Grub-Krimi

Erlen im Ääla

Eine Erzählung in Grüber Mundart nach einer wahren Begebenheit im Jahr 1947

Die Naida

Klingeling klinghelong - die Gloggn an dä Huälzdür zu dan Krämerloudn schäbberd noch a boar Sekundn nouch.

"Guddn Marchn!"

Die gruäß, dünn Fraa im graua Kostüm am Fansder draad sich bluäs karz rüm un niggd mä zu. Noucherd guggd sa widder zun Fanster naus nais Ääla. Ihra waisn Hoar hodd sa schdreng nouch hindn gäkemmd un zu an Dudd zam gebundn. Daarä Fraa, dä Naida, daaräkhörd daa Loudn.

Ächndlich hässd sa gar ned Naida sondern Hein, nouch ihrn zwaidn Maa, daa aa scha lang gschdorm is. In Gruu souchn die Leud ouer bluäs "Frau Hein", wenn sä sa diregd aablaudern. Ber du is suwiesu kenner mid erra. Die Neida is nämlich a weng wos Bessersch.

Hinder ihrn Buggl muss sa ouer ganz schö vill Schbuäd derdrouch. Die Leud zerraisn sich die Mäuler über dös Gschdrübb bai ihrn Haus dausn Waigardn. Däbai will sa bluäs dan Vüächln dämid wos Guuds duu. Über ihr "Luftbad", an Bredderverschlouch am Südhang gechnüber van Augusdafelsn werd aa jammerlich geduschld. Dou döid sa sich naggerd nai dä Sunn leichn, grinsn mancha hindä vüägähaldner Hend.

Däss sa im Summer jeidn Früh im Bademandl un barbess vom Waigardn nübern Bad löffd un dard edlicha Rundn dreid, finna aa mancha rachd schrullich, annera souch ouer aa: "Reschbegd!"

"Ich fohr jedz wie die Naida," souchn die Kinner manchmol un hoggn sich kerzngroud aufs Fahrroud. Die olbern dou die Naida nouch, wie sa auf ihrn Roud mid "Gsundhaidslenger" hoggd.

Jedz hou ich mich ouä gladd a weng verlaberd - mid darä Naida. Ächndlich bin ich ja zum Aikääfn dou.

"Grüss dich, Kabbo!"

Des Mädla hindern Loudndisch un vuä die hunnerd Schuber, die bainah die ganz Wend bädeggn is des Geichndääl van ihrä Schäffa: Rachd glee un drall, die feuerruädn Loggn henga rä bis über die Axln. "Kabbo" souchn sa bain DeiÄsVau zu mä, weil ich Schbielführer van der Erschdn bin. Die Hilde wäss dös nadürlich, wail sa öfder baim Rose bediend.

Mai Gsechd werd a weng hääser wie sa mich su aaschdrahld mid ihra blaan AAchn un ich main Hahnakamm fäsch Frühschdügg bschdell. Dös Gebägg grichd die Naida vam Saalesbegg aus dä Hüälln. Daa hodd des Besda.

Klingeling klinghelong - die Düär gedd auf un a glees Börschla in karzer Huäsn kümmd rai.

"Fä fünf Pfennich Feuerschdeela!" bladzd er raus.

Dös Grüüsn hodd ä anschainend noch ned gelarnd.

"Hosd duu s ouer ailich, Günder," grinsd na die Väkäuferin aa un huäld aus an grousn Glous a baar Bombom raus.

"Na Günther, du hast doch bestimmt heute wieder noch nichts Rechtes gegessen," mischd sich dou auf eemol die Naida ai.

Sie nümmd aus eener Kaasgloggn an Kühkaas, baggd na in a weng Baggbabier ai un gibbd na dan Jung.

"Dange, Frau Naida!" schdrahld sa dös Kalla aa, schdopfd sich die Bombom in die Huäsndasch un dan Kaas nain Maul.

"Er hat`s nicht leicht, so ohne Mutter."

