SU CANE 'EZZU E I SU MAZZONE

SU CANE ‘EZZU E I SU MAZZONE

13 Luglio 2009

Na chi una ‘olta unu pastore teniat unu cane ‘ezzu. Bezzu meda meda.

- ite nde fatto de cust'animale? - narait - comente cane ‘e gualdia non balet prusu e deo non tenzo gana de lu campare de badas -.

E gasie na chi li haiat presu duas lamas bezzas a sa coa e che l'haiat ispraggiadu, - pazza cudd'ia tocca!

Ei su cane bene comente podiat cominzat a currere. E gasie si che fuit ispeldidu peri sos montes, e nachi caminaidi ispensu peri sos campos e in sos buscos, solu tristu e malabiottu. Moltu de frittu e de famene. Ma su chi prus li dispiaghiat fuit s'ingratitudine de su mere.

Toccat e una die na chi attopat unu mazzone.

- e a inue ses andande tristu e malabiottu? - li domandat su mazzone.

- e it'atteru poto faghere, Frade meu, si su mere mi c'hat cazzadu? Na chi so ‘ezzu e comente cane de gualdia non balzo prusu, e nissiunu mi dat prus a mandigare - l'haiat ripostu su cane.

- ih da da no ti abbates, l'has a bier chi su mere ti torrat a leare - li haiat rispostu su mazzone .

- pius a prestu bidimos de cumbinare calchi cosa... ducas faghemi pensare...mmmm. Ecco

si podet fagher goi e gai... pspspsps - na chi haiat nadu a s'iscusia su mazzone in s'origa de su cane, orettande chi non l'essere bidu nissiunu...

A passadu tempus...

iscurtade it' haiant ordinazadu...

Fuit giustu su tempus de messare, e i su mere na chi fuit andadu a su laore. Cun issu bi fuit sa muzere e i su fizzigheddu. Sa muzzere nachi hait lassadu su pizzinnu in d'un'ale ‘e muru, in s'umbra, sutta un'albure manna de cherchu po poder azzuare su maridu a messare su trigu.

Su mazzone e i su cane orettain dae addane. E a unu zertu puntu, singundu comente haian cuncordadu cun su cane, na chi haiat fattu unu brinchie, e lestru lestru, in mancu de cantu lu so nande, na chi affigat su pizzinnu a mossu e partit a fua a cara a su buscu. Sa mama cominzat a boghes a ticchierriare azzudu e i su maridu abboghinande a caru a su mazzone cominzat a li correre fattu. Ma su mazzone no fuit prus in logu. De su mazzone no si bidiat mancu sa coa. Isparidu in su buscu.

Sa mama dae su disisperu pariat chi s'inde tirait sos chirrizzos, si daiat a sas arias. Su babbu sighiat a currerer fattu de su mazzone abboghinande: a lu lassas su pizzinnu?! Ma po cantu sa mama si disiperait e i s babbu chialcait a pedra istovocada, de su pizzinnu non si bidiat sinnu e de su mazzone mancu arrasta.

Tott'in d'una ecco chi cumparit su cane a orulos malos e cominzat a currere fattu de su mazzone finzas chi li sighit. Li leat su pizzinnu e che lu ponet in pes de su mere e de sa muzere. Sa mama lestra si lu leat a pala e si l'apprensat tottu, pranghinde de allegria.

Su mere abbaidande su cane nachi si fuit fattu piticu piticu e na chi fuit adduradu isfaltadu fattu dae sa brigonza po che haer cazzadu unu cane asi fidele. Leat sa bertula, nde ogat su cunizzolu, e dat una perra de tacchinu e unu prammu de sardizza a su cane.

E, a su sero, cando haiant bogadu de cabu, si che leat su cane a domo.

Imbattidos a domo narat a sa nuzzere:

- tocca, coghe una padedda de macarrones e cundilos bene cun casu friscu e ghisadu!

Cando sa muzere haiat cottu sos maccarrones, su mere si sezzid' a mesa, e a costazos sou faghet accolziare su cane, e li ponet unu bellu piattu de maccarrones. Dae cussa die a su cane na chi no li est mancadu mai ite ‘e pappare.

E nd'enit su tempus de carrasegare ei sa fizza manna de su mere na chi si tepiat cogiare. Su cane assora hait pensadu chi fuit arrivadu su tempus de torrrare su piaghere a su mazzone. Nachi fuit andadu a su buscu e li haiat nadu:

- Dominiga sero cala a bidda e faghedi agattare in su cortile de domo ca ti fatto intrare. Bi tenimos festa, beni ca has a tenner sa parte tua.

Benit sa dominiga ei su mazzone ecco chi attopat a domo. Su cane lu faghet ‘intrare ma li narat a s'iscusia se de si cuare sutta ‘e sa mesa po' chi non l'esseren bidu sos invitados. Biat unu pagu de buggiu ei sos istranzos non si tian accatare de nudda. Su cane leat unu trozzu de petta arristida e unu fiascu de inu nieddu e che l'imbolat sutta 'e sa mesa. Sos invitatos l'han bidu e luego si ponent a che giagarare su cane, ma su mere na chi haiat nadu:

- lassedelu istare! Su chi hat fattu custu animale pro me no b'hat paga chi lu paghet!

E gasie su mazzone na chi haiat tentu ite pappare e ite buffare in cantidade, finzas chi na chi hait cominzadu a s'intendere un pagu allegregrittu.

- Bene, como cantamos una battorina, - nachi haiat nadu a su mazzone.

- No, po' caridade, frade meu. No est chi sies tantu ‘onu a cantare. Tocca lè, ti dao un'atter'utticcu de inu - li narat su cane chilcande de lu cumbinchere a non cantare. Su mazzone ciappat su fiascu e via... buffat. A pustis de pag'ora torrat a narret a limba lada:

- ma deo scherzo cantare, no agguanto piusu!

- No no, no mi fettas custu, - na chi li haiat nadu su cane - ca si no la finimos male.

Ma su mazzone che fuit bellu e cottu e no intendet a lassa e cominzat a cantare e a urulare... auuuuuuuu auuuuuuuu

Sos invitados, isprammados, cominzant a currere chie a una parte chie a s'attera. Sos omines leant fustes e fulcones po che giagarare su mazzone, ma su cane luego si ponet immesu a difendere s'amigu. Su mere assora nachi hait nadu:

- no no abbarrade frimmos. No arropedes su mazzone ca podides ferrer su cane. Abbarrade chietos, za bi hat a pensare su cane a che lu cazzare.

Su cane na chi hait fattu a modu de che ‘ogare su mazzone e na chi l'haiat nadu:

- ecco, frade meu, tue m'has fattu unu piaghere mannu e deo ti l'happo torradu.-

Con cussu nachi sos duos animale si fuint dispedidos.

Su mere na chi hait nadu a sos istranzos:

- ite bos haia nadu? Hazis bidu chi su cane c'hat cazzau su mazzone? Hat essere bezzu ma non timet nudda, mancu su mazzone.

E dae assora su cane na chi fuit bistadu bene, accudidu chi mezzus de gai non podiat essere po tottus sos annos cantu fuit duradu se mere.

A mie m'han cumbidadu unu chiliru de inu chi mi ch'est ruttu tottu in caminu. A comare mia inveces una cicchera 'e gaffè chi chel'est ruttu tottu in su pè.

(da una paristoria de s'Ucraina)