Mae'r adnodd hwn yn dangos sut mae'r sgiliau sydd eu hangen i gyrraedd safon uchel yn cael eu datblygu'n raddol o gam un hyd at gam cynnydd pump. Defnyddiwch hyn wrth gynllunio gweithgareddau i sicrhau bod cynnydd mewn sgiliau a her briodol yn ganolog i unrhyw dasg.

🤖 Meddwl cyfrifiadurol & rhaglennu (Codio)

Meddwl cyfrifiadurol yw ffordd o ddylunio datrysiadau i broblemau. Mae’n ffordd o rannu problemau cymhleth yn ddarnau llai sy’n hylaw, adnabod patrymau a chreu modelau i ddeall a datrys problemau. Mae meddwl cyfrifiadurol yn sgil meddwl a fydd yn helpu pobl i ddatrys problemau yn fwy effeithlon.

Rhaglennu, neu godio, yw’r broses o roi cyfarwyddiadau i gyfrifiadur gan ddefnyddio iaith raglennu benodol fel y gall berfformio tasg benodol neu ddatrys problem. Meddyliwch amdano fel rhoi set o gyfarwyddiadau i robot, fel y gall wneud rhywbeth yr ydych chi eisiau. Fel rhoi rysáit i gogydd er mwyn iddo allu coginio pryd yr ydych chi am ei fwyta.

⭐ ANNIBYNIAETH

Mae hybu annibyniaeth yn allweddol i ddysgu effeithiol o ran meddwl cyfrifiadol a rhaglennu.

⭐ CAMGYMERIADAU!

Mae pob rhaglennydd da yn gwneud camgymeriadau felly mae'n bwysig caniatáu i hyn ddigwydd fel bod disgyblion yn dysgu sut i ddatrys problemau.

⭐ PROTOTEIP!

Let pupils turn concepts into reality by prototyping. This prototype will not often look like the finished product but will allow them to test their ideas.

⭐ AMRYWIAETH!

Bydd rhaglennu mewn gwahanol amgylcheddau yn galluogi disgyblion i ehangu eu sgiliau a'u syniadau.

⭐ LLAFAREDD!

Anogwch y disgyblion i egluro eu côd ac i drafod pwrpas y gwahanol gydrannau a ddefnyddiwyd. Bydd hyn yn dyfnhau eu dysgu.

Awgrymiadau 🔎

Scratch

Scratch Jr

j2code

Beebot / Bluebot

Rugged Robot

Oti / Loti Bot

mTiny

Micro:bit

Lego Spike

Sphero / Sphero Indi

DJI Tello

Makey Makey

Arduino

Barefoot Computing

Minecraft Education

Edison

VEX

Raspberry Pi

Dyma rai apiau, meddalwedd a chaledwedd y gallwch eu defnyddio i ddatblygu sgiliau meddwl cyfrifiadurol a rhaglennu. Detholiad bach yw'r rhain - mae LLAWER mwy ar gael. Mae'n hanfodol eich bod yn dewis yr apiau a meddalwedd syn addas i'r dysgwyr a bod pob dysgwr yn profi ystod or cymwysiadau hyn wrth iddynt gymhwyso a datblygu eu sgiliau digidol.

CC1 - Rhoi a dilyn cyfarwyddiadau

Sut mae da yn edrych?

Mae meddwl cyfrifiadurol a sgiliau rhaglennu da yn yr oedran hwn yn cynnwys y gallu i roi cyfarwyddiadau syml, deall dilyniannau sylfaenol, datrys problemau syml a gallu rheoli teganau robot syml. Bydd llawer o’r tasgau yn weithgareddau heb fod o flaen cyfrifiadur ac yn edrych ar gynnal tasgau syml pob dydd yn y drefn gywir a gwrando a rhoi cyfarwyddiadau. Er hynny, mae’n bwysig cael disgwyliadau realistig oherwydd efallai bydd angen arweiniad a chymorth ar ddisgyblion yr oed yma er mwyn llawn ddeall a rhoi’r sgiliau hyn ar waith.

Beth am...