Die Naida ochd s, guggd auf die Berbndiggluhr an der Wend un draad sich widdä zun Fansta rüm.

Wie dä Günder aus dä Düär renn will schdössd er beinah mid an Maa zamm.

"Dä Ribbndrobb," schießds mä durchn Kuäpf.

Su hodd na dä Renner-Adolf gedaafd, weil mä saina Ribbn durchn Aazuch gsah könnd, hodd er gämeid. Un jämmerlich dörr is ä ja weglich, dä "Ribbndrobb", wie er su in sain ougewedzdn Aazüchla mid dä schwarzn Gravaddn dou schdedd. Dä Dogder Bötticher, su hässd er richdich, kümmd öfdersch midn Zuuch aus Cobarch. Aa is im Landradsamd zuschdändich fä die Nadur. Die Grüber Bauern könna na nedd gelaid, wall aar ihna souch will, welcha Baame sa ned ümmach däffn. Ouä die wengsdn haldn sich draa.

"Schön, dass Sie es einrichten konnten," bägrüssd na die Naida schaisfreundlich und gibd nä die Hend.

"Das ist ja schließlich meine Aufgabe," schlaimd dä Ribbndrobb zärügg,

"Da haben wir ja das Corpus delicti." Zamm mid dä Frau Hein gedd ä zum Fansder un ölla zwää guggn naus als öbb dou wos jammerlich Inderessands zä sahn waa.

"Ou, mai Frühschdüggsbausn is ja rüm, dä Mäsder werd widdä bruäzln."

Wie ich zä Düär naus geh hodd mä die Hilde nouch geguggd - glääb ich.

Die Versammlung

Dä Saal van Rose is gärabbd vuäll.

"Däss es überhaubds noch su vill Manner in Gruu gibd, nouch dan Schaisgriech," schießd s mä nain Kuäpf.

"Nu ja, es senn aa edlicha Flüchdling dou. Ganz hindn ham sa an ganzn Diisch zam gebrachd."

Die Hilde brengd grad a ganz Dabledd mid Meidwurschdsammln hie. Die schaina sa za müächn. Vällaichd hod da Rose ja aa a exdra Zehla Knoublauch nai.

Iich sidz auf dä Bühna am Vüäschdandsdiisch. Als Schbielführer ham sa mich däzu aigäloudn. Naabä mä sidzd mai Schef, Fabrigbsidzer un erschds Ehrnmidglied, dä Vüäschdand un Bürchermester Alwin, dä Schrifdführer un Gämeediener Karl un dä Kassier und Raiffeisnaagschdellder Franz.

"Wenn ölla wos za drinkn ham," fengd da Vuärschdand aa, "dou drink mä mo auf an harmonischn Välauf unnerer Haubdversammlung."

Die Bädienung bäaild sich, die Ledzdn noch mid Bier zä versorchn un scha bläägds aus hunnerd Goschn "Brosd!"

Dä Vüäschdand begrüssd namendlich des Ehrnmidglied, in Pfarrer, in Abodeiger, daa aichndlich bluäs a Hannlsmaa fä Kräuderla un Schnabs is, un in Blatzward. Daa hoggd am Aigang un hod aufgebassd, däss jeider in dä Anwesenhaidslisdn undäschraibd.

Noucherd werd des Brodokoll välasn. Dä Gämeediener alias Brodokolland fengd aa, waa des ledzda moll ölles dou war - vam Ehrnmidglied bis zän Linienrichdä - des sai ledzds Brodokoll eeschdimmich genehmichd warn is, ...

Ich gugg su lang a weng dä Hilde zu, wie sa su flott durch die Bengraia fäächd.

"Wenn sich die na bluäs haid nachd kenna Blousn geloffn hod," deng ich bai mä.

Dös Brodokoll is middlerweile bei Bunkt fuchza: "Vorkommnisse beim letzten Spieltag".

Jedz werd s inderessand.

