「望你順遂臺灣」

交通安全是咱眾人攏會拄着兮議題，咱攏是愛臺灣兮人，莫閣擴大眾人之間兮必巡矣，按呢所有人攏無益處！支持道路平權兮人毋但是藍白兮支持者爾，莫咧講彼瘦話共支持這个議題兮台派青鳥捒走，台派干焦是一群認同臺灣自決兮人，同性戀嘛干焦是一群性傾向仝款兮人，親像騎機車兮嘛會當駛車、行路🙂‍↕️

咱會使是臺灣在地文化兮傳承者，會使是交通路權兮𤆬路者，嘛會使是性別平權兮提頭者，這攏無衝突啊！是按怎愛非烏即白兮劃分咧，按呢佮這馬政府區別汽機車路權兮做法敢無仝？這毋是恁上猌兮行為，是按怎家己做攏無要緊，全然着是雙標欸！話閣講轉來，咱攏是為着臺灣愈來愈好咧拍拚，莫按呢自相殘殺嘿！向望咱臺灣會愈來愈進步，無論佇族群、交通佮性別平權等議題逐家攏會真心尊重別人，莫閣為着這款五四三兮代誌着冤家甲糜糜卯卯，按呢鷸蚌相諍干焦是予敵人可乘之機爾⋯⋯

阮敢是啥物足賤兮人，想欲愛家己所愛兮人有人咧指指揬揬，連向望咱生活兮土地愈來愈好嘛愛聽人講彼五四三，這攏予我心足忝兮，嘛讓我認真去想我定講兮一步一跤印，敢會使行出家己兮人生？毋過無拍拚着啥物攏無，愛按怎較好咧？感覺講遮爾濟嘛干焦是敨氣爾，莫想傷濟矣！好好仔向前看較實在啦😎