內容為基礎資訊，如有任何錯誤請見諒
圖中為MODO COLOR既水補土 MK-11/MK-12
底灰，一個初學噴油既人好常聽到既字眼。到底何為底灰? 幾時要用? 有乜用?
本文章內容以硝基漆作準
首先大家要搞清楚乜野係"底灰"。有唔少首次噴油既朋友都會有一個誤解「噴油前上左底灰，之後上色最後上消光就岩既啦。」的確呢段對話唔可以話你錯，不過一定唔係岩得晒。
第一樣要理解既係底灰唔係一種信仰、儀式，佢本身真係有實際用途(不過當今速食YOUTUBE片文化影響，已經有好多人求出片快會連呢D最基本既步驟都Skip埋...)
由於"底灰"呢兩隻字過於空泛，我自己就慣左叫返"水畢地"、"水補土"，下文而家開始會稱呼返做"水補土"。
※"水畢地"、"水補土"同"畢地"、"AB補土"係完全唔同既野黎，你唔好癲到去買支牙膏畢地用THINNER開稀完倒入噴筆噴呀....
"水補土"姐係SURFACER，作用有幾個
A. 將件零顏色統一方便檢查瑕疵，仲可以遮返打磨後白化同埋無縫痕
B. 填補微細既痕跡 (正正可以解決好多新手問點解400#磨到1000#都仲有花痕既)
C. 加強油漆附著力
如果你見到其他人上色，唔難見到一個畫面就係隻模型噴水補土噴到一躂躂，有D位就灰色有D件就原膠色甚至黑色都有。點解呀? 因為模型既膠件本身就會有收縮凹位呢D問題，呢類瑕疵如果唔統一顏色用眼肉都幾難檢查，當噴完水補土乾左之後用800號既砂紙係件零上面輕輕打磨呢D瑕疵就會表露無違。
唔係講笑，有時真係會發雞盲唔上灰都發現唔到自己連水口都未清....
所以水補土從來都唔係只係單單噴一次，噴完又磨磨完又補補完再噴噴完又磨呢D畫面其實周不時都會發生，所以新手們真係唔好當"上灰"係儀式。
有一點係幾有趣，就係間唔中都會聽到有朋友問可唔可以拎水補土當主色咁用(例如當白色/灰色)，其實就無話唔得，只係水補土一般都會比較粗糙，有得簡都唔會咁樣做。
而郡氏既水補土有分編號，其實同砂紙原理一樣數字越大就越滑，一般黎講高達用1000就OK既啦。另外而家既"水補土"已經出到越黎越多唔同既顏色，作用就係為左方便用家可以噴少一層發色層，咁咩係發色層? 可以按此了解下
2020 12 22