Offeryn cerdd, gall disgyblion ddefnyddio blociau sy’n cynrychioli gwahanol offerynnau/nodau a’u trefnu mewn cyfres i greu alaw. Gallant hefyd ddefnyddio blociau i newid y sain drwy gynrychioli gwahanol offerynnau neu ychwanegu amrywiaeth gan ddefnyddio blociau ar gyfer tempo, sŵn neu effeithiau.

Creu stori: gall disgyblion ddefnyddio’r Bee-Bot neu mTiny i greu stori syml drwy ei raglennu i symud i wahanol leoliadau ar fat.

⭐ Sgiliau ⭐

Adnabod a dilyn cyfarwyddiadau

Gall disgyblion ddysgu sgiliau dilyniannu sylfaenol drwy ddilyn cyfarwyddiadau ar gyfer bywyd pob dydd fel gwisgo dillad, brwsio dannedd neu wneud y gwely.

Adnabod gwallau syml

Dylai disgyblion gychwyn adnabod pan nad yw camau yn y drefn gywir, a deall y dylid dilyn y cyfarwyddiadau mewn trefn benodol.

Rhoi cyfarwyddiadau i eraill

Gall disgyblion ddilyn rysáit a rhoi cyfarwyddiadau i gyd-ddisgybl neu oedolyn ar sut i wneud pryd syml fel crempog neu frechdan.

Arbrofi

Arbrofi ag ystod o dechnoleg gyfrifiadurol yn y byd o fy nghwmpas.

Rheoli dyfeisiadau

Gall disgyblion reoli teganau robot syml sydd â symudiadau wedi’u cyn-raglennu neu swyddogaeth codio syml e.e. Beebot.

CC2 - Deall a defnyddio egwyddorion sylfaenol

Sut mae da yn edrych?

Dylai fod gan ddisgybl sydd â meddwl cyfrifiadurol a sgiliau rhaglennu da ddealltwriaeth sylfaenol o gysyniadau codio, fel dilyniannu, dolenni, a gwneud penderfyniadau. Dylent allu defnyddio adnoddau codio, fel llwyfannau codio yn seiliedig ar flociau, i greu rhaglenni syml. Dylent allu defnyddio’u creadigedd i feddwl am raglenni newydd a defnyddio sgiliau datrys problemau i ddadfygio a datrys problemau. Dylent hefyd allu cydweithio ag eraill i greu rhaglenni a deall pwysigrwydd cyfathrebu a chydweithredu.

Beth am...

Defnyddio robot fel mTiny i greu algorithm ar gyfer symud y robot o bwynt A i bwynt B (Neu i fynd â'r person anafedig i'r ysbyty). Gallant ddefnyddio dolenni syml a chrynhoi'r cod a anfonir at y ddyfais, gan ei wneud mor gryno â phosibl. Gellid gwneud tasgau tebyg gan ddefnyddio rhaglen fel j2code neu scratch ar sgrîn.

Rhaglennu robot: Gallai disgyblion ddefnyddio llwyfan codio bloc i raglennu robot syml, fel Lego Prime Essential. Gallen nhw ddefnyddio dolenni a dilyniannau o gyfarwyddiadau i wneud i’r robot symud mewn patrymau a chyfeiriadau gwahanol, ac i berfformio gweithredoedd syml h.y. goleuadau ymlaen / goleuadau i ffwrdd.

⭐ Sgiliau ⭐

Datrys Problemau

Rhannu neu ddadelfennu problem drwy ddeall cydrannau problem e.e. gellid rhoi set o flociau Lego i ddisgyblion a gofyn iddynt adeilad strwythur penodol. Byddai angen iddynt rannu’r broblem yn llai drwy ddeall cydrannau’r strwythur a sut maent yn ffitio efo’i gilydd.

Effeithio ar y canlyniad

Gallent newid y cod i wneud i robot symud yn gyflymach neu’n arafach, gwneud troadau gwahanol, neu newid y cyflymder.

Dadfygio

Rhoi cynnig ar wahanol ddatrysiadau i drwsio gwall, fel newid y cod neu ail-drefnu’r blociau.

Dolenni

Mae disgyblion yn dechrau egluro sut y gellir defnyddio dolenni i ailadrodd rhai darnau mewn dilyniannau, a sut gallai hyn fod yn ddefnyddiol.