Dä Vuäschdand underbrichd dan Vuadrouch un bedankd sich beim Ehrnmidglied fä die Moußä, die ä auf die Diisch loss schdell hod. "Brosd Walder, auf dai Wohl!" Am Schleisierdiisch hod dä Schbindler, dan sa aa "Freimäurer" schimbfn, aus sainer midgebrachdn Flaschn zän driddn Moll van sain Salbergebrenndn nouchgschengd un die Flüchdling fanga langsam aa, sich mid die Ainheemischn zä verbrüdern. "Freimäerer" souchn sa übrichns zun Schbindler, weil ä beim Böidsch als Mäuerer arbed un am Wochnend schwarz dös eena oder annera Mäuerla huäch ziehd.

Dä Brodokolland hod widder dös Word.

Vam ledzdn Juchnddurnier fengd ä grad aa. Dou war ich aa dabai, auf dä Reudwiesn, als Bädreuer.

"Kail noch ämoll, dös wa vällaichd a Aufführung!"

Dä Karl hodd mä vuä dä Sidzung gäzaichd khoud, wos ä nais Brodokoll gschriem hod: "Quer über den Platz kam mitten während des Spiels eine weibliche Xanthippe gestürmt. `Sofort aufhören`und `Wo ist der Vorstand`brüllte sie. Nur dem beherzten Eingreifen einiger Betreuer war es zu verdanken, dass es nicht zu Handgreiflichkeiten kam. Für den Preis von zwei Zentner Heu ließ sich die Verpächterin schließlich umstimmen und zog triumphierend davon."

"Jedz wäss ich aa, warüm die Gämeewiesn scha zum zwaidn Moll gemahd warn is."

"Liebe Midglieder, ihr saahd: Äs is ke Zuschdand mehr midn Schbordblatz auf dä Reudwiesn," meid dä Vuäschdand, bedankd sich beim Karl für dös hervorrachenda Brodokoll un kümmd zum wichdichsdn Dääl dä Sidzung.

"Die Vuäschdandschafd hod die Iniziadievn ergriffn un hod an Bauandraach fä an neun Schbordbladz bain Landradsamd aigäraichd. Villn Dank an unnern Vereinswird, daa sai Grundschdügg hinder der Werdschafd zä Verfüchung schdelld."

"Brammo!" un "Auf n Werd!" bläägn a boar un a allgämainer Umdrunk folchd.

"Laider gibds dou ouer grössera Broblemä," ergreufd dä Alwin widdä des Word.

"Ihr wissd ja, dess dä Bouch durch die Wiesn gedd un edlicha gruäßa Erln dard schdenn. Un die, mä mouchs bal ned gäglääb - die schdenn undä Nadurschudz. Un - jedz kümmd s," dä Vuaschdand machd s schbannend, "un döswaacher hod die Nachbära in Bauandraach ned underschriem - un wos noch schlimmer is, aa gleich dös Landradsamd aigschald!"

Die Embörung im Saal is kaum zä beschraim.

"Die ald Gragg!"

"Die soll dausn Waigardn blaib!"

"Wos is wichdicher: A boar grübblicha Baamä odder a Schbordbladz?"

Äs dauerd edlicha Minudn, bis sich dä Saal widder einichermaßn beruhichd.

Grad will dä Vuäschdand widdä wos souch, dou bladzd s aus n Adolf raus. Dä Adolf is woll daa mid dä laudsdn Schdimm im ganzn Durf.

"Mir machn die Dinger üm! Wenn sa moll dard liechn, schdelld sa kenner mehr auf!"

Su vill Zuschdimmung hod dä Adolf woll in sain Laam noch ned grichd.

Dä Saal kochd!

"Jawoll, ümgemachd warn sa!"

"Gemmä glaich nübä!"

Edlicha schbringa van ihra Schdüll auf, ölles brülld durchananner un es siehd bainah su aus, als öb dä ganz Saal naus rennd un die Erln mid bluäßa Hend ümschmaiß will.

Die Dischgloggn vam Vuäschdand brauchd lang, bis widder ainichermaßn Ruh is.

Dou mald sich da Abodeiger, a glees Mannla mid eener Gladzn, üm die ä saina drai Hoar a boar moll gewiggld hod.

