Saimol, dou hot mai Kreuz gezwickt,
su sehr !- zu ölln hou iich genickt.
Dä Dokter juckt a Sprützn nai,
marchn soll`s dou besser sai.
An Draak - äs hot noch mehr gepocht.
Dou hot mai gutä Doktä gsocht:
„Geh mol zur Kernspintomomographie!“
Nu, wenn e meit, geh ich halt hie.
Ich kümm dou mit dä Winterjackn nai,
die Fraa, sie stutzt, un ees . zwee ,drai
- ich mouch`s euch bainah gar net gsouch -
stellt sa mich dach mit ganzä Kluft dart auf die Wouch.
In voller Wix ste ich dou auf da Wouch -
sie reißt die Aachn auf, ich hör sa souch,
„sie müsse erst den Chef befragen,
ob die Geräte mich ertragen“.
Die Röhrn, die hätt noch Garantie
un bei zä vill Belastung waa sa hie.
Ich sei recht groß und auch kompakt-
na, vielleicht passe es ja völlig nackt.
„Sie müßt erscht ihren Chef befragen,
ob wol die Röhr mich könnt ertragen.“
Su flitzt sa zu ihr Mäster ab,
ich steh rüm mit Stiefel, Mantl un Kapp.
Dä Dokter socht wol „Ja“ - ( ich bin ja „privat“),
wall sa mich dann wätter gschickt hat.
Ich glotz im Wartezimmer gechn die Wend,
bluaß gut, des mich dou keener kennt.
Jetz liech ich auf dä Pritschn drauf.
Vuar ma die Röahrn! „Beine auf!“
Die Schwester meits ja sicher gut -
ich nam jetz zam mein ganza Mut!
Un wenn ich des kleena Löchla sah,
dann brauch ich mein ganzn Mut fei aa!
Die Füß, die fahren jetz voraus,
danouch kümmt ouer dä ganz Klaus!
Dös Üntera geht noch gut nei,
a die link Händ mit der Klingl dabei,
die Klingl kricht mä in di Händ,
wenns in dä Röhrn välleicht mol brennt.
Nu wärd dä Lääb aigschossn -
dä Sanitätä brummt verdrossn.
Die Wampn mit mein dickn Hemd
hot sich dabei a weng verklemmt.
Un aa am Bauch mai rachte Hend
leistet am Eingang Wiederstend.
Dou drückt är sa mä untern Oarsch
un nai gets jets - dös woasch!
Du kannst dich net gekratz, gezwick,
net am Bauch, net am Genick
und net mol an dä Brust.
Du däfst net ämol hust.
Ich liich dou, wie die Wurscht im Darm,
un fühl mich däbai elend arm,
souch mä: „ Sìs dach nex däbai
innä Värtelstund is ja väbai.“
Ich denk: „Entspsannst da dich a weng.“
Dou machts auf eemoll „peng“!
Dös „tack, tack, tack“, des get ja noch,
dä Boschhammer reißt mich dann hoch,
Hoch? Hoch, naa dös gett ja net!
Denk dä, du bist im Himmelbett
un dä Himmel, da licht auf dä drauf -
dou kannst da a beinah net g`schnauf.
Ich liich dou wi elektrisiert,
wart drauf, wos nu mit mä passiert.
Un widdä geht’s : tack, tack, tick -
ich kriech n Krampf in mein Genick.
Jetz langts - Alarm !!! - ich drück,
karz davoä flötet`s zum Glück:
„Die Untersuchung ist jetzt vorbei,
sie hatten sicher Spaß dabei !“
Draußn souch ich mä kläächlich:
Die Schmerzn warn ja erträchlich,
ouer ihr könnt mä a Million gebarch -
ihr brengt mich nümmer nai dan Sarch!“