Creu cyfarwyddiadau

Defnyddio llwyfan codio, fel blockly, i raglennu robot syml, fel Blue-Bot. Byddai angen iddynt greu cyfarwyddiadau, neu god, i reoli symudiad y robot, y cyflymder a’r cyfeiriad.

CC3 - Cymhlethdod cynyddol

Sut mae da yn edrych?

Dylai fod gan ddisgyblion dealltwriaeth dda o gysyniadau codio fel dolenni, datganiadau amodol, newidynnau a gweithrediadau. Dylai disgyblion allu defnyddio synwyryddion ac ysgogwyr yn rhan o’u halgorithmau a gallu datrys problemau. Dylent allu defnyddio adnoddau codio mwy cymhleth, fel ieithoedd codio yn seiliedig ar destun i greu rhaglenni uwch. Dylent allu meddwl yn greadigol, datrys problemau a gweithio ar y cyd.

Beth am...

Creu rhaglen sy’n gwneud i long ofod rithiol ar y blaned Mawrth symud o gwmpas rhwystrau heb gyffwrdd â nhw gan ddefnyddio llwyfan codio weledol gan ddefnyddio blociau. Defnyddio blociau i greu dilyniant o orchmynion fel symud ymlaen, troi i’r chwith neu’r dde a stopio. Defnyddio synwyryddion pellter neu synwyryddion isgoch i ganfod rhwystrau. Profi’r rhaglen a gwneud addasiadau fel y bo angen.

Defnyddio Scratch i greu gêm ble mae’n rhaid i’r chwaraewr ddal gwrthrychau sy’n disgyn ac ennill pwyntiau. Creu cefndir a chymeriad, gwneud i’r cymeriad symud gyda’r botymau saethau, creu gwrthrychau sy’n disgyn, defnyddio dull canfod gwrthdrawiad i gynyddu’r sgôr, creu system sgorio, a gwahanol lefelau o anhawster ac effeithiau sain. Profi ac addasu’r gêm fel y bo angen.

⭐ Sgiliau ⭐

Datganiadau amodol

Gall disgyblion greu datganiadau amodol gyda mwy o gywirdeb fel bod rhaglen neu ddyfais yn gallu ymateb os bodlonir amodau neilltuol h.y. bydd y robot yn symud ymlaen OND os oes rhwystr o flaen y robot bydd yn ymateb mewn ffordd neilltuol fel troi am nifer o eiliadau i osgoi’r rhwystr.

Egluro a dadfygio algorithmau

Newidynnau

Newidyn yw gwerth all newid. Dylai’r disgyblion allu adnabod pan fo angen defnyddio newidyn, gosod y man cychwyn a chreu’r rheolau a fydd yn effeithio ar y gwerth h.y. mae’r sgôr yn dechrau fel 0 a phan gaiff pwynt ei sgorio, cynyddu’r gwerth fesul 1.

Patrymau ailadrodd a lwps

Gall disgyblion ddefnyddio dolenni yn gywir i greu dilyniannau mwy effeithlon.

Synhwyryddion ac allbynnau

Dylai disgyblion allu cyfuno yn briodol synwyryddion ac ysgogwyr i ganiatáu i ddyfais ymateb i’w amgylchedd fel golau sy’n goleuo pan fydd hi’n tywyllu neu robot sy’n osgoi rhwystrau.

Elfennau dylunio

Dylai disgyblion allu adnabod elfennau dylunio sy’n effeithio ar y ffordd y mae defnyddiwr yn rhyngweithio â rhaglen, fel llywio syml, cyfarwyddiadau clir, a rheolyddion greddfol h.y. sut allai fy nyfais weithio yn well gyda dau synhwyrydd pellter uwchsonig yn hytrach nag un? Beth petaen ni’n newid ongl y synhwyrydd?

CC4 - Cysyniadau cymhleth

Sut mae da yn edrych?

