Mae'r adnodd hwn yn dangos sut mae'r sgiliau sydd eu hangen i gyrraedd safon uchel yn cael eu datblygu'n raddol o gam un hyd at gam cynnydd pump. Defnyddiwch hyn wrth gynllunio gweithgareddau i sicrhau bod cynnydd mewn sgiliau a her briodol yn ganolog i unrhyw dasg.

🖨️

🎥 Cynhyrchu Fideo

Mae creu fideos yn gallu bod yn ffordd hwyliog a chreadigol i gyfoethogi’r profiad dysgu i ddisgyblion. Mae’n agor cyfleoedd ym mhob maes dysgu a phrofiad i ddisgyblion ddefnyddio’u creadigedd a’u dychymyg i ddod ag unrhyw bwnc yn fyw. Gall fideos amrywio o fod yn rhai sy’n rhoi cyfarwyddiadau a gwybodaeth, i fod yn ffuglennol a sinematig. Gallant fod mor fyr neu mor hir ag sydd angen, ac fel arfer maent wedi’u hanelu at gynulleidfa benodol. I’r disgyblion hynny sydd â sgiliau cynhyrchu fideo da, efallai y byddant eisiau dilyn gyrfa yn y diwydiant cyfryngau creadigol, mewn rolau fel ysgrifenwyr sgript, technegwyr sain, gweithredwyr camera, golygyddion, cyfarwyddwyr neu gynhyrchwyr. Mae cysylltiadau cryf rhwng cynhyrchu fideo a llythrennedd, gan fod fideos yn aml yn cynnwys rhyw fath o ddeialog neu naratif.

⭐ CYNLLUNIWCH!

Gwnewch yn siŵr bod gennych chi gynllun clir ar gyfer yr hyn rydych chi am ei gynhrychu. Bydd hyn yn arbed amser ac yn sicrhau eich bod yn cynhyrchu fideo o safon gwell.

⭐ SAETHIADAU!

Arbrofwch gyda gwahanol onglau a saethiadau i ychwanegu amrywiaeth i'ch fideo. Defnyddiwch saethiadau agos, cannolig a llydan o wahanol onglau i gyfleu gwahanol safbwyntiau.

⭐ BYDDWCH YN GREADIGOL!

Mae cynhyrchu fideo yn broses hwyliog a chreadigol. Peidiwch â bod ofn arbrofi a rhoi cynnig ar bethau newydd.

⭐ DEFNYDDIWCH DRIPOD!

Gall camera sigledig arwain at gynhyrchiad amhroffesiynol. Defnyddiwch dreipod i gadw'ch saethiadau yn gyson

⭐ ANSAWDD Y SAIN!

Mae sain dda yr un mor bwysig â fideo da. Defnyddiwch feicroffon o safon i ddal y sain yn glir, ac ystyriwch ddefnyddio clustffonau i fonitro'r sain wrth ffilmio.

Awgrymiadau 🔎

Chatterpix

Adobe Express

Adobe Rush

Stop Motion Studio

Stickbot Studio

Green Screen by Do Ink

iMovie

Apple Clips

Adobe Premier Pro

Canva

Dyma rai apiau a meddalwedd y gallwch eu defnyddio i ddatblygu sgiliau cynhyrchu fideo. Detholiad bach yw'r rhain - mae LLAWER mwy ar gael. Mae’n hanfodol eich bod yn dewis yr apiau a meddalwedd sy’n addas i'r dysgwyr a bod pob dysgwr yn profi ystod o’r cymwysiadau hyn wrth iddynt gymhwyso a datblygu eu sgiliau digidol.

CC1 - Arbrofi a Recordio

Sut mae da yn edrych?

