白色

白色常見既問題黎黎去去都離唔開

噴極都唔係白色

(或者上唔到色)

作為主色之一，好多新手都會小試牛刀買部平平地既高達模型黎試噴，之後問題就黎啦…

點解噴完底灰之後噴個白色噴黎極都係灰色黎?

大家可以放心，你把噴筆無事，同埋你D油、件、泵都無問題，因為呢個係正常既

白色，係模型油之中遮蔽力最廢既一隻色，白色係好容易受底色既影響，用電腦角度黎講就好似你Photoshop 開左一層白色半透明既layer一樣。

噴油唔同你玩小畫家，唔係簡左個白色一click D件就會填滿晒，如果你底灰(底色)係用灰色，你噴白色只會變左灰白色。

你可能會聽其他人講等佢乾左再噴多幾層白就會白D，無錯真係會"白D"，不過只會由灰白色變左更白既灰白色，係唔會變返白色。

噴油係無得夾硬黎，遮蓋力唔夠就係唔夠，有部份新手以為噴唔夠油起勢係件件上面狂噴，最後只會噴到起砂。

咁應該點樣做? 首先要搞返清晰個思路，顏色本身就無絕對既，唔單止白色只不過白色係最明顯咁解。

好似PG RX 78-2 官圖咁

因為顏色係會因應四周既物件對比而有所影響，所以就算因為底灰(底色)而搞到D件變左灰白色其實都無大問題，只要組裝好拍埋其他色就自自然然會覺得件野係白色

所以基本上就唔洗因為噴出黎唔夠白而煩惱

除非你真係好想追純白色

咁可以點做?

1. 原件直接上保護漆

無錯，即係叫你素組白色部份。以白色而言最純既白色莫過於原膠色，原件上消光的確係最易搞既一招(但係留意返膠件色係會比較易變黃)，不過如果你要做無縫執漏就要小心，可能要搵D白色既畢地先得啦。

2. 白件噴白底灰再上白色

本身底灰既目的就係為左統一件既發色等你易D去檢查細節 ，但係如果你白件上白底灰基本上呢個功能就完全廢左...只係單純為左之後果層主白色咬件咬好D，不過我可以保証你咁樣噴出到黎會非常白。但問題係你噴果陣完全係靠估靠感覺，而且過程中你真係睇唔到邊到有噴邊到未噴。

3. 銀底灰上白色

原理上同灰色底灰無乜分別，只係銀色同灰色比上白色會明顯D，而且好處就係只需要將銀色既光澤遮蓋好就表示完全噴好(如果萬一面漆甩左色會透返個銀底仲可以扮舊化)。

4. 灰+白溝底灰上白色

目的係減低灰色個明顯度，又唔影響底灰既作用，不過留意就算一滴灰滴落白色到都係會變灰色。

5. 噴完灰底再噴白底

其實同你主色噴多幾層分別唔大，要留意底灰比一般既油厚身，連續打兩層灰可能會搞到D 件好厚油。

6. 原件上珍珠油

其實呢招最常見就係BANDAI METAL BUILD 系列上面，BANDAI用原件色又唔想太膠就會噴一層珍珠油上去，出到黎感覺上就會更加白，可以講係懶人大法。

7. 灰底之後灰白色＞乾透 > 白色＞乾透 >白色...

一層層慢慢加白零件，出黎既效果係最接近白色，不過要小心控制出油重，一個唔小心就會搞到好厚油 / 起砂。

以上都係base on 原件係白色，如果你想將d件由其他色改做白色只可以用下底灰發色層慢慢去疊，越深色既件要上白色就越困難。

最後，你要記住模型除左拎去會場比賽之外，你睇人地既作品基本上係好少見到"實物"。呢個世代要執相真係太易，區區由灰白調返去白真係話都無咁易，所以真係唔洗咁在意點解人地用同一隻色可以噴到咁白自己唔得啦，模型係自由既。