Eginkizunaren baliabideak
EGITURAK
- Irratsaio hau prestatzeko lexikoa ez da arazo nagusia izango eta, kontzeptuak zailak izan arren, ikasleak garatu nahi duena aukeratuko du. Horrek bidea erraztuko dio, aldez aurretik zerbait ulertzen duelako. Baina ikasleak ereduak behar ditu egitura eta "estilo" egokia hartzeko. Horretarako oso egokia da antzeko irratsaioak entzutea. Hona hemen Elhuyarrek eta EITBk egin dituzten beste batzuk: Zenbat kilometroz marrazten du arkatz batek, Itsaso Beltzean hondoratutako altxor bat, Bizidunik zaharrenak edo Olatuak: surf eta energia. Ikaslearentzat albiste bat ere izan daiteke eredu bat. Adibidez, Euskadi Irratiaren HABEk eskaini zuena: Dronak posta garraiatzeko. Kasu horretan (HABE webgunean ohikoa den bezala) albistearen transkripzioa du eskura ikasleak, eta errazagoa izaten zaio ulertzea.
BITARTEKOAK
- Gizarte Zientzietako eta Naturaren Zientzietako liburu batzuek testu laburrak dituzte, ikasleek erabil ditzaten. Liburu horietan gai askori buruzko bitxikeriak irakur ditzakegu, besteak beste giza gorputzari buruzkoak, landarei, espaziori buruzkoak eta bestelako gairi buruzkoak. Hala nola, Galde erantzunen liburua, Giza gorputzari buruz jakin beharko zenituzkeen 101 gauza edo Giza gorputzari buruzko 1001 galdera-erantzunen liburua. Duela gutxi Ttartalo argitaletxeak bilduma bat argitaratu du: 100 kontu ondo ezagutzeko zientzia, 100 kontu ondo ezagutzeko janaria eta 100 kontu ondo ezagutzeko giza gorputza. Testu luzeegiak eduki arren, testu-liburuek ere aukera ematen diote ikasleari datu interesgarriak aurkitzeko eta adierazteko. Gizakiaren bost zentzumenei buruzko atari hau ere erabilgarria da.