Embedded Files
BENNARZU
Totu ammuntada ‘e nie
Drómmidi sa Natura
In s’adde e in sa montagna
Totu ammuntada ‘e nie…..
Tenzo fritu e amargura
In su coro e in s’intragna
Cando no bido a tie!
FREALZU
De frealzu muilat su ‘entu
Cun boghe lamentosa
L’intendo in sa ventana.
De frealrzu muilat su ‘entu…
Ca ammentat dogni cosa
Sa Sardigna lontana
Su coro no at assentu.
MARTU
Tebias arias de mare
Iscazan-a su nie
In sa chima ‘e su monte.
Tebias arias de mare…
So isetande sa die:
In sinu tou sa fronte
Cando l’apo a pasare?
ABRILE
Sos montes e sos rios,
Sas prantas e sas feras
Cantan mutos de amore.
Sos montes e sos rios…
Sa dulche primmavera
De ilgerru a sos rigores
At dadu sos adios.
MAGIU
Ca gai a Deus piaghet
De Magiu in sos tebiores
S’isparghen sos froritos.
Ca gai a Deus piaghet…
Si agatas beru amore
Síghe-nde sos inditos
E su chi cheres faghe!
LAMPADAS
Dae Monte Ruinas
Bella vista godimos:
S’adde cun sas olias.
Dae Monte Ruinas…
Ca Tue ses sa Reina
De dogni lateria
Sicagna no timimos!
TRIULAS
Su pruine de s’alzola
Samunait s’iscanesu
De Todolo in costera.
Su pruine de s’alzola…
Ses gentile e sintzera,
De su coro su pesu
M’illebias tue sola!
AUSTU
Chircat dogni pessone
In sos friscos umbragos
A su caldu disaogu.
Chircat dogni pessone…
A malos intragnados
Chi cheren ponner fogu
Chent’annos de presone!
CABIDANNI
Cun caddos curridores
Zovanos faghen proas
De Reos in su Montrigu.
Cun caddos curridores…
Bellas pitzinnas noas
In costumene antigu
Mandan fritzas de amore.
SANTU AÍNE
Ohi, ite tempos feos!
Totu andan a istudiare
E su tribagliu iscrinzan!
Ohi, ite tempos feos…
Totu a binnennare
Ca est isetande sa ‘inza,
Ajó pitzocor meos!
SANT’ANDRIA
In s’aria grisa ‘olat
Su puzone andantanu
E fragu de ‘inu nou.
In s’aria grisa ‘olat…
Cun su produtu sou
S’abitador’e Iscanu
Sant’Andria lu consolat.
NADALE
In sa gruta naschinde
Gesus, de Totu Mere,
S’est de Totu ispozadu.
In sa gruta naschinde…
A chie cheret podere
Issu s’esempiu at dadu
Sos poberos servinde.
(muttos de Toto Cappai. 2005)
Page updated
Google Sites
Report abuse