Mae'r adnodd hwn yn dangos sut mae'r sgiliau sydd eu hangen i gyrraedd safon uchel yn cael eu datblygu'n raddol o gam un hyd at gam cynnydd pump. Defnyddiwch hyn wrth gynllunio gweithgareddau i sicrhau bod cynnydd mewn sgiliau a her briodol yn ganolog i unrhyw dasg.

🖨️

🪧 Ffeithlun

Mae ffeithluniau yn ffordd o gyflwyno gwybodaeth sy’n dibynnu ar eu hapêl weledol i ddal sylw’r gynulleidfa. Maent yn cyfuno lliwiau, delweddau a graffeg â gwybodaeth ar ffurf testun neu ddata i rannu gwybodaeth yn effeithiol. Gall dysgwyr greu ffeithlun ar gyfer bron unrhyw gyd-destun a’i defnyddio i gyflwyno gwybodaeth i amrywiaeth o ddibenion: marchnata, cyflwyno canfyddiadau, codi ymwybyddiaeth, rhoi cyngor, gosod cyfarwyddiadau, atgyfnerthu gwybodaeth ac ati. Mae llawer o ddiwydiannau yn defnyddio ffeithluniau i dargedu cynulleidfa benodol ac fe’u gwelir yn cael eu defnyddio’n helaeth ar y cyfryngau cymdeithasol i hysbysebu cynnyrch a gwasanaethau. O’u cynllunio yn eich cwricwlwm, mae cynllunio a chreu ffeithluniau yn gadael i’ch dysgwyr ddefnyddio a datblygu egwyddorion dylunio allweddol yn greadigol a byddant yn cyfathrebu yn fwy effeithiol ac effeithlon drwy ddefnyddio technoleg ddigidol.

⭐ CREADIGRWYDD!

Mae digon o dempledi ar gael wrth greu ffeithluniau, ond cofiwch mai'r nod yn y pen draw yw i ddysgwyr gynhyrchu cynnwys creadigol a gwreiddiol.

⭐ CYD-DESTUNAU!

Gellir defnyddio ffeithluniau ym mron pob cyd-destun o'r cwricwlwm. Sicrhewch fod dysgwyr yn gwybod hyn a'u bod yn manteisio ar y cyfleoedd i gyflwyno gwybodaeth yn y ffurf hwn.

⭐ BRANDIO!

Wrth greu unrhyw fath o graffeg bydd cyfleoedd i drafod brandio trwy ddefnyddio rhai egwyddorion dylunio. Manteisiwch ar y cyfleoedd hyn a chodi ymwybyddiaeth o'i bŵer.

⭐ CYNULLEIDFA!

Bydd gan bob ffeithlun gynulleidfa darged. Sicrhewch fod dysgwyr yn ystyried hyn tra'n cynllunio.

⭐ MARCHNATA!

Defnyddir ffeithluniau fel arf marchnata pwerus. Cymerwch olwg ar yr hyn a gynhyrchir yn y byd go iawn a defnyddiwch hyn i godi ymwybyddiaeth o dechnegau ac arddulliau sy'n llwyddiannus.

Awgrymiadau 🔎

JiT5

j2Create

Adobe Express

Freeform

Adobe Photoshop

Adobe Illustrator

Canva

Dyma rai apiau a meddalwedd y gallwch eu defnyddio i ddatblygu sgiliau creu ffeithluniau. Detholiad bach yw'r rhain - mae LLAWER mwy ar gael. Mae'n hanfodol eich bod yn dewis yr apiau a meddalwedd syn addas i'r dysgwyr a bod pob dysgwr yn profi ystod or cymwysiadau hyn wrth iddynt gymhwyso a datblygu eu sgiliau digidol.

CC1 - Delweddau sylfaenol

Sut mae da yn edrych?

