Mae i ymarfer corff fanteision corfforol a meddyliol ac mae'n llawer haws nag y byddech yn tybio, yn enwedig os yw'n dod yn rhan o'ch trefn ddyddiol

Er mwyn cadw'n iach, dylech geisio bod yn actif bob dydd a cheisio gwneud o leiaf 30 munud o weithgareddau corfforol amrywiol. I'r rhan fwyaf o bobl, y ffordd orau o wneud hyn yw drwy wneud gweithgarwch corfforol yn rhan o fywyd bob dydd, e.e. drwy gerdded neu feicio yn hytrach na defnyddio'r car. Gorau po fwyaf y byddwch yn ei wneud, a bydd cymryd rhan mewn chwaraeon a sesiynau ymarfer corff yn eich gwneud yn iachach.

Er mwyn i unrhyw weithgaredd wella eich iechyd, mae angen i chi symud yn ddigon cyflym i godi cyfradd curiad y galon, i anadlu'n gynt ac i deimlo'n gynhesach. Gelwir y lefel ymdrech hon yn weithgaredd dwysedd cymedrol. Os ydych yn gweithio ar lefel dwysedd cymedrol dylech dal allu siarad ond ni ddylech allu canu geiriau cân.

Dengys tystiolaeth bod ymddygiad llonydd, fel eistedd neu orwedd am gyfnodau hir yn niweidiol i'n hiechyd. Yn ogystal â cheisio gwneud mwy o ymarfer corff, dylech geisio lleihau'r amser y byddwch chi a'ch teulu'n ei dreulio ar eich eistedd. Mae enghreifftiau cyffredin o ymddygiad llonydd yn cynnwys gwylio'r teledu, defnyddio cyfrifiadur, defnyddio'r car i fynd ar siwrnai fer, ac eistedd i ddarllen, siarad neu wrando ar gerddoriaeth. Credir bod y math hwn o ymddygiad yn eich gwneud yn fwy tebygol o ddioddef clefydau cronig fel clefyd y galon, strôc a diabetes math 2. Rydych hefyd yn fwy tebygol o fagu pwysau a mynd yn ordew.