琺瑯滲線液介紹

講開琺瑯滲線液，小弟用過上圖呢五隻，分別係Black、Gray、Dark Gray、Brown、Dark Brown，分享下少少經驗，歡迎巴打補充指正。

上色效率

如果底色係淺色（例如係白色），用Black滲一定係上色效率最高，但由於對比感太強烈，好多人都唔prefer喺白色件上滲黑色，而選用灰色系/啡色系。

但係好遺憾，孖星嘅gray同brown滲線液喺白色件上嘅上色效率真係非常之低，滲完條線勁淡，好似無滲咁。用dark gray同dark brown嘅情況係會好啲，但大前提係一定要搖勻支滲線液。如果冇搖，啲顏料就好似下圖咁沉晒喺樽底，個掃索到出嚟滲嘅，就只係面嗰浸溶劑aka毀天滅地嘅X20

DIY琺瑯滲線液

雖然我唔覺得dark gray、dark brown特別難買，但久唔久都見有巴打話搵唔到，咁搵唔到可以點搞呢？其中一個做法就係自己溝，買支XF1、XF2同埋毀天滅地嘅X20琺瑯開油水，就幾深幾濃嘅灰色滲線液都溝到出嚟喇

抹滲線工具

咁滲出界用咩溶劑抹好呢？可以參考頭po “X20爆膠問題”，裡面有比較唔同溶劑嘅優缺點。

至於用咩工具，最簡單就係棉花棒，但一般藥房買嘅棉花棒其實幾易甩毛，同埋個棉頭都幾大，操作上未必咁得心應手。想好用啲嘅可以買模型專用嘅棉花棒，會冇咁易甩毛，個頭細啲，同有唔同Shape嘅棉頭揀。

除咗棉花棒，其實仲有呢類海棉頭嘅清潔棒，一來佢無毛可甩、二來亦比較襟用，一般情況下我覺得會好用過模型專用嘅棉花棒，都值得考慮。

其他滲線小貼士


(1) 除非自問滲線技巧高超，否則應避免喺已消光嘅漆面上面滲線，因為已消光嘅漆面一定唔係完全平滑，一旦滲出界，滲線液啲顏料係會滲咗入漆面表面嘅微小凹坑，好難抹得走，搞到抹完都好似一撻撻漬咁。

建議次序：光油>滲線>消光


(2) 點溶劑抹滲線時，唔好點得太過火。點得太多溶劑係有機會將原本坑線入面嘅顏料溶返出嚟。


(3) 抹滲線時，應從外向凹坑方向抹，邊抹邊滾動棉頭，可避免坑線內嘅顏料擴散出嚟。


(4) 棉花棒/海棉頭都係消耗品，雖然海棉頭係襟用啲，但用到咁上下都係要換過個新嘅，個棉頭用到太污糟仲繼續用，就即係一邊抹滲線，但同時又將棉頭啲污漬抹返上嚿件度，只會沒完沒了。


(5) 如果唔係素組滲線，而係會先噴油嘅，建議噴油前先將刻線加深，因為如果條坑線本身就唔深，咁噴完灰噴完油分分鐘條坑線就畀啲油填得七七八八，到時就好難做到滲線。


其他旁門左道

如果噴好晒油，先發覺有條線唔記得事前加深，而條線又真係唔夠深去滲，而咁啱你係想用灰色，咁呢個時候，鉛芯筆幫到你

直接用鉛芯筆喺條線上面描返出嚟，效果其實拍得住用dark gray滲。

呢度其實有啲線係用鉛芯筆補飛嘅，我自己都搵唔返邊條係滲出嚟，邊條係補飛描出嚟。