Yn y cam hwn, bydd dysgwyr yn datblygu eu gallu i adrodd stori gan ddefnyddio teganau, lluniadau neu drwy actio. Byddant yn ystyried nodweddion syml cymeriadau fel math o lais a phersonoliaeth ac yn addasu eu mynegiadau yn unol â hynny. Bydd dysgwyr yn gallu recordio fideos syml iawn gan ddefnyddio dyfais symudol drwy wasgu ‘record’ a ‘stop’. Bydd dysgwyr yn cymryd rhan mewn fideos a gynhyrchir gan oedolyn ac yn ymwybodol o ymddygiad syml tra byddant yn cael eu ffilmio, fel bod yn dawel nes bydd y recordio wedi dechrau, siarad yn glir ac edrych ar y camera wrth berfformio.

Beth am...

Ffilmiwch raglen ddogfen natur: Ewch ar daith natur gyda'r plant a ffilmiwch fideos o wahanol blanhigion ac anifeiliaid. Gall y plant siarad wrth recordio'r fideo a chynnig ffeithiau ac arsylwadau diddorol gan ddefnyddio apiau fel Shadow Puppet, Clips neu Adobe Spark Video.

Creu sioe goginio: Gofynnwch i'r plant ddewis rysáit syml a ffilmio eu hunain yn ei baratoi gam wrth gam gan ddefnyddio apiau fel Shadow Puppet, Clips neu Adobe Spark Video. Gallant esbonio pob cam a chynnig awgrymiadau a chyngor ar gyfer coginio.

⭐ Sgiliau ⭐

Adrodd stori

Actio neu ailddweud stori gan ddefnyddio teganau, lluniadau neu ddelweddau i gefnogi. Defnyddio mynegiant ac amrywio’r defnydd o’r llais i gael effaith.

Cymeriadau

Trafod eu hoff gymeriadau o ffilmiau neu raglenni y maent wedi’u gwylio. Cynnig rhesymau syml am hoffi neu am beidio â hoffi’r cymeriadau hynny.

Cymryd rhan

Cymryd rhan mewn cynhyrchiad fideo wedi’i recordio gan oedolyn. Chwarae rhan cymeriad neilltuol neu egluro rhywbeth, fel beth rydych chi wedi bod yn ei wneud mewn ardal chwarae neilltuol.

Recordio syml

Defnyddio’r botwm ‘record’ a ‘stop’ ar ddyfais symudol i recordio fideos syml.

CC2 - Datblygu Creadigrwydd

Sut mae da yn edrych?

Bydd dysgwyr yn gallu creu cynyrchiadau syml erbyn y cam hwn. Byddai hyn fel arfer yn dechrau gydag ymarferiad cynllunio gyda’r nod o wella safon y cynhyrchiad. Byddant wedyn yn gwerthuso’u gwaith i weld rhai gwelliannau sylfaenol y gellid eu gwneud. Mae eu cynyrchiadau yn dechrau dangos rhywfaint o ystyriaeth o elfennau sy’n cyfrannu at yr ansawdd, y goleuo ac onglau’r camera. Maent yn gynyddol ymwybodol o’r gynulleidfa dan sylw ac yn cynnig syniadau syml ar sut y byddant yn gwneud iddynt deimlo drwy ddefnyddio synau a golau.

Beth am...

Ffilmiwch animeiddiad 'stop-motion': Gofynnwch i'r plant greu animeiddiad gan ddefnyddio teganau, clai, neu wrthrychau eraill ar apiau fel Stop Animation neu Stickbot Studio. Mae hyn yn golygu tynnu llawer o luniau, pob un â'r gwrthrychau wedi'u symud ychydig neu eu haildrefnu, ac yna eu chwarae gyda'i gilydd yn gyflym i greu'r rhith o symudiad.

Creu fideo arbrawf gwyddoniaeth: Cynnal arbrawf gwyddoniaeth, fel ffrwydrad llosgfynydd, a ffilmio'r broses. Gall y plant esbonio'r wyddoniaeth tu ôl i'r arbrawf yn ogystal â egluro beth a ddysgon nhw drwy gyflawni'r dasg.

⭐ Sgiliau ⭐

Cynllunio

Cynllunio cynhyrchiad fideo syml drwy drefnu’r cynnwys ar ffurf bwrdd stori syml.

Creu

Creu fideos gyda mwy o annibyniaeth, trefnu amrywiol glipiau fideo ar linell amser.

