Mae'r adnodd hwn yn dangos sut mae'r sgiliau sydd eu hangen i gyrraedd safon uchel yn cael eu datblygu'n raddol o gam un hyd at gam cynnydd pump. Defnyddiwch hyn wrth gynllunio gweithgareddau i sicrhau bod cynnydd mewn sgiliau a her briodol yn ganolog i unrhyw dasg.

🖨️

🎙️ Podlediad

Podlediad yw sioe sain sy'n cael ei recordio a'i rhannu drwy wasanaethau ffrydio fel Spotify, BBC Sound, Apple Music (a llawer mwy!) Maen nhw'n cael eu creu fel bod y gynulleidfa yn gallu gwrando ar amser sy'n gyfleus iddyn nhw ac maent yn aml ar ffurf cyfres o benodau. Fel arfer, maen nhw'n cynnwys mwy nag un person ac yn tueddu i ddilyn patrwm strwythuredig ond eto anffurfiol. Mae modd creu podlediad ar unrhyw destun, bron! Mewn ysgolion, gallai podlediad fod yn ffordd wych i gyflwyno gwybodaeth, trafod pynciau llosg neu edrych ar syniadau a'u datblygu.

⭐ CYNLLUNIWCH!

Mae podlediad da yn cynnwys gwahanol rannau sydd wedi'u cynllunio i ddal diddordeb y gynulleidfa.

⭐ DEWISWCH GYFLWYNYDD!

Bydd cyflwynydd yn arwain podlediad fel arfer. Y cyflwynydd sydd fel arfer yn cychwyn y drafodaeth ac yn cysylltu'r holl eitemau â'i gilydd.

⭐ BYDDWCH YN NATURIOL!

Mae'n bwysig eich bod chi'n dangos eich cymeriad mewn podlediad. Dyma sy'n ei wneud yn wahanol i fathau eraill o gyflwyno.

⭐ PEIDIWCH A DARLLEN!

Mae podlediad yn anffurfiol fel arfer ac nid yw'n golygu darllen o sgript, er bydd rhai rhannau yn fwy ffurfiol ar brydiau.

⭐ YMARFER!

Er mai bwriad podlediad yw bod yn anffurfiol ac yn ffwrdd â hi, mae'n aml yn syniad da ymarfer beth rydych chi eisiau ei ddweud o flaen llaw.

Awgrymiadau 🔎

Spotify for Podcasters

Adobe Express

Chatterpix

TalkR

Voice Recorder

Garageband

Audacity

Adobe Podcast

Dyma rai apiau a meddalwedd y gallwch eu defnyddio i ddatblygu sgiliau creu podlediad. Detholiad bach yw'r rhain - mae LLAWER mwy ar gael. Mae'n hanfodol eich bod yn dewis yr apiau a meddalwedd syn addas i'r dysgwyr a bod pob dysgwr yn profi ystod or cymwysiadau hyn wrth iddynt gymhwyso a datblygu eu sgiliau digidol.

CC1 - Edrych ar synau a'u recordio

Sut mae da yn edrych?

Gall disgyblion ddefnyddio dyfais i recordio clipiau sain gyda mwy o annibyniaeth. Gallai disgybl recordio ei hun yn egluro rhywbeth, yn cyflwyno gwybodaeth, yn creu llais i gymeriad neu'n recordio synau neu gerddoriaeth mewn gwahanol amgylcheddau. Gellir hefyd datblygu'r sgiliau hyn drwy recordiad fideo drwy dynnu sylw yn arbennig at yr agweddau sain.

Beth am...

Fynd â disgyblion tu allan i recordio synau natur e.e. cân yr adar, anifeiliaid.

Creu trosleisiau i gymeriadau gan ddefnyddio apiau trosleisio llais fel Chatterpix, Morfo, Talkr.

⭐ Sgiliau ⭐

Recordio synau efo dyfais

Defnyddio dyfais fel 'talking tins' neu lechen i recordio synau.

Newid eich llais

Defnyddio ffyrdd i newid eich llais e.e. tiwbiau, gwahanol ystafelloedd, gweiddi, sibrwd.

Adrodd stori neu egluro

Recordio synau a lleisiau i adrodd stori neu egluro rhywbeth.

CC2 - Mwy o ffocws a phwrpas

Sut mae da yn edrych?

