Entre as variantes dezaseis e dazaseis, dezasete e dazasete etc., as dúas con moita presenza na fala, escolleuse a primeira por manter claramente a vinculación con dez; con respecto ao a da segunda sílaba, cómpre indicar que non se trata, como puidera pensarse, dunha alteración fonética do e copulativo senón dun resto da conxunción latina AC.99

Para a forma corenta, vide 10.1.

As formas sasenta, satenta, de ampla representación na lingua falada, aparecen xa documentadas na época medieval. A escolla como normativas das variantes sesenta e setenta, máis próximas das etimolóxicas, débese a que se vinculan claramente a seis e sete.

As formas antigas duzentos e trezentos na lingua moderna foron substituídas polas máis transparentes douscentos e trescentos.

Cando os numerais vinte, trinta, corenta..., noventa van seguidos da conxunción e, contraen na pronunciación a súa vogal final coa conxunción e nunha realización [ɛ]: vinte e sete ['bintɛ'sɛte], trinta e dúas ['trintɛ'đuas], oitenta e catro [oj'tɛntɛ'katro].

Cento, millón, billón, trillón, aínda que expresan número, funcionan como substantivos, igual que ducia, decena, centena.

Os numerais un, unha, cando son adxectivos, contraen con de, en e con, da mesma maneira ca os artigos indeterminados (vide 14.2.2.). Pola contra, cando son pronominais, normalmente contraen coas preposicións en e de, pero non coa preposición con, da mesma maneira ca o indefinido un(s), unha(s): equivocouse nunha ou en dúas respostas; con unha xa me abonda.