Ansawdd

Dod yn gynyddol ymwybodol o ffactorau sy’n cyfrannu at ansawdd eu recordiadau, fel sefydlogrwydd camera, goleuo, ansawdd sain a dechrau arbrofi gyda gwahanol onglau’r camera er mwyn creu effaith.

Cynulleidfa

Datblygu lefel gynyddol o ymwybyddiaeth o’r gynulleidfa wrth gynllunio a chreu, gan ddefnyddio technegau syml fel effeithiau sain, goleuo neu gerddoriaeth gefndirol i greu effaith.

Gwerthuso

Adnabod rhai agweddau allweddol i’w gwella mewn cynhyrchiad.

CC3 - Cynhyrchiadau Sylfaenol

Sut mae da yn edrych?

Gall dysgwyr ddefnyddio ystod o feddalwedd i ddewis, cynhyrchu a golygu ystod o gydrannau amlgyfrwng e.e. animeiddio, fideo, delweddau efo’i gilydd i gynhyrchu fideo a chyfoethogi deilliant y cynhyrchiad i gynulleidfa benodol. Maent yn dechrau ystyried mantais gweithio fel tîm cynhyrchu drwy chwarae rhan arbennig yn y tîm ac yn gallu creu grwpiau ar-lein a rhannu gwaith rhyngddynt i ddatblygu ac adolygu cynnwys digidol. Gallant egluro’r rhesymau dros osodiad a chynnwys a chael adborth gan eraill i sicrhau bod y canlyniad yn briodol i’r dibenion penodol.

Beth am...

Creu ffilm fer gydag effeithiau arbennig: Creu ffilm fer sy'n cynnwys effeithiau arbennig fel sgrin werdd, animeiddiad ac effeithiau sain. Gallant ddefnyddio meddalwedd golygu fideo fel iMovie neu Adobe Rush i greu cynnyrch terfynol o safon.

Creu fideo dadansoddi chwaraeon: Creu fideo sy'n dadansoddi perfformiad eu cyfoedion / tîm. Gallant ddefnyddio clipiau fideo ac ystadegau i gefnogi eu dadansoddiad.

⭐ Sgiliau ⭐

Cynllunio

Cynllunio cynyrchiadau gyda rhywfaint o ystyriaeth o fframio, onglau’r camera, cynulleidfa, sain, goleuo a lleoliad.

Rolau

Dan arweiniad yr athro wrth gynhyrchu fideo mewn grwpiau mwy, dylai dysgwyr allu adnabod rolau allweddol yn y tîm cynhyrchu fel gweithredydd camera, cyfarwyddwr, golygydd ac ati. Gallant weithio gyda’i gilydd i adrodd yn ôl a gwella’r gwaith.

Golygu

Defnyddio sgiliau golygu sylfaenol mewn meddalwedd golygu syml fel iMovie neu Adobe Express Video, gan ddefnyddio effeithiau ar ddiwedd clipiau a thocio clipiau i gael gwared ar unrhyw gynnwys diangen. Adnabod a defnyddio offer meddalwedd syml fel effeithiau sain, cerddoriaeth gefndirol i wella’r cynhyrchiad. Gan ddefnyddio nodweddion cydweithio mewn rhaglenni fel Adobe Express, gall myfyrwyr weithio ar y cyd ar gynhyrchiad fideo

Gwella ansawdd

Gwneud penderfyniadau gwybodus a fydd yn cyfoethogi ansawdd y cynhyrchiad, fel lleoliadau ag ychydig iawn o sŵn cefndirol, digon o olau ac ati.

Gwerthuso

Defnyddio adborth gan gynulleidfa ehangach i adnabod ac awgrymu sut i wella’u cynyrchiadau.

Cyfuno

Cyfuno amrywiol ddulliau i greu effaith, fel fideos sgrin werdd, golygu delweddau, clipiau sain, effaith sain neu animeiddiad ac ati. Bydd dysgwyr yn dechrau ystyried sut y byddant yn allforio ac yn rhannu eu cynhyrchiad ag eraill a’r fformatau ffeil a’r ddulliau o wneud hynny e.e. MP4, uwch lwytho i Hwb YouTube ac ati.

