે.
૨૨/૧૧
મો નેત્ર ઝાઝા વિકરાળ દાઢો
હાથો પગોને ઉદરો'ય ઝાઝા;
વિરાટ આ રૂપ તમારું ભાળી
પામે વ્યથા લોક બધા અને હું
૨૩/૧૧
વ્યોમે અડેલા બહુ રંગ વાળા
ખુલ્લા મુખો દીપ્ત વિશાળ ડોળા
તેજે ભરેલા તમને નિહાળી;
મુંઝાવું ને ધીરજ શાંતિ ખોઉં.
૨૪/૧૧
જોતા જ સર્વે પ્રલયાગ્ની જેવા
મુખો તમારા વિકરાળ દાઢો,
દિશા ના સુઝે નહિ શાંતિ લાગે;
પ્રસન્ન થાઓ જગના નિવાસ !
૨૫/૧૧
વળી બધા આ ધૃતરાષ્ટ્રપુત્રો
ભૂપો તણા સર્વ સમૂહ સાથે
આ ભીષ્મ આ દ્રોણ જ સૂત કર્ણ
સાથે અમારાય મહાન યોદ્ધા,
૨૬/૧૧
પેસે ત્વારાથી મુખમાં તમારી
બિહામણી ને વિકરાળ દાઢે;
દાંતો તણા અંતરમાંહ્ય કોઈ
ચોંટ્યા દીસે ચૂર્ણ બનેલ માથે.
૨૭/૧૧
નદી તણા જેમ જળપ્રવાહો
વેગે સમુદ્રો પ્રતિ દોટ મૂકે,
ઝાલો ભર્યા તેમ મુખે તમારા
દોડે બધા આ નરલોક વીરો
૨૮/૧૧
જ્વાળા વિષે જેમ પતંગ પેસે
વિનાશ કાજે અતિવેગ સાથે
લોકો તમારા મુખમાંહ્ય તેમ
નાશાર્થ પેસે અતિવેગ સાથે.
૨૯/૧૧
ગ્રસી બધેથી બળતા મુખોમાં
જીભો વડે લોક સમગ્ર ચાટો;
પ્રભો ! તપાવે કિરણો તમારા
ભરી ત્રિલોકી અતિ ઉગ્ર તેજે
૩૦/૧૧
છો કોણ બોલો વિકરાળ રૂપી?
નમું તમોને પરમેષ ! રીઝો,
પીછાણવા ઈચ્છું નિજ આદિદેવ !
પ્રવૃત્તિ જાણી શકું નાં તમારી.
૩૧/૧૧
શ્રી ભગવાન બોલ્યા :
છું કાળ ઊઠ્યો જગનાશકારી
સંહારવા લોક અહી પ્રવર્ત્યો;
તારા વિના'યે બચશે ન કોઈ,
જે આ ખડા સૈનિક સામસામાં.
૩૨/૧૧
તેથી ખડોથા યશ મેળવીલે
વેરી હણી ભોગવ રાજ્ય રિદ્ધિ
પૂર્વે જ છે મેં જ હણેલ એને
નિમિત્ત થા માત્ર તું, સ્વસાચી !
૩૩/૧૧
શું ભીષ્મ કે દ્રોણ, જયદ્રથે'ય,
કે કર્ણ યા અન્ય મહાન યોદ્ધા
મેં છે હણ્યા માર તું છોડ શોક
તું ઝૂઝ જીતીશ રણે સ્વશત્રુ.
૩૪/૧૧
સંજય બોલ્યા :
આ સાંભળી કેશવ કેરું વેણ
બે હાથ જોડી થથરે કીરિટી;
ફરી કરી વંદન કૃષ્ણને એ
નમી ડરી ગદગદ દ કંઠ બોલ :
૩૫/૧૧
અર્જુન બોલ્યા :
છે યોગ્ય એ કીર્તનથી તમારા
આનંદ ને પ્રેમ લહે જગત સૌ
નાસે બળ્યે રાક્ષસ સૌ દિશામાં
સર્વે નામે સિદ્ધ તણા સમૂહો.
૩૬/૧૧
ન કાં નમે સૌ તમને, પરાત્મન ?
બ્રહ્મા તું યે ગુરુ ! આદિકર્તા
અનંત દેવેશ ! જગન્નીવાસ !
સત અસત્ ને પર, અક્ષરાત્મન
૩૭/૧૧
પુરાણ છો પુરુષ આદિદેવ !
તમે જ આ વિશ્વનું અન્ત્યધામ;
જ્ઞાતા તમે, જ્ઞેય પરં પદે છો,
તમે ભર્યું વિશ્વ, અનંતરૂપ !
