Coordinación e planificación pedagóxica

Como centro de traballo, o funcionamento do IES require a a planificación dos horarios e posibilidades de reunión dos seus integrantes. O primeiro adoita considerarse un dos momentos máis delicados, do que dependen grandes e pequenas consecuencias futuras, ás veces imprevisibles. A vontade de reparto equitativo da carga de traballo entre o profesorado debe conxugarse coa optimización do esforzo do alumnado ao longo da xornada escolar.

En canto ás reunións de coordinación entre os diferentes estamentos educativos, estes son os que se veñen realizando no centro:

• Reunións semanais: departamentos, coordinación do equipo directivo, coordinación de titorías con Orientación.

• Reunións mensuais: Comisión de Coordinación Pedagóxica, reunión da directiva coa ANPA,

• Reunións trimestrais: xuntas de avaliación, claustro, Consello Escolar, comisión de convivencia, reunión colectiva dos titores cos pais e nais, xunta de delegados, coordinación cos centros adscritos

• Outras: Claustros e Consellos Escolares extraordinarios, Consello Escolar Municipal,

Dúas son as carencias reiteradas nesta planificación tradicional. Por unha banda, as sesións de coordinación por grupos e niveis, fóra das preceptivas xuntas de avaliación, que sirvan de canle de comunicación entre o profesorado. E, por outra, a coordinación en temas relacionados co currículo de diferentes materias.

O titor/a é unha figura clave na actual organización escolar. Asume numerosas responsabilidades en todos os campos de relación co alumnado, coas familias e co equipo docente. É unha tarefa que demanda experiencia profesional, coñecemento da cultura organizativa do instituto e non poucas doses de tranquilidade vital e sentido común. Recibe a cambio pouco recoñecemento nas condicións laborais.

Daquela, estamos convencidos de que potenciando a figura do titor/a redunda na mellora da orde, a convivencia, a atención ao alumnado e o seu rendemento escolar.