Mae'r adnodd hwn yn dangos sut mae'r sgiliau sydd eu hangen i gyrraedd safon uchel yn cael eu datblygu'n raddol o gam un hyd at gam cynnydd pump. Defnyddiwch hyn wrth gynllunio gweithgareddau i sicrhau bod cynnydd mewn sgiliau a her briodol yn ganolog i unrhyw dasg.

🖨️

💬 Cyflwyniadau

Mae meithrin sgiliau cyflwyno o ansawdd uchel yn hollbwysig i bobl ifanc yn y byd cyflym a rhyng-gysylltiedig sydd ohoni. Mae sgiliau cyflwyno effeithiol yn eu grymuso i gyfleu eu syniadau, mynegi eu meddyliau yn hyderus, ac ymgysylltu â'u cynulleidfa. P'un a yw hynny'n digwydd yn yr ystafell ddosbarth, yn y gweithle, neu mewn lleoliadau cymdeithasol, mae'r gallu i roi cyflwyniadau effeithiol sy'n ennyn diddordeb yn ased gwerthfawr a all agor drysau i lwyddiant.

Nid yn unig y mae sgiliau cyflwyno cadarn yn gwella eu perfformiad academaidd, ond maent hefyd yn meithrin meddwl beirniadol, creadigrwydd a galluoedd arwain. Trwy feistroli'r grefft o roi cyflwyniadau, gall pobl ifanc gyfleu eu neges yn effeithiol, arddangos eu gwybodaeth a'u sgiliau, a chreu argraff barhaus.

⭐ SYLFAEN GADARN!

Sicrhewch fod gan y dysgwyr y sgiliau sylfaenol y mae eu hangen i greu cyflwyniadau, megis llywio trwy sleidiau, mewnosod testun a delweddau a chymhwyso opsiynau fformatio sylfaenol.

⭐ DEFNYDDIWCH EGWYDDORION DYLUNIO!

Ymgorfforwch egwyddorion dylunio, megis eglurder, undod a harmoni, cydbwysedd a chymesuredd, pwyslais a chyferbyniad, ac ailadrodd a chysondeb, yn y broses o greu cyflwyniad. Addysgwch y myfyrwyr sut i gymhwyso'r egwyddorion hyn yn effeithiol i wella atynfa weledol ac effeithiolrwydd eu cyflwyniadau.

⭐ CYNLLUNIWCH!

Mae cynllunio a llunio bwrdd stori yn hanfodol cyn mynd ati i greu. Anogwch y myfyrwyr i drafod syniadau, trefnu eu cynnwys a chreu strwythur clir ar gyfer eu cyflwyniadau.

⭐ MEITHRIN CREADIGRWYDD!

Encourage learners to think outside the box when designing their presentations. Encourage them to experiment with different layouts, colour schemes, fonts and multimedia elements to create visually compelling and unique presentations that convey their message.

⭐ PWYLLWCH!

Peidiwch â gorlwytho eich sleidiau â gormod o animeiddiadau, effeithiau pontio, delweddau a thestun. Ar y neges y dylai'r pwyslais fod, nid ar ymddangosiad gweledol y sleid.

Awgrymiadau 🔎

JiT

Adobe Express

PowerPoint

Google Slides

Google Sites

Microsoft Sway

Prezi

Canva

j2create

j2office

Dyma rai apiau a meddalwedd y gallwch eu defnyddio i ddatblygu sgiliau creu cyflwyniadau. Detholiad bach yw'r rhain - mae LLAWER mwy ar gael. Mae'n hanfodol eich bod yn dewis yr apiau a meddalwedd sy'n addas i'r dysgwyr a bod pob dysgwr yn profi ystod o'r rhaglenni hyn wrth iddynt gymhwyso a datblygu eu sgiliau digidol.

CC1 - Archwilio cyflwyniadau

Sut mae da yn edrych?

Mae'r dysgwyr yn gallu llywio trwy ystod o lwyfannau cyflwyno syml gwahanol, a siarad am eu cynnwys. Gyda chymorth, maent yn dechrau defnyddio offer syml yn J2E i greu delwedd, ac ychwanegu testun gan ddefnyddio'r offeryn cyfuno.

Beth am...

Creu cyflwyniad amdanaf i/am bwnc o ddiddordeb gan ddefnyddio offeryn cyfuno J2E ac ymgorffori llun y maent wedi'i beintio a rhywfaint o destun y maent wedi'i deipio.

⭐ Sgiliau ⭐

Rhyngweithio

Rhyngweithio â chyflwyniadau amlgyfrwng, e.e. symud eitemau o un rhan o'r sgrin i'r llall. Profi nifer o gymwysiadau gwahanol e.e. Tudalennau ar y Rhyngrwyd, J2E.

Graffigyn

Mewnforio delwedd o'r llyfrgell neu ddelwedd y maent wedi'i chreu.

Testun

Llunio brawddeg syml gan ddefnyddio fformatio syml.