૩૮/૧૧
તમે શશી, વા, વરુણાગ્નિ , ધર્મ,
પ્રજાપતિ, બ્રહ્મપીતા તમે જ
મારા હજારો નમનો તમોને,
નમો નમસ્તે'ય નમો નમસ્તે.
૩૯/૧૧
સામે નમું છુ, નમું છું'ય પીઠે,
સૌ પાસ વંદુ, પ્રભુ ! સર્વરૂપ !
અપાર છે વીર્ય, અમાપ શક્તિ,
સર્વે બનાવો, સર્વ નીજે સમાવી
૪૦/૧
સખા ગણી વેણ અયોગ્ય બોલ્યો,
હે કૃષ્ણ, હે યાદવ, હે સખા' શા;
ના જાણતા આ મહિમા તમારો,
પ્રમાદથી કે અતિપ્રેમથી'યે.
૪૧/૧૧
બેઠા, ફર્યા સાથ, જમ્યાય, સૂતા
એકાંતમાં કે સઘળા સમક્ષ,
હાંસી કરી ત્યાં મરજાદ લોપી
ક્ષમા કરો એ સહુ, અપ્રમેય !
૪૨/૧૧
તમે પિતા સ્થાવર જન્ગમોના,
તમે જ સૌના ગુરુરાજ પૂજ્ય;
ત્રિલોકમાંય તમ તુલ્ય કોણ?,
ક્યાંથી જ મોટો ? અનુપ પ્રભાવી !
૪૩/૧૧
માટે હું સાષ્ટાંગ કરું પ્રણામ,
પ્રસન્ન થાઓ, સ્તવનીય ઇશ !
સાંખે પિતા પુત્ર, સખા સખાને,
પ્રિય પ્રિય તેમ મને'ય સાંખો.
૪૪/૧૧
હર્શું હું દેખી અણદીઠ રૂપ,
છતાં ભયે વ્યાકુળ ચિત્ત મારું;
મને બતાવો, પ્રભુ, મૂળરૂપ,
પ્રસન્ન થાઓ, જગના નિવાસ !
૪૫/૧૧
કરે ગદા-ચક્ર, કિરીટ માથે
એવા જ ઈચ્છું તમને હું જોવા;
ચતુર્ભૂજી રૂપ ધરો ફરી એ,
સહસ્ત્રબાહો ! પ્રભુ ! વિશ્વરૂપ !
૪૬/૧૧
શ્રી ભગવાન બોલ્યા :
રાજી થઇને મુજ યોગ દ્વારા
દેખાડ્યું આ રૂપ પરં તને મેં;
અનંત તેજોમય આદિ વિશ્વ,
પૂર્વે ના તારા વિણ દીઠું કોયે.
૪૭/૧૧
ન વેદ-પાઠે, નહિ યજ્ઞ-દાને,
ન કર્મકાંડે, ના તાપે ઉગ્ર,
મનુષ્યલોકે મુજ રૂપ આવું
તારા વિના કોઈ શકે નિહાળી
૪૮/૧૧
મુઝા નહિ, માં ધર મૂઢભાવ
આવું નિહાળી મુજ ઘોર રૂપ,
નિવાર તારો ભય, થા પ્રસન્ન,
લે એ જ આ રૂપ તું પેખ મારું.
૪૯/૧૧
સંજય બોલ્યા :
આવું કહી અર્જુનને, ફરીથી
સ્વરૂપ દાખવ્યું વાસુદેવે;
ફરી ધરી સૌમ્ય શરીર દેવે
દીઠો દિલાસો ભયભીતને એ.
૫૦/૧૧
અર્જુન બોલ્યા :
તમારું માનવી રૂપ સૌમ્ય આ જોઈને હવે
ચેતના, સ્વસ્થતા પામ્યો, નિજ ભાવે થયો સ્થિર. ૫૧/૧૧
શ્રી ભગવાન બોલ્યા :
અતિ દુર્લભ આ મારા રૂપને તે નિહાળું જે
દેવો'ય વાંછતા નિત્ય તે સ્વરૂપનું દર્શન. ૫૨/૧૧
ના વેદોથી, ના યજ્ઞોથી, નહિ દાને, તાપે નહિ,
શક્ય આ દર્શન મારું, જેવું આજે તને થયું. ૫૩/૧૧
અનન્ય ભક્તિએ તો'યે આવી રીતે હું શક્ય છું
તત્ત્વથી જાણવો, જોવો, પ્રવેશે મુજમાં થવો. ૫૪/૧૧
મારે અર્થે કરે કર્મ, મત્પરાયણ ભક્ત જે,
દ્વેશહીન, અનાસક્ત, તે આવી મુજને મળે. ૫૫/૧૧
શ્રીકૃષ્ણાર્જુન વચ્ચેના સંવાદનો ’વિરાટ દર્શન' નામનો અગિયાર મો અધ્યાય સંપૂર્ણ