Ordenagailuen Erabilera Gomendioak

A.- ETXEAN ORDENAGAILUAREN ERABILERA AHOLKUAK FAMILIENTZAT

Gaur eguneko teknologiek onura ugari dakartzate gure eguneroko bizitzan, eta zer esanik ez hezkuntza jardueretan, baina gehiegizko erabilerak ondorio oso kaltegarriak ekar ditzakete. Beraz, teknologia digitalekin bizitzen ikasi behar dugu, ekartzen dizkiguten onurak aprobetxatuz, baina neurriz erabilita, gizakion bizitza errealeko esparru gehienak pantailetatik kanpo bai daude.

Ikastetxeak ordenagailua ikasketa tresna moduan erabiltzea finkatu du, baina gailu hau horixe izan behar du, eskolako tresna bat, eta nagusiki horretarako erabiltzea komeni da. 

Ikasleak, autonomoki, modu arduratsuan eta egokian erabiltzen badu bere gailua ez dago esku-hartzerik egin beharrik, baina familian antzematen bada ikasleak erabilera desegokia edo gehiegizkoa egiten duela, neurriak hartzea komeni da.

Gailu honen gehiegizko erabilera saihesteko honako gomendio hauek eman nahi dizkiegu familiei: 

1. Seme-alabekin dugun edozein arazo edo desadostasunetan bezala, hitz eginez akordioetara iristea izango da biderik egoki eta eraginkorrena.

2. Ikasleak eskolaz kanpo duen denboraren planifikazio egiteko, asteko ordutegi bat eratzea ezinbestekoa izango da. Asteko ordutegian kontuan izatekoak:

   1. Asteko ordutegi hau eratzeko guraso eta seme-alaben artean adostasun batera iristea da egokiena, baina, iritzien hurbilketa bat egin ondoren adostasun batera ez bada iristen gurasoak dute azken hitza, ikasleak adin-txikikoak baitira.

   2. Finkatu den egutegia bete den aztertzeko, astero familian denbora bat eskaini beharko da (egutegian kontuan izango da denbora hori, ordu erdi adibidez) egutegia bete den edo ez, eta zergatiak, baloratzeko.

   3. Ikastetxeko eginbeharrak burutzeko ikasleek ordenagailua behar dute, baina erabilera denbora hau mugatua izan behar du. Lanak egiteko ikasle bakoitzak denbora ezberdina beharko du, horregatik, guk ematen ditugun erreferentziak malgutasunez erabiltzea komeni da. Beraz, egunerokotasunean, azterketa garaia ez denean, ikasleek gehienez gailuarekin 2 ordu  DBHn eta 3 ordu Batxilergoan egotea nahikoa dela kalkulatzen dugu. 

   4. Azterketa garaian denbora gehiago eskaintzea beharko dute. Gogoratu, GELAKO EGUTEGIAn ikasleek azterketak noiz dituzten zehaztuta datorrela.

   5. Ikasleak bere aisialdian ordenagailua erabili nahi badu, gurasoekin denbora-tarte batzuk adostea komeni da (adibidez, egunean ordu bat). Aisialdirako ordenagailua erabiltzeko ere gune komunetan izatea egokia da.

   6. Ikasleak kirol jarduerak edota kultur jarduera osagarriak (pantailarik gabeko jarduerak) egitea astean zehar oso komenigarria da.

   7. Garrantzitsua da lagunarteko harreman pertsonala mantentzea, beraz, ikaslearen asteko planifikazioan lagunekin gelditzeko tarte bat zehaztea premiazko da.

   8. Ordutegian, familian elkarrekin egoteko denbora ere sartzea egokia litzateke (jatorduak edo elkarrekin egiteko jarduerak adibidez).

   9. Kontuan izan, adin horretako ikasle batek 8 orduko loaldia egitea ezinbestekoa dela.

Oporraldietan gailurik erabili gabe egoteko egunak, edo egun bat, izatea komeni da; horrela, pantailatik kanpo dagoen bizitzaz disfrutatzen ikasteko.