Candidato

Acabo de cumprir o sétimo trienio de servizo administrativo docente. Tras varios centros nas catro delegacións territoriais que me permitiron vivir e coñecer Galicia desde Ourense ata Betanzos e desde Vilanova de Arousa ata Ribadeo, obtiven o primeiro destino definitivo no IES Castro de Baronceli (Verín).  Fun titor académico de varios grupos ESO e membro e coordinador de varios equipos que conseguiron a aprobación do Plan de Mellora de Bibliotecas Escolares en tres centros diferentes.

No curso 2010-2011 obtiven o segundo destino definitivo, e ata o momento último, no IES Mugardos. Lembro con agrado a titoría dun grupo  denominado daquela PCPI e a coordinación do Grupos de Traballo centrado na redacción inicial do Plan de Mellora e posta en marcha do proxecto lector coa Hora de Ler e os Clubs de Lectura entre outras medidas.

Xa ao curso seguinte asumín o cargo de vicedirector no equipo da directora Covadonga Rodríguez-Moldes. Entre outras tarefas, dese período saliento a actualización da páxina web do centro e a organización da conmemoración do 25 aniversario. 

Presentei voluntariamente o primeiro proxecto de dirección para o período 2013-2017, e renovei a solicitude para o 2017-2021. Nestes oito anos os principais retos profesionais viñeron dados pola necesidade de afrontar a forte crise económica da década, a implantación da LOMCE e o contexto da covid-19.