Avaliación
A avaliación debe ser coherente con este propio proxecto e fiable para ser tomada como referente na avaliación final do director e do seu equipo. Porén, non se considera simplemente unha fase final. A avaliación enténdese como un elemento dinamizador de toda a actividade do centro durante o período de mandato da dirección.
En primeiro lugar establecemos os axentes que participan neste proceso:
Avaliacion interna. Corresponde ao equipo directivo, nas sesións que se realizan todas as semanas e polo menos ao final de cada trimestre, analizar o cumprimento das actuacións programadas. Ademais, redactarase un informe que inclúe a valoración da acción directiva e que se engade á memoria final remitida á Inspección.
Avaliación participativa. Todos os sectores da comunidade educativa teñen voz no seguemento do proxecto directivo. En especial os órganos de goberno e coodinación achegan datos e valoracións de xeito continuado.
O Consello Escolar ten competencias na aprobación e revisión das actuacións do equipo directivo. O Claustro canaliza boa parte das achegas do profesorado. Os Departamentos avalían resultados, logros, dificultades e xeran propostas de mellora a través das memorias e os xefes de departamento a través da Comisión de Coordinación Pedagóxica. As xuntas de delegados tamén recollen as aportacións do alumnado. A ANPA transmite numerosa información e inquietudes das familias a través das reunións mensuais coa dirección e a súa participación na vida académica.
Tamén corresponde á administración a través da Inspección avaliar e facer un seguimento do proceso e da dirección do centro.
En segundo lugar, citamos algúns dos mecanismos ou procementos de avaliación:
Enquisas de valoración. Os procedementos informáticos axilizaron enormente o procesamento de datos estatísticos e permiten chegar na actualidade a amplos sectores da comunidade.
Grupos de debate. Ininstrumento para a recollida de datos e información baseada nos argumentos empregados no debate entre un grupo relevante.
Documentos internos. Existen avaliacións nas memorias finais dos departamentos, análises de xefatura de estudos, informes de dirección sobre os resultados académicos e outros como o do Observatorio da Convivencia.
Rexistros de actividades, obras, etcétera.
Buzón de Suxestións, Queixas e Reclamacións (SQR).
Por último, na declaración das liñas de actuación para acadar os obxectivos propostos, reflictense os indicadores de avaliación.