Gall disgyblion gyfoethogi eu gwaith drwy fewnforio delweddau a fideos y gallant roi naratif drostynt a chynnwys traciau sain ac effeithiau sain. Bydd disgyblion hefyd yn edrych ar sut mae gwahanol synau yn creu cyfansoddiad cerddorol, ac yn dod i ddeall hyn, a sut i ychwanegu a thorri agweddau ar drac.

Beth am...

Podlediad Siôn Corn - Grŵp bach yn trafod beth maent yn gobeithio'i gael y Nadolig hwn.

Adolygu teganau - disgyblion yn adolygu eu hoff degan a beth maent yn ei hoffi amdano.

Podlediad iach - disgyblion yn trafod beth allant ei wneud i gadw'n iach. Blasu bwydydd.

⭐ Sgiliau ⭐

Cynllunio

Dechrau defnyddio proses effeithiol ar gyfer cynllunio cynnwys h.y. bwrdd stori, pwyntiau bwled, nodiadau, ymarfer.

Troshaenu trac sain

Troshaenu (recordio dros) trac sain i gyfoethogi fideo gan ddefnyddio nodweddion parod mewn ap.

Creu eich podlediad cyntaf

Recordio podlediad byr a syml sydd yn ystyried y broses gynllunio h.y. un trac heb fod angen golygu.

Creu effeithiau sain

Recordio eu heffeithiau sain eu hunain er mwyn cyfoethogi'r adrodd h.y. recordio dail yn crensian neu ddrws yn agor.

Recordio mewn mwy nag un cyd-destun

Recordio eu llais mewn mwy nag un cyd-destun h.y. adrodd stori, egluro.

Gwerthuso

Gwerthuso safon y cynnwys i weld sut ellid ei wella h.y. gwrando'n ôl neu roi adborth i gyd-fyfyrwyr.

CC3 - Cynhyrchiadau Syml

Sut mae da yn edrych?

Gall disgyblion gynllunio cynnwys eu podlediad yn effeithiol a thrafod tôn a manteision defnyddio podlediad i gyflwyno'r wybodaeth hon i'r gynulleidfa yn hytrach na dulliau cyflwyno eraill. Gall disgyblion ddefnyddio sgiliau golygu sylfaenol i gyfuno amrywiol draciau ar ôl recordio'r cynnwys. Ar ôl iddynt werthuso'r cynhyrchiad a'r cynnwys, gall disgyblion wella safon eu gwaith drwy ail-recordio rhai rhannau.

Beth am...

Recordio podlediad i ymateb i ddigwyddiad lleol/cenedlaethol neu eitem newydd.

Recordio podlediad i drafod diogelwch ar y we neu seiberddiogelwch i ddweud wrth eraill am wahanol ffyrdd i gadw'n ddiogel.

Podlediad ar fethiannau epig - beth maent wedi methu'i wneud a beth maent wedi'i ddysgu o'r profiad hwnnw.

⭐ Sgiliau ⭐

Cynllunio

Cynllunio cynnwys podlediad gyda sylw priodol i dôn, arddull, hyd a chynnwys.

Golygu

Defnyddio sgiliau golygu sylfaenol i docio clipiau a chyfuno amryw o draciau.

Myfyrio

Adnabod cryfderau a gwendidau defnyddio'r dull hwn o gyflwyno gwybodaeth.

Dulliau recordio

Recordiwch y podlediad naill ai mewn un recordiad neu gan ddefnyddio dull recordio fesul rhan h.y. recordio fesul rhan, ail-recordio rhannau ac ati.

Gwerthuso a gwella

Gwerthuso safon y cynhyrchiad a'r cynnwys a gwella camau priodol y recordiad os oes angen.

Cyfeirio ac adnabod

Cyfeirio ac adnabod ffynonellau gwybodaeth wrth gyflwyno ffeithiau.

CC4 - Mwy o gymhlethdod

Sut mae da yn edrych?

