DO 13 ao 17

Resumo semanal

Esta semana desenvolvéronse actividades centradas na aprendizaxe a través da reflexión, o traballo por proxectos e a integración de diversos contidos curriculares.

No espazo da asemblea, repasáronse cantigas aprendidas no trimestre anterior, incluíndo as que serán interpretadas no “Patio da Charca” xunto con outras aulas e familias. Tamén se abordaron dinámicas relacionadas coa poesía, como a análise dunha poesía de Rosalía de Castro (Xan) e a interpretación visual de imaxes de Chema Madoz. Ademais, introduciuse a nova dinámica da "Asemblea de temas", onde o alumnado expuxo cuestións relacionadas coa xestión da clase e o recreo.

En matemáticas, continuouse traballando en estratexias de cálculo, incluíndo a técnica do "tiburón", series descendentes, dobres, e a resolución de problemas do tipo "QUINZET", explorando conceptos como o de ducia e situacións da vida cotiá con operacións básicas. Avanzouse tamén nos trucos de "matemaxia", reforzando o cálculo mental e a creatividade.

Dentro do Club de Lectura, progresouse na lectura de Alma e corazón de Ledicia Costas. Léronse fragmentos do primeiro e segundo capítulo, analizáronse os personaxes e a trama, e realizouse unha actividade de escrita creativa titulada "Que cousas cambiarías se mudaras de planeta?". Ademais, o alumnado deseñou a portada dun material complementario vinculado ao libro.

En relación co PDI, centrámonos na formulación e busca de información sobre o tema elixido: a Patagonia. Investigouse mediante palabras clave, seleccionouse información relevante e avanzouse na redacción dun documento compartido. Paralelamente, a proposta inicial sobre xogos en América tratouse no "Recanto de proxectos", un espazo específico da aula.

Os "recantos de aula" tamén tiveron un papel destacado, adicando tempo ao avance e consolidación das tarefas propostas en diferentes áreas. Finalmente, na biblioteca realizouse o servizo de préstamo de libros, lectura libre e o peche das preguntas vinculadas ao proxecto, integrando aprendizaxes nun ambiente de investigación e lectura.

Pechouse a semana cun debate sobre unha noticia de actualidade relacionada cos parques naturais, onde se exploraron conceptos ambientais en diálogo coa realidade próxima do alumnado.