Do 10 ao 16 xaneiro

Ao longo desta semana a asemblea inicial serviunos como punto de partida para achegarnos a unha noticia que espertou grande interese no grupo: o chamado “gran acontecemento do século”, o eclipse total de sol que se poderá observar en Galicia o vindeiro 12 de agosto. A lectura da noticia deu pé a analizar vocabulario, expresións e conceptos que resultaban novidosos para o alumnado, xurdindo numerosas preguntas relacionadas coa importancia deste tipo de fenómenos, coa súa frecuencia e cos longos períodos de tempo nos que teñen lugar. Para favorecer a comprensión, aproveitamos material didáctico da aula e realizamos unha pequena simulación sobre como se produce un eclipse solar, o que axudou a facer máis visual e significativa a explicación.

Durante estes días presentamos tamén ao alumnado un novo método de traballo para afondar no ámbito gramatical e sintáctico: o método SINTAXE, creado por profesorado galego e que comezamos a empregar con especial ilusión por formar parte dos primeiros centros de Galicia en incorporalo ás aulas. O achegamento inicial realizouse a través das figuras que representan distintas categorías gramaticais, permitindo ao alumnado observar, comparar e deducir funcións a partir da forma e das características de cada unha delas. Comezamos co determinante e o nome común e, posteriormente, incorporamos o nome propio, traballando as semellanzas e diferenzas entre estas categorías, fundamentais para a súa correcta identificación e uso.

No ámbito matemático iniciamos unha nova dinámica de cálculo mental centrada na rapidez e na eficacia. O alumnado dispón dun tempo limitado para resolver operacións, o que favorece a axilidade, a concentración e a seguridade no cálculo. Ao longo da semana foise percibindo unha mellora progresiva na xestión do tempo e na precisión das respostas. Paralelamente, retomamos estratexias de cálculo xa coñecidas co obxectivo de asentalas, facendo especial fincapé na resolución de sumas con números decimais. A dinámica de cálculo rápido ampliouse tamén ás operacións de resta, partindo previamente dun pequeno recordatorio colectivo das estratexias que xa coñecemos e empregamos habitualmente.

Continuamos igualmente co traballo sistemático de acentuación, introducindo pequenas actividades de ditado que permiten integrar o uso correcto dos acentos na escrita directa, reforzando así o aprendido de maneira práctica e funcional.

Nesta semana retomamos tamén o funcionamento dos recantos de aula, explicando novamente o sentido de cada un deles e poñendo especial atención no recanto de proxectos, que nesta ocasión está vinculado ao ámbito xeográfico. Falamos sobre como acceder á información, que fontes empregar e cal é o vocabulario básico necesario para desenvolver este tipo de propostas.

Outro dos momentos destacados foi o peche definitivo da listaxe de centros de interese relacionados co posible proxecto PDI do curso. Tras recoller as propostas do alumnado —entre as que se atopaban a prehistoria en Galicia, a Idade Media e a figura de Exeria, a fauna e flora galegas, a lingua galega e a gastronomía— realizouse unha votación na que, cunha clara maioría, resultou escollido o tema da gastronomía galega. A partir deste acordo común, comezamos xa cos primeiros pasos do proxecto, partindo dos saberes previos do grupo e elaborando unha listaxe inicial de ideas e coñecementos que xa posúen sobre este ámbito.

O xoves foi o día dedicado ao club de lectura. Avanzamos na lectura dos libros O diario de Paul e O diario de Susi, seguindo unha dinámica xa coñecida polo alumnado, que realiza o proceso de lectura e as actividades asociadas de maneira cada vez máis autónoma e fluída. Tras a lectura, aproveitamos para realizar o servizo de préstamo da biblioteca e unha pequena proposta de escrita creativa neste mesmo espazo. O resto do tramo horario destinouse a continuar avanzando nos cinco recantos que temos actualmente en funcionamento.

Finalmente, comezamos a organizar de maneira máis estruturada o traballo do proxecto PDI. O alumnado iniciou a recollida de información previa relacionada coa gastronomía galega e nos vindeiros días iremos concretando centros de interese máis específicos, formulando preguntas de investigación que orientarán as nosas buscas. Cada neno e nena conta xa cunha carpeta individual na que vai recompilando e documentando os aspectos máis destacados deste proceso, favorecendo así a reflexión, a organización da información e o seguimento da súa propia aprendizaxe.