金屬色經驗分享

見久唔久都有人問關於噴金屬色嘅問題，咁我喺度班門弄斧一下，分享自己嘅經驗啦

不過頭盔戴定先，真係純粹個人經驗，唔一定100%正確，或者最佳做法，只係我咁樣做，可以做到自己想要嘅效果咁解嘅啫。

有錯都歡迎各位巴絲指正/補充

通常大家噴金屬色，都係想要金屬嗰種閃令令嘅效果，而要做到呢個效果，就一定要打好個底先，咁點先為之打好個底呢? 一個字「滑」! 最好滑到照到自己個樣。

個表面越滑，金屬色嘅表現就越令。相反，如果上金屬色前個表面處理得唔好，例如底層已經噴到起沙，咁金屬色就點噴都係啞啞地。更甚者，如果嚿件有打磨花痕、水口未磨平、縮膠、無縫凹坑等等未處理好，上完金屬色後都會變得非常明顯。

而我最常用嘅金屬色噴法係：

底灰(any color)＞底色(亮黑)＞光油＞金屬色

底灰係for chk件用嘅，確保嚿件啲瑕疵已經處理好晒，當然底灰都有提高面油咬件程度嘅作用啦
金屬色本身遮蓋力高，喺噴到飽和嘅情況下，受底色影響發色嘅情況其實相當輕微。但我都會選擇黑色做底色，原因係因為要觀察係咪噴到好滑嘅令面(照唔照到自己個樣)，黑色比淺色(例如白色)容易睇太多。
光油就係make sure個面噴到夠平滑，我自己習慣會噴兩層

當然仲有好多我聽過嘅金屬色噴法：

黑底灰＞光油＞金屬色

底灰＞亮黑xN＞金屬色

底灰＞亮黑＞光油＞拋光＞金屬色

blablabla……我冇一一試過，但宗旨應該都離唔開先做好一個光滑嘅表面，之後再上金屬色

除咗目標係做滑個面之外，上述做法仲有一個共通點--就係要噴好多層油。

如果你係整笨大膠達呢啲對素組派非常友善（屌即係對塗裝派好唔友善喇），密合度高到hihi嘅模型，噴油噴得太厚，喺最後組裝上係有機會出現困難嘅。特別係當你想上金屬色嘅地方係隻膠達嘅骨架。

咁可以點做呢？原件直上金屬色！

其實模型原件表面都算滑，只要喺水口位功夫做得足啲，直上金屬色未尚唔係一個選擇。喂喂喂，膠達啲骨架零件有啲係用ABS膠嗰喎，噴硝基漆唔係會爆膠咩？

但我嘅經驗話我知：

呢隻叉鴨髀呢嚿肩關節零件係ABS膠嚟，我薄噴 GAIA 020 gun metal，噴完冇事、組裝冇事、調整pose冇事、擺咗幾年都仲好地地。

呢樣就真係睇個人喜好。事關金屬原色一定係最閃最令嘅，上面噴任何透明coating都會改變咗佢所表現嘅質感。例如噴光油就會好似打咗蠟咁有層油喺面，噴半光就會令隻金屬色睇起上嚟好似磨沙金屬咁。下面就係金屬原色、金屬＞半光同金屬＞光油嘅效果。

所以視乎自己想要邊種金屬表現，去決定要唔要噴/噴邊隻coating，冇絕對嘅，自己鐘意就得喇。

有時明明已經做到個面滑一滑，但點解噴完金屬色都係啞啞地嘅呢？

好大可能係……你噴嗰日濕度太高啦！

所以幾時都話，高濕度從來都係噴油大敵嚟。記住揀乾到裂嘅日子先嚟噴金屬色，就包冇死錯人。

除咗金銀銅鐵呢啲典型金屬色之外，有時我哋都會想噴下其他金屬色，例如金屬紅、金屬藍等等。當然市面上係會有某啲比較熱門嘅金屬色賣(例如金屬紅)，但呢啲現成嘅金屬色嘅深淺度又未必一定啱自己心水。咁其中一個解決方法就係candy噴塗法。

candy 噴塗法係指，喺噴咗基本金屬色(例如銀色、金色)後，再喺上面噴透明色 (例如 clear red)。靠疊上一層又一層嘅透明色，嚟達至自己理想深淺度嘅金屬色。

用呢種噴法，金屬色嘅表現可以話係千變萬化，基本底色(金銀銅鐵) 係一個變數，面色(透明紅橙黃綠青藍紫)係另一個變數，連疊幾多層嚟控制深淺又係一個變數。所以用呢種噴法前，建議先噴下膠匙羹，試啱隻色先拎去實戰，除非某種配搭自己已經用到好熟。

不過由於透明色可疊色呢個特性，點樣喺唔同零件上面，都穩定地控制到深淺度一致，就要自己小心一啲喇。如果有一嚿件噴深色咗，一係就其它件都補噴追返隻深色，一係就洗件重噴，再唔係就要開無敵嘅無視大法咯。

11/7/2023

BY 船到橋頭仆到直