CC4 - Cymhlethdod Cynyddol

Sut mae da yn edrych?

Bydd dysgwyr yn gallu cynllunio eu cynyrchiadau gan ystyried ystod mwy estynedig o onglau camera a thechnegau fframio effeithiol. Byddant yn gallu gweithio yn rhan o dîm cynhyrchu drwy chwarae rôl neilltuol yn y tîm. Wrth greu eu cynhyrchiad, byddant yn gwneud penderfyniadau gwell am leoliadau a mathau o saethiadau i wella ansawdd eu cynyrchiadau. Byddant yn ystyried sut i gadw eu cynnwys yn ddiogel a gwneud copi wrth cefn o’r cychwyn. Maent yn ymwybodol o’r offer uwch sydd ar gael yn eu dewis nhw o becyn golygu fideo ac yn eu defnyddio i’w llawn botensial. Ar ôl golygu eu cynhyrchiad, gallant ddangos eu gwaith i gynulleidfaoedd ehangach i gasglu adborth.

Beth am...

Defnyddio imovie ar Apple iPads i wneud cynhyrchiad proffesiynol a thrawiadol iawn a gadael i ddysgwyr ddatblygu eu sgiliau ar amryw o ddyfeisiau digidol i’r pwrpas iawn ar yr un pryd.

Dysgwyr yn datblygu eu sgiliau ac yn dechrau arbrofi gyda nodweddion uwch imovie neu’n defnyddio datrysiadau uwch fel Adobe Rush i gyfuno ystod o nodweddion amlgyfrwng ac uwch yn eu cynhyrchiad.

Maent yn ystyried sut i gadw, rhannu a chydweithio â dysgwyr eraill a hefyd sut i gadw eu gwaith a gwneud copi wrth gefn ohono yn ddiogel.

Gallech herio eich dysgwyr gan ddefnyddio’r cymhwysiad Adobe Rush sydd yn rhan o Adobe Creative Cloud ac mae trwyddedau ar gael am bris gostyngol drwy eich AALl a gellir eu rhoi drwy Ddangosfwrdd Rheoli Defnyddwyr Hwb. Mae’r cymhwysiad hwn yn paratoi’r myfyrwyr gyda’r offer mwy cymhleth y buasent yn eu defnyddio mewn fideo o safon a geir yn y diwydiant.

⭐ Sgiliau ⭐

Cynllunio

Cynllunio cynyrchiadau manwl gan ystyried fframio, onglau’r camera, cynulleidfa, sain, goleuo a lleoliad.

Golygu

Defnyddio sgiliau golygu mewn meddalwedd golygu fel iMovie neu Adobe Rush, defnyddio effeithiau rhwng clipiau a thocio clipiau i gael gwared ar unrhyw gynnwys diangen. Adnabod a defnyddio offer meddalwedd fel effeithiau sain, cerddoriaeth gefndirol i wella’r cynhyrchiad.

Gwerthuso

Yn annibynnol, gallant rannu’r cynhyrchiad fideo mewn ffordd briodol i gael adborth gan gynulleidfa ehangach ac awgrymu gwelliannau i’w cynyrchiadau.

Rolau

Wrth gynhyrchu fideo mewn grwpiau mwy, dylai dysgwyr allu adnabod rolau allweddol yn y tîm cynhyrchu fel gweithredydd camera, cyfarwyddwr, golygydd, ac ati.

Gwella ansawdd

Gwneud penderfyniadau gwybodus a fydd yn cyfoethogi ansawdd y cynhyrchiad, fel lleoliadau ag ychydig iawn o sŵn cefndirol, digon o olau ac ati.

Cyfuno

Cyfuno amrywiol nodweddion a dulliau uwch i greu effaith, fel fideos sgrin werdd, animeiddio, ac ati. Bydd dysgwyr yn dechrau ystyried fformat ac ansawdd y cynnyrch gorffenedig a sut y byddant yn ei rannu â’u cynulleidfa e.e. MP4, HD, uwch lwytho i gyfrif Hwb YouTube ac ati.