Dylai disgyblion allu defnyddio cysyniadau codio effeithlon i raglennu gwahanol gymwysiadau. Er enghraifft, dylai disgyblion wybod sut y gellir defnyddio dolenni rheoli nifer (Dolenni FOR) a rheoli amod (Dolenni WHILE). Ar y lefel hon, dylai disgyblion allu cael mewnbwn defnyddwyr i greu rhaglenni. Dylai’r disgyblion ddechrau ystyried egwyddorion cod glân, er enghraifft, tynnu darnau nas defnyddir a defnyddio dynodwyr hunanddogfennu. Dylai disgyblion allu profi eu halgorithmau i ddadfygio gwallau ac er mwyn effeithlonrwydd. Dylai disgyblion ddeall y gwahanol fathau o ddata a ddefnyddir mewn rhaglennu. Dylai disgyblion allu ddogfennu eu halgorithmau gan ddefnyddio siartiau llif neu ffug-god. Dylai disgyblion gymhwyso dadelfeniad, haniaeth, adnabod patrwm a meddwl algorithmig i ddatblygu rhaglenni sydd wedi’u cynllunio’n dda.

Beth am...

Defnyddio rhaglen fel EduBlocks i wneud siapiau geometrig. Holi defnyddiwr i ofyn faint o ochrau y maent eisiau i’w siâp fod, gan ddefnyddio math data cyfanrif. Cymhwyso’r fformiwla 360 / ochrau i gyfrifo’r ongl a storio hyn fel newidyn. Defnyddio dolen cyfrif nifer i luniadu’r siâp. Profi’r rhaglen gyda data allbwn gwahanol.

Defnyddio Micro:Bit i greu rhaglen sy’n mesur tymheredd, goleuni neu symudiad. Defnyddio’r gwahanol fotymau fel mewnbwn defnyddiwr, gweithredu detholiad i allbynnu gwahanol sylwadau yn seiliedig ar y data a fesurir. Defnyddio dolen i ailadrodd y cod pob ychydig eiliadau i fesur y gwahaniaeth dros amser, neu nes bydd amod wedi’i fodloni, er enghraifft y tymheredd dros 20°. Creu siart lif i ddangos sut mae’r algorithm yn gweithio.

⭐ Sgiliau ⭐

Egwyddorion rhaglennu

Gallu defnyddio gwahanol ddolenni, dolenni WHILE a FOR, ar gyfer gwahanol sefyllfaoedd a’u defnyddio’n effeithiol, er enghraifft, dolennu nes bydd y tymheredd uwchben ryw lefel, neu ar gyfer swm sydd wedi’i benderfynu o flaen llaw.

Cod ysgrifenedig

Dylai disgyblion allu defnyddio enwau newidynnau syn’ disgrifio beth ydynt, er enghraifft, defnyddio oed i gynrychioli’r oedran. Hefyd, dylai disgyblion allu adnabod rhannau o god nad oes eu hangen neu y gellid eu gwella.

Profi algorithmau

Gall disgyblion ddefnyddio gwahanol ddata i fesur a yw’r rhaglen yn gweithio fel y disgwyl. O hyn, dylai disgyblion allu golygu cod i drwsio unrhyw wallau.

Mathau o ddata

Dylai disgyblion ddechrau deall pwysigrwydd gwahanol fathau o ddata a sut i’w trin a’u trafod, er enghraifft, defnyddio cyfanrif ar gyfer rhifau a llinynnau ar gyfer data alffaniwmerig.

Mewnbynnau

Dylai disgyblion ddeall mewnbynnau data a gallu storio’r rhain fel newidynnau, er enghraifft, gofyn i’r defnyddiwr am y nifer o ochrau mewn siâp. Dylai disgyblion hefyd allu meddwl am wneud allbynnau eu rhaglenni yn ddefnyddiol i helpu gyda’r mewnbwn data i ddefnyddwyr.

Dylunio datrysiadau

Dylai disgyblion allu gwneud siartiau llif sylfaenol neu ffug-god i ddylunio eu cod cyn datblygu. Dylai disgyblion allu rhaglennu rhaglenni sylfaenol yn seiliedig ar siartiau llif neu ffug-god.

CC5 - Data ac algorithmau

Sut mae da yn edrych?

