Do 1 ao 5 decembro

Esta semana chegou cunha particularidade importante: Calixto, o conserxe da escola, comezou a colocar a nova tarima de madeira na nosa aula, o que nos obrigou a trasladar temporalmente as clases á biblioteca. Esta reorganización tamén fixo que outras aulas non puideran visitala nestes días. Un pequeno cambio de escenario que vivimos con naturalidade, sabendo que é para unha mellora que desfrutaremos durante todo o curso.

Nas asembleas de lectura de noticias tivemos unha actividade intensa e moi variada. Nacho abriu a semana cunha nova sobre unha medida que afectará aos mariñeiros a partir de xaneiro: a obrigatoriedade de rexistrar nunha aplicación todas as capturas, tanto en mar como en costa. Conversamos sobre para que podería servir esa ferramenta e concluímos que busca controlar o estado das especies da ría, identificar aquelas en perigo e reforzar a importancia das vedas. Bernardo achegou outra noticia sobre avances tecnolóxicos na loita contra incendios: drons que se empregarán en 2026. Falamos sobre as súas posibles funcións e, tras valorar pros e contras, chegamos á conclusión de que probablemente se usarán sobre todo para vixilancia e control dos montes. Mateo Piñeiro compartiu unha noticia deportiva centrada no partido entre o Real Madrid e o Athletic Club, que inevitablemente derivou no debate de sempre entre Madrid e Barça… aínda que non faltaron voces celestes defendendo ao Celta con orgullo. E, para pechar a semana, Enzo trouxo un suceso relacionado co envorco dun autobús escolar, que nos levou a falar da seguridade viaria e da importancia do uso correcto do cinto.

No ámbito lingüístico e matemático seguimos avanzando nas tarefas sistemáticas que acompañan o noso día a día: acentuación, ortografía, cálculo e repaso de operacións básicas. Esta semana introducimos unha nova estratexia para realizar sumas e divisións con números decimais, tomando como referencia situacións reais relacionadas co manexo de cartos. Tamén dedicamos tempo a revisar a división e os repartos entre 3, 4 e 5, ao tempo que continuamos practicando a ortografía visual con palabras que adoitan xerar erros.

Os recantos ocuparon un lugar central. No lingüístico, o alumnado elaborou un texto colectivo describindo e valorando os resultados da enquisa sobre as merendas da escola. No recanto matemático traballamos con coordenadas e xeoplanos, retomando conceptos xa coñecidos pero aplicándoos a novas propostas. No dixital, avanzamos en dinámicas de acentuación e corrección, e no artístico dedicámonos á fase de pintura das creacións de arte abstracto iniciadas a semana pasada. Case todos os equipos remataron os retos, aínda que algunhas tarefas quedarán pendentes para a vindeira semana.

Durante o tempo de lectura, o mestre compartiu un texto sobre os desexos que formulamos para outras persoas. A partir desa idea, elaboramos entre todos un desexo colectivo para os nenos e nenas de Gaza. Xurdiu a pregunta de se sería posible facer chegar esa mensaxe, igual que fixemos o curso pasado coa escola da Patagonia, e o mestre comprometeuse a buscar vías realistas. Ademais, creamos pequenas composicións arredor destes desexos, que converteremos en cilindros decorativos para adornar a árbore dos desexos situada na entrada do colexio.

Ao longo da semana tamén rematamos a gravación do programa especial sobre os Dereitos da Infancia en países en guerra —Gaza, Ucraína e Sudán—, que xa está dispoñible en Radio Coviña. Recuperamos o club de lectura, que a semana anterior non puidera desenvolverse, e gozamos dunha nova sesión con Diario de Susi, diario de Paul, mantendo a dinámica de palabras clave e intercambio de pistas entre grupos. Tamén recibimos como cada semana aos nenos e nenas de 2º de Primaria para os apadriñamentos lectores, un espazo que valoramos moito polas relacións que xera e polo gusto lector que fomenta.

Para pechar a semana celebrouse unha nova “Asemblea de temas”, na que cada neno ou nena pode expoñer cuestións que lle preocupan, situacións vividas ou ideas que quere compartir. O grupo escoita, pensa, propón solucións e contribúe a atopar maneiras de abordar os conflitos de forma serena e construtiva. Ademais, completamos as autoavaliacións individuais e grupais dos obxectivos da semana, facendo balance do camiño percorrido.

En canto aos contextos de aprendizaxe, completamos xa a terceira rotación dos tres equipos formados por alumnado de 3º e 4º. A partir da vindeira semana non haberá nova rotación, xa que coincidiremos cos ensaios das Xaneiras e cos instrumentos que acompañarán esta celebración. Paralelamente, iniciaremos un pequeno proxecto sobre a Prehistoria, tomando como punto de partida a visita recente ao castro Alobre en Vilagarcía. No apartado específico desta bitácora poderase ver un resumo fotográfico dos contextos, xunto con algún dos produtos finais elaborados na nosa emisora escolar.

Para rematar a semana dun xeito especialmente fermoso, queremos agradecerlle a Leire o detalle que tivo cos seus compañeiros e compañeiras: agasallounos cun pequeno adorno de Nadal que fixo ela mesma. A súa iniciativa abriu unha conversa preciosa sobre o significado dos agasallos: é preciso que exista sempre un motivo?, temos que esperar a datas especiais?, ou podemos regalar simplemente porque nos apetece compartir algo bonito con alguén? Chegamos á conclusión de que ás veces os mellores agasallos son os que nacen “porque si”, sen máis razón que o cariño e as ganas de facer sorrir a outra persoa. Grazas, Leire!