Gall disgyblion ddefnyddio meddalwedd sylfaenol a graffeg i osod delweddau mewn gwaith. Maent yn dechrau talu sylw i gyfraneddau yn eu gwaith ac addasu delweddau a graffeg yn briodol h.y. os ydynt yn defnyddio llun o lygoden a chath, byddai’r gath yn fwy na’r llygoden. Mae disgyblion yn dechrau arbrofi â lliwiau trwm a llachar, ffontiau syml a gosod delwedd/testun i greu graffeg syml.

Beth am...

Creu graffeg i hysbysebu stori neilltuol gan ddefnyddio meddalwedd sylfaenol fel JiT neu Adobe Express (ar iPad).

⭐ Sgiliau ⭐

Lleoli

Symud delweddau ac elfennau graffigol (blwch testun neu ddelwedd) i safleoedd penodol yn y gwaith.

Cyfraneddau a maint

Addasu maint yr elfennau graffigol i fod yn ymwybodol o gyfrannedd.

Lliwiau

Dewis lliwiau priodol i dynnu sylw at graffeg.

CC2 - Egwyddorion dylunio allweddol

Sut mae da yn edrych?

Disgyblion yn cyfuno graffeg, delweddau a gwybodaeth gan ddod yn fwyfwy ymwybodol o egwyddorion dylunio allweddol fel cydbwysedd, pwyslais/hierarchaeth a chyferbyniad. Caiff graffeg eu creu i gynulleidfa benodol ac maent yn gallu trosglwyddo negeseuon allweddol yn effeithiol gan ddefnyddio lliwiau, cysodi a nodweddion meddalwedd sylfaenol.

Beth am...

Bwyta’n iach – cyngor ar fwyta’n iach.

Creu cyfarwyddiadau ar gyfer patrymau iechyd a lles allweddol fel brwsio dannedd ac ati.

Cyflwyno gwybodaeth/canfyddiadau o waith ymchwil/ymchwiliadau ac ati.

⭐ Sgiliau ⭐

Pwyslais / Hierarchaeth

Pwysleisio negeseuon allweddol drwy leoli a chyfrannedd i sicrhau eglurder a phwrpas.

Cyferbyniad

Defnyddio lliwiau, ffontiau a chefndiroedd i greu ffeithluniau sy’n denu’r llygaid.

Cyflwyniad

Defnyddio nodweddion meddalwedd allweddol i greu graffeg wreiddiol.

Cyfathrebu

Defnyddio iaith gryno sy’n gytbwys â nodweddion gweledol eraill fel delweddau, eiconau a graffeg.

CC3 - Safon cynyddol

Sut mae da yn edrych?

Mae disgyblion yn dangos dealltwriaeth dda o egwyddorion dylunio allweddol fel cyferbyniad, hierarchaeth, ailadrodd, patrwm ac undod, ac yn gallu creu graffeg neu ffeithlun i amrywiaeth o ddibenion e.e. marchnata, brandio, rhannu gwybodaeth ac ati. Mae safon a chyflwyniad eu ffeithluniau yn arwain at bwysleisio negeseuon allweddol. Mae disgyblion yn gallu cynllunio eu defnydd o graffeg drwy ddiffinio dimensiynau eu graffeg a thrafod dulliau priodol o rannu h.y. llwyfannau cyfryngau cymdeithasol, gwefannau ac ati i dargedu cynulleidfaoedd penodol.

Beth am...

Llinell amser hanesyddol – llinell amser digwyddiadau allweddol mewn cyfnod amser penodol.

Menter – dogfennau perswadio i werthu cynnyrch/syniad.

Cyflwyno data ystadegol.

Dogfennau perswadiol i amrywiaeth o ddibenion.

⭐ Sgiliau ⭐

Cynllunio

Adnabod cynulleidfa darged a nodweddion penodol o fewn y graffeg fel gwybodaeth allweddol, dimensiynau, a chyfleoedd i rannu.