Ar y lefel hon, dylai disgyblion allu defnyddio dull gweithredu swyddogaethol neu weithdrefnol i raglennu. Dylai disgyblion ddeall gwerth dilysu a gwirio data i brosesu a chymhwyso amrywiaeth o dechnegau dilysu. Dylai disgyblion allu defnyddio strwythurau data uwch, fel rhestr neu ffeiliau testun. Dylai disgyblion ddeall a gallu cymhwyso algorithmau cyffredin, fel chwilio neu drefnu, yn eu rhaglenni. Dylai disgyblion ddechrau ystyried cynnal cod erbyn hyn, er enghraifft anodi codi yn glir. Dylai disgyblion allu deall y gellir defnyddio gwahanol ieithoedd rhaglennu ar gyfer gwahanol dasgau, a chymhwyso’r rhain yn briodol. Dylai’r rhaglenni a ddatblygir allu cynrychioli problemau’r byd go iawn.

Beth am...

Creu rhaglen ag iddi ddwy swyddogaeth yn Python Create sydd yn gyntaf oll yn gadael i ddefnyddiwr fewnbynnu a storio gwerthoedd mewn rhestr, er enghraifft, data glawiad. Gallai hyn ddefnyddio dolennu i fewnbynnu’r data ar gyfer pob mis. Gellid defnyddio dilysu i ofalu bod y data yn cael ei fewnbynnu’n gywir. Yn yr ail swyddogaeth, gallai’r defnyddiwr deipio gwerth, gwirio a yw’r data yn y rhestr, ac allbynnu’r data os yw’n bresennol, neu anfon neges os ddim.

Creu system gronfa ddata o fewn Python sy’n storio data, er enghraifft, cyfrifon personol, Defnyddio technegau dilysu i reoleiddio’r mewnbynnau. Storio’r wybodaeth mewn ffeil destun. Cael y disgyblion i ddarllen y data o’r ffeil destun. Defnyddio gwahanol swyddogaethau i brosesu’r data i ganfod yr uchafswm, lleiafswm, modd, cymedr a chanolrif.

⭐ Sgiliau ⭐

Rhaglennu gweithredol

Gall disgyblion ddefnyddio gweithrediadau i helpu i gynnal eu rhaglenni. Dylai hyn ganiatau ar gyfer mwy o newidynnau lleol a llai o newidynnau eang. Yna gall disgyblion ddefnyddio eu swyddogaethau i brofi eu rhaglenni.

Trefnu a chwilio

Dylai disgyblion allu defnyddio algorithmau trefnu a chwilio, neu nodweddion parod iaith raglennu, fel sort() yn Python. Mae’r sgiliau hyn yn greiddiol i raglennu ac yn caniatáu ar gyfer trin a thrafod data ar lefel uwch.

Dilysu cod

Defnyddio gwahanol dechnegau dilysu ar ddata, fel presenoldeb, amrediad, hyd, fformat a gwiriadau, i sicrhau bod y data a fewnbynnir yn gywir. Dylai disgyblion allu rhaglennu cod sydd yn dilysu’r mewnbynnau ac yn rhoi neges allbwn wrth fewnbynnu yn anghywir.

Cynnal cod

Dylai disgyblion allu anodi cod fel ei fod yn disgrifio beth mae’r rhaglen yn ei wneud. Dylai disgyblion allu defnyddio iaith bynciol i ddangos eu bod yn deall y cod a helpu i gynnal y rhaglen.

Stwythurau Data

Dylai disgyblion allu defnyddio strwythurau data uwch ar y lefel hon, er enghraifft defnyddio rhestri, araeau, a storio data i ffeiliau testun. Dylai disgyblion allu dadansoddi’r strwythurau data hyn, er enghraifft, allbynnu gwerthoedd penodol o restr, neu ddarllen ffeiliau testun y chwiliwyd amdanynt.

Dewis iaith rhaglennu

Data ac algorithmau

Dylai disgyblion ddeall y gellir defnyddio gwahanol ieithoedd rhaglennu i berfformio gwahanol dasgau, er enghraifft SQL i ddadansoddi cronfa ddata neu JavaScript i wneud gwefannau yn rhyngweithiol.

Problemau byd go iawn

Dylai disgyblion allu codio rhaglenni sydd ag effaith ar y byd go iawn, fel trin a thrafod data gwyddonol, a defnyddio’u rhaglenni i fodelu’r byd go iawn.