Vuci ca ti cunnuci
POESIA
Frati Umili di Pitralìa
Figghiu di la nostra Petra assài antica
disiùsu d'arti, di fidi e granni carità
detti la so arma di quannu era ancora nica
a lignu e scarpièddu ppi placàri la so avidità.
'Stu frati ccu abili maistrìa e immensu amùri
modellànnu un pezzu di lignu nobili e duci
arriviscènnu la passioni di nostru Signùri
s'allistìa n'atru Gesù Cristu misu in cruci.
A cori afflittu lu prigàva, lu scurpìa e lu cupiàva
ppi comu dintra lu sintìa, comu fussi a iddu mistu
di sudùri e lacrimi lu vagnàva, di sangu so lu culuràva
la so vuci, lu cori pua cci dava; iddu era lu veru Cristu.
Addinucchiàtusicci a li piedi l'ura ca atu l'avìa isàtu
si facìa lu signu di la cruci, mentri lentu lu squatràva
comu picca sannu fari cci cunfidàva ogni so piccàtu
pua sirènu ascutàva la cunnànna ca miritàva.
Trentatrì nn'avìmu cuntàti, forsi di cchiù nni criàsti;
a ttia frati Umili, santu di la nostra Petra di dumàni
ora va la nostri lodi ppi 'sta gran doti ca nni lassàsti
Pitralìa godi la fama e la raccumànna a futùri mani.
Santo Li Puma
CANZONE
Frati Umili
Figghiu d"a nostra Petra, la Petra assài antìca
disiùsu d'arti e fidi, di granni carità
cci detti la so ama, quann'era ancora nica,
a lignu e scarpièddu ccu tanta avidità.
`Stu frati, ccu maistrìa e ccu ‘mmènsu amùri
si modellava un truncu, truncu di lignu duci
in cori la passioni di lu nostru Signùri
e s'allistìa Gesù, lu Cristu misu in cruci.
Su' trentatrì chiddi cuntàti, forsi di cchiù chiddi criàti;
Umili Frati di Pitralìa, la nostra lodi va ora a ttia
nn"o nostru cori ppi sempri resti ppi `sta gran doti ca nni lassàsti
e la Supràna godi la fama, lu nostru populu ora t'acclàma.
Afflìttu lu prigàva, scurpìa e cupiàva
chiddu ca dintra avìa nell'arma lu sintìa
di sudùri e lacrimi e sangu lu tingìa
lu cori, la so vuci pua iddu cci dava.
Curvu a li so piedi duoppu ca l'avìa isàtu
la cruci si facìa, mentri si lu squatràva
e siddu avìa piccàtu pua cci dumannàva
e quali pinitènza s'avìa miritàtu.
Su' trentatrì chiddi cuntàti, forsi di cchiù chiddi criàti;
Umili Frati di Pitralìa, la nostra lodi va ora a ttia
nn"o nostru cori ppi sempri resti ppi `sta gran doti ca nni lassàsti
e la Supràna godi la fama, lu nostru populu ora t'acclàma.
Santo Li Puma
POESIA
Arvuli Santi
Dintra ‘u vuoscu s’incaminàva
tutti l’arvuli taliàva
a unu a unu li squatràva
mentri la menti travagghiàva
pinsàva e ripinsàva
suppisàva e valutàva.
Abèti, chiuppu, castàgnu
ma a lu tigghiu facìa signu
l’ucchiùzzu cci facìa
ccu li vrazza si lu cincìa
ccu l’uocchi lu spugghiàva
tuttu lu cirimuniàva.
Fra’ Umili cci sapìa spiegàri
‘u pirchì l’avìa a sirràri
ppi fari la testa la so morti
datu ca è di pasta forti;
‘u tigghiu ascutàva e si cummincìa
ca in Cristu risurgìa si giuvini murìa.
Pp’’a fini ca putìanu fari
tanti si pruntàru vuluntàri;
‘u chiuppu ca ‘mmidia avìa
ppi fari ‘u corpu si offrìa,
‘u castagnu pocu duci
era prontu ppi la cruci.
Lu Frati era assai cuntèntu
di tantu “virdi” sintimèntu
pua dintra li trascinàva
sutta ‘i mani si li ‘mpustàva
ppi nobili trattamènti
a ‘ddi trunchi sofferènti.
Ccu durcìzza li scurciàva
ccu maistrìa scarpiddiàva
gran dulùri cci ‘mpunìa
appena Cristu cumparìa
ma l’arvuli fatti Santi, d’amùri cattigghiàti,
già in Cielu eranu vulàti, cuntènti e biàti.