CC2 - Creu cyflwyniadau syml

Sut mae da yn edrych?

Mae'r disgyblion yn gallu defnyddio offer cyflwyno megis PowerPoint, Google Slides, neu Just2Easy mewn modd effeithiol i greu cyflwyniadau syml sy'n cynnwys testun a delweddau sylfaenol. Maent yn deall sut i lywio trwy sleidiau a defnyddio opsiynau fformatio sylfaenol. Maent yn cynllunio eu tasgau digidol gan ddefnyddio meini prawf llwyddiant i gefnogi'r broses, ac maent yn gallu dod o hyd i wybodaeth neu gyfryngau penodol gan ddefnyddio technegau a geiriau allweddol gwahanol.

Beth am...

Creu cyflwyniad syml yn ymwneud â phwnc cyfarwydd, megis teuluoedd neu anifeiliaid anwes.

Defnyddio offeryn rhyngweithiol, megis Book Creator, i gyflwyno gwybodaeth am bwnc y maent wedi dysgu amdano yn yr ysgol.

Creu stori/cyflwyniad rhyngweithiol sydd â hyperddolenni mewnol i adrannau gwahanol o'r stori/cyflwyniad.

⭐ Sgiliau ⭐

Llywio

Llywio trwy sleidiau'r cyflwyniad ac ychwanegu hyperddolenni gan ddefnyddio'r swyddogaeth uwcholeuo.

Mewnosod delweddau

Defnyddio technegau sylfaenol i fewnosod delweddau, gan sicrhau bod y delweddau'n ategu'r cynnwys.

Ychwanegu testun

Mewnosod testun a defnyddio opsiynau fformatio sylfaenol. Defnyddiwch ffontiau clir a darllenadwy, gan sicrhau maint testun a bylchau priodol.

Trefnu

Ychwanegu, dileu ac aildrefnu sleidiau.

CC3 - Creu at ddiben ac ar gyfer cynulleidfa

Sut mae da yn edrych?

Mae'r disgyblion yn gallu creu cyflwyniadau sydd ag atynfa weledol, gan ddefnyddio offer megis PowerPoint, Microsoft Sway, Google Slides, Google Sites ac Adobe Creative Cloud Express. Maent yn gallu defnyddio nodweddion megis effeithiau pontio rhwng sleidiau, animeiddiadau ac elfennau amlgyfrwng yn effeithiol i wella eu cyflwyniadau. Dylai'r dysgwyr ystyried cyfeirnodi ffynonellau yn eu gwaith, gan gynnwys tarddiad y delweddau.

Beth am...

Creu Tudalen Gwe Google Sites/Adobe Creative i gyflwyno gwybodaeth am ffigwr hanesyddol, gan gofnodi ei fywyd.

Cyflwyno gwaith ymchwil a wnaed gan y dysgwyr i grŵp neu gynulleidfa benodol, gan gynnwys hyperddolenni i ffynonellau allanol.

⭐ Sgiliau ⭐

Effeithiau pontio ac animeiddiadau

Defnyddio effeithiau pontio rhwng sleidiau ac animeiddiadau, gan sicrhau eu bod yn gydlynol.

Amlgyfrwng

Mewnosod a thrin elfennau amlgyfrwng, megis clipiau sain a fideo.

Themes

Defnyddio themâu a thempledi yn effeithiol. Cynnal thema weledol gyson yn y cyflwyniad trwyddo draw. Defnyddio cefndiroedd yn effeithiol, h.y. rhai sy'n ychwanegu at gyflwyniad yn hytrach nag yn amharu arno.

Delwedd

Creu cyferbyniad rhwng y testun a'r cefndir i sicrhau darllenadwyedd.

Llywio

Defnyddio botymau gweithredu i greu hyperddolenni mewn cyflwyniad a chyfeirio hefyd at ddogfennau a gwefannau allanol eraill.

Testun

Defnyddio lliw, maint a phwysau ffont i dynnu sylw at bwyntiau allweddol.

CC4 - Cymhlethdod cynyddol

Sut mae da yn edrych?

Mae'r disgyblion yn gallu dylunio cyflwyniadau cydlynol sy'n ennyn diddordeb, ac sydd â strwythur clir a hierarchaeth weledol, a hynny gan ddefnyddio offer megis PowerPoint, Microsoft Sway, Google Slides, Google Sites ac Adobe Creative Cloud Express. Maent yn gallu defnyddio nodweddion uwch, megis rheolwr sleidiau, animeiddiadau personol, ac elfennau rhyngweithiol mewn modd effeithiol. Wrth iddynt gynllunio, dylai'r dysgwyr ddefnyddio amrywiaeth o dechnegau cynllunio a chwilio amrywiaeth o ffynonellau gan ddefnyddio dulliau cynyddol gymhleth.

Beth am...