"Liebe Sporfreunde," fengd ä a weng zaachhafd aa, "wir können doch nicht einfach ohne Genehmigung ..."

Wos ä wädder sochd, väschdedd ma ned.

"Vä wos brauch mä a Gänehmichung! Die warn ümgämachd!"

Die Schdimmung im Saal is aindeutich geichern Abodeiger.

Ouer - "su vill Kuraasch heid ich na gor ned zugedraud."

Wie s a weng ruhicher warn is, brobierd er s noch ämoll:

"Vielleicht könnte man ja noch einmal mit dem Herrn Dr. Bötticher sprechen und zu einem Kompromiss ..."

Widdä kümmd er ned zä End.

Dä Adolf hod Blud gälaggd un läffd zu sainer Hochform auf.

"Pfeuf auf an Kombromiss! Soll mä vällaichd die Wibfl ousaach un nouchä über die Schdarzl schbill?" brülld er.

"Dou bräuchd mä baim Fraischduäs ke Mauer mehr zä machn!" gehd a Schdimm am annern Saalend drauf ai.

Gelächder, un widder schraid ölles durchananner.

Dä Vuäschdand glingeld un glingeld vägaams.

Nouchä wess ä sich ned annersch za halfn.

"A halba Schdund Brunsbausn!" brülld ä in des Durchananner.

Äs is lang nouch zwölfa, wie ich mich aufn Heemwaach mach. Dä Schleisierdiisch wa scha erra väwaisd. Die Flaschn midn "Schlibo" war schains laar un Gald fä a grössera Zech ham die Flüchdling genausu weng wie iich.

"Wos is haid aichndlich raus kumma?"

Auf Vuäschlouch vam Ehrmidglied is bschlossn warn, däss die Vuäschdandschafd, beaufdraachd wärd "alles Weitere in die Wege zu leiten."

Dä Androuch is eeschdimmich aagemumma warn.

Zägoar dä Abodeiger war däfür.

Die Vorstandssitzung (nichtöffentlich)

... ... ...

"Mach mä mai Saach fai ned schdumpf!" brummld dä Siechfried un gibd mä die Ziehsaach, die ä aus sain Schdaal ghuäld hodd.

"Wos willsdn aichndlich dämid?"

"Mir wölln a boar Dörra ümmach."

Su ganz schaind ä mä dös ned zä glääm.

"Jedz, im Juli? Suwos machd mä dach im Windä!"

Douhod ä ja ned unrachd, dä Siechfried.

"Dou semma ned däzu kumma."

Dä Siechfried buärd wädda - öb ä wos wäss?

"Wos habd ä denn bschlossn, in eurer Vuäschdandssitzung?" will ä wiss.

"Dös däff ich dä ned souch, die Sidzung wa `nichtöffentlich`"

"Nu kumm fai, ich bin schliislich aa im Dei-Äs-Vau!" buärd ä wädder.

"Naa, gedd nedd, mir ham ölla gschwuän, neggs zä souchn."

Bain Siechfried reicht sich anschainend sai Bauernschläu un a brobierd s annersch rüm: "Weivill ward ä denn?"

"Elf," su vill kann ich nä ja woll värroud."

"Ouä ihr said dach äächndlich zwölf im Vuaschdand?"

Daa Kall gibd ke Ruh!

"Dä Abodeiger hod wos annersch zä dun khoud," rudschd mäs raus.

Väfliggsd, hou ich dou jedz zä vill gsochd?

Ich saah zu, däss ich mid dä Saach fard kumm.

Eine (unberechtigte) Anschuldigung

Klingeling kelong -

"Ihr Väbrächä!"

Ich kumm gar ned däzu, "guddn Marchn" zä wünschn.

"Ihr elendn Grübbl!"

Dunnäwadder, su hod mich scha lang kennä mehr aagschrien.

"Aigschberrd khörd ar!" brülld mich die Hilde aa.

