速乾膠無縫 by快樂山埃
本文介紹一下我自己最常用既無縫方法,速乾膠無縫法(AA膠無縫)
模型技巧中常用既無縫法都係不外乎溢膠法（以模型膠水無縫，原理為以模型膠水將膠溶解再重新結合後打磨為平整表面）以及填充法（用填補物料去填滿縫隙後打磨以平整表面）。本文將會介紹一下我自己最常用既無縫方法，速乾膠無縫法(AA膠無縫)。
１）溢膠法係近年模型開模同成型技術成熟左後，先用得到既方法黎。因為溢膠法最重要的條件就係：
一：零件組合後有密合到，搽膠水落去後可以施力擠壓出夾口中間既膠；
二：膠料合適，只有PS膠先可以用普通膠水去做溢膠。
如果模型密合度以及精度都唔夠好，膠料特殊例如POM,PC,ABS膠等係無法用呢個方法無縫的。而現在在市場上面既模型廠技術都有高有低，甚至知名大廠的不同產品線都會出現非主打產品線既品質出現問題無法密合，此方法並不可以一招走天崖，需要有其他無縫方法去處理溢膠做唔到的零件。
２）填充法，係素組情況下最理想既無縫方案。用有色速乾膠或者膠框水無縫法的優點係用有色框膠去做填充物（以前會用牙膏畢地之類既物料，現在多配色或透明物料），可以符合返原色成形件的顏色，而透明既速乾膠更加可以無視成形色去使用；而且因為係填充法，無需要模型夾口既精度非常準確以及特定膠料配合膠水都可以做到無縫，甚至部份夾口有高低差或縫隙都可以以此同時做埋修補。此方法唯一缺點就係貴同埋煩，如果係用有色速乾膠或模型用既速乾膠，其實價錢都相對上幾貴，而膠框水既事前預備工夫多而且膠框水不能夠重用，而每次都要用大量膠水先做到少量既膠框水，如果經常要用此法真係比較麻煩的。
所以，我覺得用透明速乾膠用黎做無縫其實係非常好既選擇，第一快，第二唔駛理膠料及成形色，第三有填充效果，第四操作方法簡單。我覺得非常適合素組派既玩家，以下會簡單介紹一下步驟：
速乾膠無縫法介紹
速乾膠無縫法顧名思義，就係以速乾膠黎做填充物既填充無縫方法。
首先你要準備既材料有
1.透明速乾膠（推薦用低白化的模型用速乾膠，優點是比較好磨；如沒有既AA膠也可以但因比較硬會較難磨。另也有部份人為了更易檢查會用黑色速乾膠，但後其需要上色或補色遮蓋）
2.操作平面，例如廢硬卡紙，或即棄膠器皿（本文推薦用品客薯片蓋貼上遮蓋膠紙，用完後撕掉膠紙即可重用操作平面)
3.牙籤
4.筆刀或挫刀，打磨工具，200-1000號砂紙／打磨海綿
操作方法如下：
１）準備要無縫的零件，我自己會留少少縫畀佢，留縫與否視呼你手上既速乾膠水的情況，如果好稀有流動性既可以直接啪實都得唔需要留縫，但如果膠水放得耐開始流動性低既，就可以留縫畀佢等第二步時塗抹方便。
由於當初冇影相，此處借用大龍網的素組圖片展示未做無縫前的情況。
左圖是白免的腳部
大龍網入面車胎未無縫前的情況
２）速乾膠一定唔可以直接塗上零件上面，因為好易會過多膠水而炒車周圍流。最好係先擠落去操作平面上然後用牙籤塗抹，塗滿縫隙後可以再塗厚少少都冇問題。
塗得太多會有周圍出現白化的情況，但因為後面都會打磨所以冇咩所謂。
３）等速乾膠硬化，方可以做下一工序，如果你有催乾劑都可以噴上去令佢更快硬化。
（小知識：速乾膠多數係膠同空間中的水份產生化學反應而硬化，所以話"乾透＂其實不太準確，而硬化需要的時間係同天氣及濕度有影響，你打一個乞嚏都可以有催硬既效果，不過唔好試，有誤食風險)
４）因為速乾膠一般比模型的膠料硬，務必先用筆刀或挫刀把多出的速乾膠刮走，然後才開始打磨，否則會變成磨走了原件但填料物未被磨走的尷尬情況。刮走多餘填補物料後開始進行打磨至滿意為止 。
圖左既車胎係240打磨到1000，可見已經沒有縫但表面並不統一，
圖右係1000後再用3m海綿紅藍綠作表面處理一次，基本上除了水口外已沒有痕跡，無縫成功。
左圖白免用速乾膠做無縫後既效果，中間見到的微縫係因為速乾膠同成形膠質地不同，沒有消光處理下的反光度差異所產生的線。
不完美，但不上色的話我覺得已經是最好的結果了。
結論：速乾膠無縫一定唔係最完美既處理方法黎，缺點都有唔少，例如：
有時放置一段時間後透明膠無縫有機會會首先變色，處理不好白化進入了縫內除了上色無法執手尾處理，如果是亮光處理的零件會很易發現無縫的痕跡等。
但係瑕不掩瑜，此方法的方便之處，係素組派或者係新手，想試下做無縫的玩家用此法做第一次試做無縫都係唔錯的選擇來，又或者老手懶人，想一技走天崖都可以選擇呢個方法以節省工序時間，多謝收看。