Creu cyflwyniad sy’n gynyddol gymhleth yn seiliedig ar bwnc neu faes o’ch dewis gan sicrhau ei fod yn addas i'r diben a’r gynulleidfa.

Llunio cyflwyniad sgrin gan ddefnyddio tudalennau gwe neu sioe sleidiau sy'n rhoi gwybodaeth am fwyta'n iach i bobl ifanc rhwng 13 ac 16 oed.

Ailddrafftio cyflwyniad ar sail adborth a geir gan gyfoedion.

⭐ Sgiliau ⭐

Dylunio

Dylunio cyflwyniadau gan ddefnyddio strwythur clir a hierarchaeth weledol. Dosbarthu'r cynnwys yn gyfartal ar draws y sleidiau. Cynnal cymesuredd priodol rhwng y testun a'r elfennau gweledol. Cydbwyso lliwiau ac elfennau i sicrhau atynfa weledol.

Nodweddion uwch

Defnyddio nodweddion uwch megis rheolwr sleidiau i greu templedi. Defnyddio animeiddiadau personol i ychwanegu effaith.

Golygu

Dethol a defnyddio offer a thechnegau cynyddol gymhleth i olygu delweddau a thestun, e.e. gwneud rhannau o'r graffeg a'r testun yn dryloyw, haenu testun dros ddelweddau, defnyddio templedi a phrif sleidiau.

Llywio

Ymgorffori elfennau rhyngweithiol mwy cymhleth, e.e. ychwanegu hyperddolenni gan ddefnyddio botymau i guddio'r url.

Cyfuno

Dylid cyfuno cydrannau o amryw o ffynonellau i greu deilliannau digidol o ansawdd uchel.

Gwerthuso

Egluro’r rhesymau dros gynllun a chynnwys eu gwaith digidol, a defnyddio adborth i sicrhau bod yr allbwn yn briodol ar gyfer cynulleidfaoedd penodol.

CC5 - Cyflwyniadau soffistigedig

Sut mae da yn edrych?

Mae'r disgyblion yn gallu creu cyflwyniadau o ansawdd proffesiynol gan ddefnyddio offer uwch megis PowerPoint, Microsoft Sway, Google Slides, Google Sites, Adobe Creative Cloud Express, a Prezi. Maent hefyd yn gallu defnyddio nodweddion amlgyfrwng uwch yn effeithiol, megis golygu sain a fideo, ac ymgorffori elfennau rhyngweithiol ar gyfer ymgysylltiad defnyddwyr.

Beth am...

Creu cyflwyniad soffistigedig ac iddo bwrpas, ar gyfer cyfweliad am swydd neu gynnig busnes.

Gosod tasg i greu catalog amlgyfrwng, e.e. “Yn y gorffennol mae sefydliad wedi darparu catalog wedi'i argraffu ar gyfer ei gwsmeriaid. Mae'r sefydliad wedi penderfynu trosi ei gatalog yn wefan neu'n gyflwyniad cyfrifiadurol amlgyfrwng. Mae’r sefydliad am i chi ddatblygu arddull tŷ ac ethos a fydd yn cael eu defnyddio ym mhob cyhoeddiad yn y dyfodol.”

“Mae llawer o gwmnïau ar-lein bellach yn cynnig Apiau i helpu i hyrwyddo eu cynnyrch a’u gwasanaethau. Gellir gosod yr Apiau hyn ymlaen llaw ar ddyfeisiau megis ffonau symudol, llechi a chyfrifiaduron, neu gellir eu lawrlwytho yn ddiweddarach o wefannau amrywiol. Crëwch gyflwyniad ar-lein ar gyfer cynnyrch neu wasanaeth o’ch dewis, a fydd yn amlinellu manteision creu a/neu ddefnyddio Ap, ac unrhyw broblemau a allai godi wrth ddefnyddio’r Ap.”

⭐ Sgiliau ⭐

Dylunio

Creu cyflwyniadau o ansawdd proffesiynol, amlygu creadigrwydd yn ogystal â sgiliau technegol, a defnyddio hierarchaeth weledol i arwain sylw'r gynulleidfa.

Golygu

Mynd ati'n annibynnol i ddethol a defnyddio offer a thechnegau cynyddol gymhleth i olygu delweddau a thestun, e.e. gwneud rhannau o'r graffeg a'r testun yn dryloyw, haenu testun dros ddelweddau, defnyddio templedi a phrif sleidiau.

Cyfuno

Dylid cyfuno cydrannau o amryw o ffynonellau i greu deilliannau digidol o ansawdd uchel sy'n agos at fod o safon broffesiynol.

Gwerthuso

Cyfiawnhau'r rhesymau dros gynllun a chynnwys eu gwaith digidol, ac yn gallu defnyddio adborth i sicrhau bod yr allbwn yn briodol ar gyfer cynulleidfaoedd penodol. Maent yn gwneud newidiadau manwl a phenodol i'r gwaith digidol ar sail adborth a hunanwerthuso.