Egwyddorion dylunio

Cymhwyso egwyddorion dylunio allweddol yn dda i greu ffeithluniau addas sy’n denu’r llygaid.

Cyfathrebu

Defnyddio iaith a phenawdau yn effeithiol i gyfathrebu yn effeithiol ac effeithlon.

Dinasyddiaeth

Trafod hawliau digidol a pherchnogaeth yn ogystal â goblygiadau o ran delwedd ac enw da.

Gwerthuso

Adnabod nodweddion effeithiol ffeithluniau ac awgrymu gwelliannau i’w gwaith eu hunain.

CC4 - Cymhlethdod cynyddol

Sut mae da yn edrych?

Gall disgyblion gynllunio yn fanwl sut i ddefnyddio graffeg drwy ddiffinio dimensiynau eu graffeg a thrafod dulliau priodol o rannu h.y. llwyfannau cyfryngau cymdeithasol, gwefannau ac ati, i dargedu cynulleidfaoedd penodol. Maent yn archwilio ac yn defnyddio technegau trin delweddau yn effeithiol i gyfoethogi gosodiad eu ffeithlun ac yn defnyddio tudalennau neu dempledi meistr yn dda pan fo hynny’n briodol. Maent yn chwilio am ystod o wybodaeth yn annibynnol gan ddefnyddio technegau chwilio cymhleth ac yn gwerthuso dibynadwyedd y ffynonellau. Mae’r cynnyrch terfynol yn addas i’w gynulleidfa a’r diben ac mae’r disgyblion yn gallu rhoi cyfiawnhad clir dros y dewis o gyfrwng ac egluro manteision ac anfanteision yr allbwn maent wedi’i greu. Gallant awgrymu a gwneud gwelliannau sy’n berthnasol i’r gynulleidfa a diben yr allbynnau, ar sail adborth a hunan werthusiad o’r gwaith digidol.

Beth am...

Ffeithlun i ddangos canfyddiadau o brosiect ymchwil personol.

Ffeithlun adolygu ar gyfer pwnc gan ddefnyddio Adobe Creative Cloud (Fersiwn llawn neu Express).

Creu ffeithlun i amlinellu problem newid hinsawdd e.e. meicroblastig, tanwyddau ffosil ac ati.

⭐ Sgiliau ⭐

Cynllunio

Adnabod yn annibynnol y gynulleidfa darged a’r nodweddion penodol o fewn y ffeithlun fel gwybodaeth allweddol, dimensiynau a chyfleoedd i rannu.

Egwyddorion dylunio

Archwilio a mynd ati i weithredu’n effeithiol yr egwyddorion dylunio allweddol i greu ffeithluniau addas, sydd yn ddeniadol i’r llygad a defnyddio technegau trin delweddau yn briodol. Defnyddio offer dylunio fel templedi meistr i addasu themâu a lliwiau i weddu i ddiben y ffeithlun.

Cyfathrebu

Archwilio a datblygu ystod o destun ffurfiol a defnyddio iaith a phenawdau yn effeithiol i gyfathrebu yn effeithiol ac effeithlon i wahanol gynulleidfaoedd a dibenion.

Dinasyddiaeth

Trafod a deall hawliau digidol a pherchnogaeth yn ogystal â goblygiadau o ran delwedd ac enw da, a gallu esbonio elfennau cyfreithiol a moesegol parchu gwaith creadigol.

Gwerthuso

Adnabod nodweddion effeithiol ffeithluniau ac awgrymu gwelliannau sy’n berthnasol i’r gynulleidfa dan sylw a diben eu gwaith.

CC5 - Perffeithio ffeithluniau

Sut mae da yn edrych?

