Útgöngumiðar

Útgöngumiðar (e. exit ticket) eru einföld kennsluaðferð sem kennarar geta notað til að fá upplýsingar frá nemendum um stöðu þeirra í náminu. Útgöngumiðar nýtast líka sem endurgjöf frá nemendum til kennara um hvað virkar vel í námi og kennslu og á hvaða sviðum kennarinn þarf að breyta til eða hjálpa meira.

Útgöngumiðar geta gegnt mikilvægu hlutverki í leiðsagnarmati sem er áhrifaríkast þegar kennari vinnur markvisst að því að safna og hlusta á endurgjöf frá nemendum. Endurgjöf frá nemendum fjallar bæði um stöðu þeirra í náminu en líka um viðbrögð þeirra við kennslu kennarans, hvað hjálpar þeim að læra og hvað þeir myndu vilja að kennarinn geri til að hjálpa þeim betur.