Gall disgyblion gynllunio'u podlediad gyda mwy o ystyriaeth at gadw'r gynulleidfa h.y. cynllunio eitemau neu ddarnau byrion fel cwis, trafodaeth neu sgwrs efo gwestai gyda'r nod o gynnal diddordeb y gynulleidfa. Gall disgyblion ddechrau defnyddio nodweddion fel cerddoriaeth gefndirol neu gerddoriaeth deitl i wella profiad y gynulleidfa. Mae gwerthuso'n ehangach yn arwain at wella cynnwys a chynhyrchiad y podlediad. Gall disgyblion ddewis ffyrdd priodol o rannu'r podlediad â chynulleidfaoedd ehangach h.y. rhyddhau'r podlediad ar wahanol lwyfannau, ymgyrchoedd marchnata gan ystyried hawlfraint a pherchnogaeth. Bydd disgyblion yn defnyddio'u hawliau creadigol drwy ystyried materion moesegol a bywyd go iawn.

Beth am...

Clwb llyfrau - podlediad yn trafod llyfr sydd wedi'i ddarllen mewn clwb llyfrau.

Podlediad chwaraeon - Trafod timau chwaraeon yr ysgol, canlyniadau diweddar, cyfweld â rhai chwaraewyr ac ati.

Podlediad Gyrfaoedd - Cyfweld â rhai disgyblion i drafod eu dyheadau o ran gyrfa a sut maent yn bwriadu eu cyflawni.

⭐ Sgiliau ⭐

Cynllunio

Cynllunio cynnwys y podlediad gyda mwy o sylw i wneud y cynnwys yn ddifyr drwy wahanol ddulliau/eitemau h.y. cwis, trafodaeth, gemau, gwestai arbennig.

Golygu

Defnyddio sgiliau golygu i gyfuno amryw o draciau ac ychwanegu cerddoriaeth gefndirol neu gerddoriaeth deitl os yn briodol

Rhannu a darlledu

Gwneud podlediadau ar gael i gynulleidfaoedd ehangach, gan ddefnyddio dulliau marchnata digidol ble bo hynny'n briodol.

Ansawdd

Recordio'r podlediad fesul cam gyda mwy o ymwybyddiaeth o effaith dyfais, caledwedd ac amgylchedd recordio

Gwerthuso a gwella

Gwerthuso'r cynhyrchu a'r cynnwys drwy gael adborth gan ffynonellau ehangach a gwella safonau yn briodol.

CC5 - Perffeithio'r podlediad

Sut mae da yn edrych?

Gall disgyblion gynllunio a chreu podlediadau safonol sydd yn ddifyr, yn fywiog ac yn denu sylw'r gynulleidfa. Drwy gynllunio a dylunio, gallant egluro sut y gellid strwythuro podlediadau mewn cyfres a sut y gellid amserlennu'r cynnwys yn briodol. Gallant gynnwys nodweddion ychwanegol fel rhigymau sydd yn wreiddiol neu wedi'u recordio'n barod, gan ddangos dealltwriaeth lawn o berchnogaeth a deddfau hawlfraint wrth ddefnyddio cynnwys pobl eraill. Gall disgyblion ddefnyddio gwahanol galedwedd a meddalwedd o safon diwydiant i recordio a chynhyrchu eu podlediadau.

Beth am...

Bwletin ysgol - pod wythnosol sy’n briffio disgyblion eraill am yr hyn sy’n digwydd yn yr ysgol yr wythnos hon. Eitemau fel - Clecs! Neu ‘Ydych chi’n gallach na phlentyn 10 oed?’ i ddod â rhai elfennau hwyliog i mewn.

Pod gyrfaoedd - cyfweld â phobl gyswllt o wahanol ddiwydiannau i roi gwybod i ddisgyblion am y sgiliau sydd eu hangen i weithio mewn swyddi amrywiol.

⭐ Sgiliau ⭐

Cynllunio

Rhannwch y gwaith o gynllunio podlediad i gynnwys nifer o eitemau neu agweddau i wneud y cynnwys yn fwy bywiog a diddorol.

Cynhyrchu

Cynhyrchu podlediadau gan ddefnyddio caledwedd a meddalwedd safonol y diwydiant.

Golygu

Defnyddio sgiliau golygu i ychwanegu cerddoriaeth cefndirol, 'jingles' ac ati i wella ansawdd y podlediad lle bo'n briodol.

'Jingles'

Creu / cyfansoddi 'jingles' neu dod o hyd i glipiau sain ffynhonnell agored / rhydd o hawlfraint y gallent eu defnyddio.

Gwerthuso a gwella

Gwerthuso safon a cynnwys y cynhyrchiad a gwella camau priodol y recordiad os oes angen.