Mae’r disgyblion yn dangos fod ganddynt ddealltwriaeth dda, sy’n gynyddol gymhleth, o egwyddorion dylunio allweddol fel cyferbyniad, hierarchaeth, ailadrodd, patrwm ac undod, ac yn gallu mynd ati’n annibynnol i greu graffeg neu ffeithluniau i amrywiaeth o ddibenion e.e. marchnata, brandio, rhannu gwybodaeth ac ati. Mae safon a chyflwyniad eu ffeithluniau yn arwain at bwysleisio negeseuon allweddol. Gall disgyblion gynllunio’n fanwl eu defnydd o graffeg gan ddiffinio dimensiynau eu graffeg a thrafod y dulliau priodol o rannu h.y. llwyfannau cyfryngau cymdeithasol, gwefannau i dargedu cynulleidfaoedd penodol. Maent yn ystyried manteision a chyfyngiadau ysgolion dylunio digidol a ffynonellau gwybodaeth i sicrhau eu bod nhw o’r ansawdd gorau posibl i’r gynulleidfa a’r diben. Maent yn archwilio ac yn defnyddio technegau trin delweddau yn effeithiol i gyfoethogi gosodiad eu ffeithlun ac yn defnyddio tudalennau neu dempledi meistr yn dda pan fo hynny’n briodol. Mae’r cynnyrch terfynol yn addas i’w gynulleidfa a’r diben ac mae’r disgyblion yn gallu rhoi cyfiawnhad clir dros y dewis o gyfrwng ac egluro manteision ac anfanteision yr allbwn maent wedi’i greu. Gallant awgrymu a chyfiawnhau adborth yn feirniadol a gwneud gwelliannau eu hunain, a gan eraill, drwy gorffori’r defnydd o offer adolygu cydweithredol yn y gweithgaredd sy’n berthnasol i gynulleidfa a diben yr allbynnau, ar sail adborth a hunan werthusiad o’r gwaith digidol.

Beth am...

Ffeithlun i ddangos canfyddiadau o brosiect ymchwil personol – dilyniant da at fath o ffeithlun ar ddiwedd gradd i ddangos canfyddiadau.

Ffeithlun adolygu ar gyfer pwnc.

Ffeithlun diwedd prosiect Technoleg/Celf neu Decstilau.

Defnyddio ffeithlun i gyflwyno gwybodaeth yn briodol ar unrhyw destun ar draws pob maes dysgu a phrofiad.

⭐ Sgiliau ⭐

Cynllunio

Yn annibynnol a gyda mwy o gymhlethdod, maent yn adnabod y gynulleidfa darged a’r nodweddion penodol o fewn y graffeg fel gwybodaeth allweddol, dimensiynau a chyfleoedd i rannu.

Egwyddorion dylunio

Archwilio a mynd ati i weithredu’n effeithiol yr egwyddorion dylunio allweddol i greu ffeithluniau addas, sydd yn ddeniadol i’r llygad a defnyddio technegau trin delweddau yn briodol. Gyda mwy o gymhlethdod, defnyddio ystod o offer dylunio a phecynnau meddalwedd sydd â nodweddion fel templedi meistr i addasu themâu a lliwiau i weddu i bwrpas y ffeithlun.

Cyfathrebu

Archwilio a datblygu ystod o destun ffurfiol a defnyddio iaith a phenawdau yn effeithiol i gyfathrebu yn effeithiol ac yn effeithlon i wahanol gynulleidfaoedd a dibenion gan gorffori’r defnydd o offer adolygu cydweithredol yn y gweithgareddau.

Dinasyddiaeth

Deall a meddwl yn feirniadol am hawliau a chyfrifoldebau unigolion fel crewyr a hawliau digidol a pherchnogaeth yn ogystal â goblygiadau o ran delwedd ac enw da ac esbonio elfennau cyfreithiol a moesegol parchu gwaith creadigol.

Gwerthuso

Gwerthuso’r gwaith yn feirniadol a chyfiawnhau’r rhesymeg o ran nodweddion effeithiol ffeithluniau ac awgrymu gwelliannau sy’n berthnasol i’r gynulleidfa dan sylw a diben eu gwaith.