Plurilingüismo e dinamización da lingua galega

A presenza das linguas estranxeiras na vida académica ten aumentado coa implantación no centro das seguintes medidas:

• Auxiliar de conversa en lingua inglesa.

• Seccións bilingües castelán-inglés.

• Oferta de programas para a cualificación en inglés do alumnado (CUALE).

Semella factible manter esta participación no Plan de Potenciación das Linguas Estranxeiras. sempre que conte cun firme compromiso e iniciativa persoal do profesorado e departamentos implicados, boa resposta do alumnado e demanda das familias.

Por outra banda, cómpre recuperarmos as iniciativas de intercambio, cooperación ou mobilidade con centros doutros países, salientablemente dentro do marco europeo.

O estudo estatístico máis completo sobre a realidade sociolingüística do IES Mugardos foi realizada o curso pasado (2011-12). Dos datos presentados nel extráense en resumo dúas conclusión. Por unha banda, o baixo ou nulo emprego do galego polo alumnado; e a existencia de actitudes tanto favorables á normalización coma reacias á ampliación de usos, principalmente orais.

En calquera dos casos, o ámbito académico parece ser case o único no que a lingua galega fai acto de presenza na súa vida cotiá. Por iso, malia difícil percepción de avances no pasado e o panorama sombrío de redución de axudas no futuro, a dinamización lingüística segue a ser necesaria para conseguirmos que o alumnado acade ao final do ensino obrigatorio a mesma competencia lingüística nas dúas linguas oficiais.

Ademais no próximo período, cómpre revisar ou redactar un novo Proxecto Lingüístico de Centro que integre todas as medidas e actividades relativas á aprendizaxe de linguas e a adquisición da competencia lingüística.