"Au waia, mid darä hou ich`s väschissn," fährd mäs durchn Kuäpf un ich glääb dess ich a jammerlich bedröbblds Gsechd dazu mach.

"Wos hosd da ...," sdodder ich un brobier möichlichsd unschuldich auszäsahn.

"Dou! Gugg dä sa aa, die Sauerai!"

Dös Määdla, wos bis jedz aichndlich ümmer rachd lusdich dähaa kumma is un aa scha mol an Schbaaß verschdanna hodd, baggd mich bainah brudal an main Arm un zerrd mich zum Fanster.

Dausn liechn sa, die ümgämachdn Erln. Greuz un quar übern Bouch liechn die Baama überanannä, die Esd inannaner väkaild.

"Dess dou haid nachd nex bassierd is, wie mä - ich mei sa - die Dinger ümgeleichd ham!" schießd`s mä durchn Kuäpf.

Dä Hilde geichnüber brobier ich mich dumm zä schdelln:

"Dunnerwadder!" schdaun ich a weng überdriem un gugg main Schwarm däbai lieber ned aa, "Wos is denn dou bassierd?"

Zär Andword fuchdld sa mä mid ihrer Fausd vurn Gsechd rüm.

"Die werd mä dach amend ned noch eena schmiern?"

Vürsichdshalber hiäb ich scha ma maina Händ a weng höier.

"Schdell dich ned dümmer wie da bisd!" fauchd sa mich aa.

Mir schießd urblödzlich die"Xanthippe" durchn Kuäpf, dös Wuärd ausm Brodokoll, wu dä ganz Saal gelachd hod. Ouer zän Lachn wa mä im Momend aichndlich ned su zämud.

Die Hilde sochd mär`s nämlich aufn Kuäpf zu:

"Ich wäss genau, däss du aa däbai warsd! Ouer ihr wadd scha sahn! Die Frau Hein hod haid früh bainah an Herzkaschber grichd, su hodd sa sich aufgereichd. Zwee Dassn van ihrn Baldriandei hou ich ärra müss mach. Nouchä hodd sa die Bolizai in Graaledz aagerufn un dä Schandarm war scha dou, genau wie dä Dr. Bötticher. `Diese Freveltat verlangt nach einer harten Strafe,`hod dä Ribbndrobb gsochd un dä Schandarm hod na Rachd gaam. Nouchn Frühschdügg sen sa zamm nauf da Gemeeschdumm un wölln midn Bürchermäsder a Brodokoll aufnam, ham sa gsochd."

A wengla mulmich wärd mäs nu scha.

"Ouer dä Bürchermesder is ja schließlich aa Vüäschdand - daa werd die Sach scha reichln - odder nedd?"

Die Hilde is frailich annere Meenung, aa wenn ihr erschder Brass värraachd is.

"Ihr wadd scha saan!" sochd sa widder "Dä Frau Hein gedds goa nedd gud. Die hod sich zägoar hie müss leich. Un wenn sa euch noch waacher Körberverledzung un seelischer Grausamkaid aazäächd kummd ä nain Kiddchen. Su a boar Nachd im Knasd döidn dä goa ned schoudn!"

Klingeling kelong, die Düägloggn kümmd mä vüä wie a Schiggsalsgloggn.

"Hodd mai Schdündla jedz gschlouchn?"

Mai Frühschdüggsschnaggn van Saalesbegg schmeggd haid ärchndwie ned su richdich. "Dä Begg muss zä vill Salz däwüschd hou."

Das Tribunal

Ich hou kaum mid mainä Arbedd aagfanga, dou kümmd aa scha die Segredärin vam Schef gerennd.

" Du sollsd glaich mol nauf dä Gämeeschdumm, die Bolizai will wos van dä!"

"Schrai dach noch lauder, dess`s jaa ölla hörn, du dumma Kuh!" möchd ich gsouch un griich an ruädn Kuäpf, wie ich sah, däss mich die Arbeddskolleichn rings rüm aaglodzn. A boar feixn mich groud naus aa.