CC5 - Perffeithio'r Cynhyrchiad

Sut mae da yn edrych?

Bydd dysgwyr yn gallu cynllunio eu cynyrchiadau yn fanwl gan ddatblygu ar ddysgu blaenorol ac ystyried ystod ymestynnol o onglau camera a thechnegau fframio effeithiol. Byddant yn ystyried ble i gael eu ffilm ac effaith gyfreithiol heu hawlfraint y cynnwys a gânt. Byddant yn gallu gweithio yn rhan o dîm cynhyrchu drwy chwarae rhan neilltuol yn y tîm. Wrth greu eu cynhyrchiad, byddant yn gwneud penderfyniadau annibynnol am leoliadau a mathau o saethiadau i wella ansawdd eu cynhyrchiad. Byddant yn ystyried sut i gadw a gwneud copi wrth gefn o’u cynnwys digidol o’r cychwyn ond hefyd yn sicrhau y gall y tîm gydweithio ar eu helfennau unigol a’u casglu ynghyd yn y cynhyrchiad terfynol. Maent yn ymwybodol o’r offer uwch sydd yn eu pecyn golygu fideo ac yn eu defnyddio i’w llawn botensial gan ddefnyddio offer eraill os yw hynny’n addas i’r briff. Ar ôl golygu eu cynhyrchiad, gallant ddangos eu gwaith i gynulleidfaoedd ehangach i gasglu adborth allweddol a gwneud newidiadau manwl a phenodol yn y gwaith digidol yn sgil yr adborth.

Beth am...

Bydd dysgwyr yn datblygu ar eu sgiliau ac yn defnyddio datrysiadau uwch fel Adobe Premier i gyfuno ystod o nodweddion amlgyfrwng a nodweddion uwch ar gyfer eu cynhyrchiad.

Maent yn ystyried, yn annibynnol, sut i gadw, rhannu a chydweithio gyda dysgwyr eraill ond hefyd sut i gadw eu gwaith yn ddiogel a gwneud copi wrth gefn.

Adobe Premiere Pro sydd yn rhan o Adobe Creative Cloud ac mae trwyddedau ar gael am bris gostyngol drwy eich AALl a gellir eu rhoi drwy Ddangosfwrdd Rheoli Defnyddwyr GwE. Mae’r cymhwysiad hwn yn paratoi myfyrwyr gyda’r offer uwch y buasent yn eu defnyddio mewn fideo o safon diwydiant.

⭐ Sgiliau ⭐

Cynllunio

Cynllunio cynyrchiadau manwl yn annibynnol gan ystyried fframio, onglau’r camera, cynulleidfa, sain, goleuo a lleoliad.

Golygu

Defnyddio nodweddion golygu a sgiliau uwch mewn meddalwedd golygu fel Adobe Premier, defnyddio effeithiau rhwng clipiau a thocio clipiau i gael gwared ar unrhyw gynnwys diangen. Adnabod a defnyddio offer meddalwedd fel effeithiau sain, cerddoriaeth gefndirol, effeithiau arbennig a thechnegau uwch o ran amseru neu symud o un i’r llall i wella’r cynhyrchiad.

Gwerthuso

Yn annibynnol, gallant rannu’r cynhyrchiad fideo mewn ffordd briodol i gael adborth gan gynulleidfa ehangach ac awgrymu gwelliannau i’w cynyrchiadau.

Rolau

Wrth gynhyrchu fideo mewn grwpiau mwy, dylai dysgwyr allu adnabod rolau allweddol yn y tîm cynhyrchu fel gweithredydd camera, cyfarwyddwr, golygydd, ac ati. Maent yn dewis offer priodol i gadw, rhannu a chydweithio yn annibynnol gan ystyried cadw ffilm yn ddiogel a gwneud copi wrth gefn.

Gwella ansawdd

Gwneud penderfyniadau gwybodus a fydd yn cyfoethogi ansawdd y cynhyrchiad, fel lleoliadau ag ychydig iawn o sŵn cefndirol, digon o olau ac ati.