Santo Li Puma
POESIA
A Petralia Soprana
Dormiente paese mio
steso sulla cresta di un monte
da lontano
scorgo i variopinti bagliori
riflessi dalle policrome guglie
marcate dal sole
sulle torri
stagliate nel cielo.
E nella tua sommità
il cadente castello normanno
di Conte Ruggero.
M’immagino nelle tue viuzze
di pietre vive, incastonate,
levigate dai secoli,
greti di fiumi
in piena per i Santi Patroni.
Sento la flebile eco
di passi solitari
curiosi, rilassati
dentro i vicoli stretti.
Risuona
nella mia mente
l’armonioso concerto
anima di spazi silenti
per quattro bocche canterine
e pennuti solisti.
Silenzioso e Pio
il busto del figlio tuo
Frate Umile
scultore d’alto pregio.
Serena, immobile
cinta di rugose facciate
languida testimone dei caduti
Piazza del Popolo.
Placide e fresche
le antichissime chiese
scrigni d’arte
custodi di fede, amore
e di meraviglie,
la maestosa Matrice.
Stregato dall’alba
sulla panca di pietra del belvedere
l’occhio mio si smarrisce
nell’immenso “mare” isolano
da cui emerge
l’imperterrito fumaiolo.
Lentamente
l’aurora mi rende
i pensieri:
estasiati
rinfrancati.
Stella mia cara
guida sicura
predatrice dei miei pensieri
ricetto d’identità
culla del mio meditare
sei tu.
Custodirai il corpo mio
privato dell’anima
bramoso di quiete
arreso alla morte
quando Lui lo vorrà.
Santo Li Puma
5.CANZONE
Terra di Sali
Ati muntàgni e li virdi campàgni
è paìsi antìcu, lu mia vi dicu,
di saracìni, arabi e nurmànni
ca dominàru pp'un saccu di anni.
Percia lu cielu Pitralìa Supràna
nn''e la vallàta li tanti frazioni
tanta armunìa, tanti custiòni
ma vinci 'a raggiùni, la menti sana.
Genti aurùsa, genti sincera
granni di cori, genti massàra
ricca d'amùri e senza mali
ricca di suli, ricca di sali.
C'è acqua duci e acqua amàra
acqua salàta, acqua surfàra
terra d'amùri, terra di suli
terra d'amàri, terra di sali.
E s'abballàva nn''a via d''u sali
carriàvanu l'arabi 'ncapu l'armàli
dintra Guràfu si fici 'a salìna
scavàvanu sali, sira e matìna.
Mastri, pueti e li tiatrànti
c'eranu artisti, pirsùni 'mpurtànti
lu frati scurtùri Umili Pintòrnu
prigàva e scurpìa notti e juornu.
Genti aurùsa, genti sincera
granni di cori, genti massàra
ricca d'amùri e senza mali
ricca di suli, ricca di sali.
C'è acqua duci e acqua amàra
acqua salàta, acqua surfàra
terra d'amùri, terra di suli
terra d'amàri, terra di sali.
Cci su' maìstri, io mi nni vantu
maìstri di suonu, ballu e cantu;
Santi Patrùna e spusi barùna
stinnàrdi ati e festa d''u sali.
Santo Li Puma
6.CANZONE
'U ballu d"a curdèdda
Antìcu è `stu ballu
cu principiò a fallu
cci misi tantu amùri
fii prima d"u Signùri.
Lu palu è la vita
ca abbìta e ca sbita
li trizzi sunu guai
ca cci nni sunu assài.
Dùdici masculi, dùdici fimmini
dùdici `i misi, dùdici coppii
vistùti beddi e `ncincinnàti
sia schietti ca maritàti.
E ora satàti e ora ballàti
ppi manu dritta prima `ntrizzàti
ppi manu manca vi nni tumàti
e la Madoma ringraziàti.
È riccu lu viddànu
si ha li spichi in manu
anchi di malannàta
la Madonna è lodata.
Ccu picca s'accuntènta
ma di forza nn'avi tanta
e trova l'alligrìa
ballàmu s' arricrìa.
E ora furriàti
e giusti vi `nfilàti
lu capu fa di ugghia
e nuddu si `mpidùgghia.
Oh beddi picciuttèddi
`ntrizzàti ` sti curdèddi
`ntrizzàtili ccu amùri
amàti `sti figùri.
Santo Li Puma