"Öb die woll ölla scha Bschaid wissn?"

"Du wässd van nex un heldsd dai Maul!"

Dä Bürchermäsder schdedd auf dä üäbeschdn Schdufn vam Millichhäusla, wuu uäm din die Gemee is.

"Noch ham sa nex raus grichd," wischberd ä mä väschwörerisch zu, "die wissn nedd, waas wa, s´hamm ölla dichd khaldn. Ouä namm die Sach ernsd! Ned wie dä Adolf, daa Debb. Sochd daa dach zu dan Schandarm, aa wenn ä däbai gewasn waa, heid ä nedd könn gsah, waa am annern End van dä Ziehsaach gschdanna hodd, walls gesdern nachd su schdoggfinsder war.

Ich hou zä dunn khoud, dess sich dös Rindvieh nedd noch merra verbabbld."

In dä Gameeschdumm sidzd dä Schandarm in sainer grüna Uniform, sai grüna Kabb lichd aufn groäsn Diisch dävuä. Dänaber dä Ribbndrobb, kerzngroud un dörr wie a Bannaschdaggn. Dä Grüühous, dös is dä Schbidznaama van dan Bolizisd, is a schdemmicher Maa mid ruäda Bausbaggn. Sain Schbitznaama hod er väbassd grichd wacher sainer grüna Uniform un weil ä mid Nouchnaama "Hoss" hässd.

Ar hodd a Blöggla vuä sich liichn un schnauzd mich groud raus aa:

"Am besten, du gibst gleich zu, dass du auch dabei warst , da ersparn wir uns ne Menge Arbeit!"

"Wos is denn nai dan gfoahrn?" deng ich bai mä, "ke `guten Morgen`, ned `nu, wie gehts" obwohl miä uns dach vam Fussball kenna. Dan muss dä Ribbndrobb aufghedzd hou odder ar will sich vuän `Herrn Dogdä`gruäß du."

Wie mä`s dä Bürchermäsder gsochd hodd schdell ich mich dumm.

"Dabai? Bai wos dabai?" freich ich un sedz mai unschuldichsd Gsechd auf.

Dä Ribbndrobb mischd sich ai:

"Bei der widerrechtlichen und frevelhaften Fällung der acht mächtigen Erlen!"

"Wella Erl?" spill ich wädder in Unschuldichn.

Äs Gsechd vam Grühous verred, dess er scha jammerlich genervd is.

"Du wirst mir wahrscheinlich gleich erzählen, dass du gestern bis spät in die Nacht beim Rose zum Kartenspielen warst, genau wie die acht andern Verdächtigen vor dir."

Woa dös jedz a Wink mid n Zaunpfahl?

"Genau su warsch, Herr Schandarm!" souch ich beherzd un dös war ja aa fasd ke Lüüch.

"Und später sind Sie mit ihren Komplizen zum Bachufer geeilt und haben die Säge an die armen Bäume angelegt!" bäschuldichd mich dä Ribbndrobb und fuchdld mä mid sain dörrn Fingä vuä dä Nousn rümm.

"Naanaa, Herr Dogdä, ich hou ja schließlich haid früh müss arbed, dou brauch mä scha a weng Schlouf."

Dou hou ich widdä ke Lüüch gsochd, ich hou haid früh bainah nedd aus die Aachn khönn geglodz.

"Du hast also geschlafen," schdelld dä Schandarm fesd.

Ich hou geniggd, muss ja nedd souch, dess`s bluäs a knabba Schdund war.

"Dös deggd sich ja gänau mid dä Aussouch van die annern, döid ich souchn," mischd sich dä Bürchermäsda ai, daa hindä mä auf an Bängla khoggd hod.

Dä Ribbndrobb guggd archerlich zu na hii, lahnd sich zun Grühous nüber un wischberd na wos nain Uär. Mä siehd na aa, däss ä mid dä ganzn Vähandlung überhaubd nedd zäfriedn is. Ouä dä Schandarm zuggd bluäs mid die Agsln un bruäzld wos vuä sich hie.

