Spätsommerstimmung

Spätsommerstimmung

Wenn bai dä Rohrbocher Kerwa

die Dahlien blühn,

die Schützn mit Böllerkrach

durchs Dörfla ziehn,

wenn die Gargn aufm Markt

fast nex mehr kostn,

die Obstbauern im Kelterhaus

die erschtn Öpfl vermostn,

wenn auf die Falder

bluäs Schdupfl noch schtenna,

hie un dou scha

a boar Aröpflfeuer brenna,

wenn mä sich an schwarza

Beerkuchn käfft,

un nouchert mit eener

blaun Guschn rümläfft,

wenn die Schwalm sich haufnsweis

auf die Dre-it draufhoggn,

die Waidräubl scha blitschblaa

zum Ouzupfn loggn,

wenn die Sunn ooms nümmer

su huäch am Himml stett –

dou wesst da,

dess` ball widder aus an annern Fassla gett.