"Was soll man machen?" oddä su ähnlich hodd ä woll gäandward.

Nouchä nümmd ä an Babiäwüüsch aus sainä Mabbn un fengd aa, na auszäfülln. Däbai lessd ä sich jammerlich Zaid un guggd kemol zu mä haa.

"Dös soll woll mai Schdrouf sai," deng ich mä un rudsch unruhich auf main Huäsnbuädn hie a haa.

Ohna a Wuäd leichd ä mä dan Zeddl un an Schdifd vuä die Nousn un ich mach, dess ich main Servus drunder sedz.

"Du höst wieder von mir!"

Däbai guggd ä mich schdreng aa un fengd nouchä glaich a Gschbräch midn Ribbndrobb aa. Ich glääb, ar hodd na gfreichd , öb er noch merra Zeuchn vänamm will.

Bain Nausgenn zwingerd mä dä Bürchermäsdä van sain Bangla aus zu.

Die erweiterte Vorstandssitzung oder Ente gut ...

"Ein Prosit, ein Prosit ..." dröhnd s durchs Värainszimmä vam Rose.

Miä hiäm unnera Gleisä und dä Adolf blärrd:

" Aufn neua Schbordpladz!"

"Jawoll, aufn neua Schbordbladz!" gröld s au eddlicha Mäulä zärügg.

Ich gugg mich üm in dä Werdsschdumm wu an dä Düä a Schild hengd. "Geschlossene Gesellschaft" schdedd drauf. Mir senn also under uns.

"Haid is ä aa dou, dä Abodeigä," grins ich in mä nai, "äs gibd ja schließlich wos ümsünsd."

Aa sünsd fahld van dä Vüäschdandschafd kennä un a boa "dadgräfdicha Midgliedä" sen aa dou.

Dä Rose brengd grad es zwaida Fassla, als dä Vüäschdand mid sainä Dieschgloggn bimmld.

"Wall ä grad dou is möchd ich mich im Naama vam Värain herzlich baim Verainswerd bedang fä des Fraibier un die zwää Gens, die ä schbendierd hodd."

"Bravo, bravo!"

Dä Saal duäbd un dä Adolf schdimmd "Hoch soll er leben" an.

Mai Nachbä Rudolf, a aldä Bruäzlä, kann sich an Kommendoä ned väknaif un brummld zu mä rübä:

" Dös is ja wol äs wengsda, wu miä na die ganzn Baamä aa noch glee gemachd ham."

Die Vuäschdandsgloggn bimmld widdä un unnä Vüäschddand schdedd auf, wos ä sonsd aichndlich nur bai dä Duädnehrung machd.

"Manner, liebe Verainsmidglieder," aa machd a Kunsdbausn, "bävuä mä zum gämüdlichn Dääl über genn, will ich euch noch vüälaas, wos mä äs Landratsamt gschriem hodd."

Muggsmäuslesschdill is`s in dä Wärdsschdumm. Dä Vuäschdand huäld an Zeddl aus sainä Mabbn un fengd aa:

" In der Strafsache widerrechtliche Fällung von acht Erlen in Grub am Forst, Flurstück Ääla, ergeht folgender Bescheid: Da trotz eingehender Befragung zahlreicher Zeugen die Täter nicht ermittelt werden konnten, wird die Angelegenheit nicht weiter verfolgt."

Kaum dess ä ferdich is bladzn mä bainah die Uän, su a Gäbrüll is üm mä rüm. Mä heid sai ächns Wuäd ned könn väschdea, wos ouä nedd vän Adolf gild. Daa is aufküpfd un fuchdld mid die Armä, nouchä rennd ä aufn Vüäschdand zu un felld na üm n Hals.

"Ölla ham dichd khaldn, ölla ham dichd khaldn!"

Sai Gschrai is zagoa durch des ganza Geduäb zä hörn..

Dä Vüäschdand schded ümmä noch un siehd richdich gärüäd aus, wie miä uns ölla in die Armä liechn.

Wie mä uns widdä eenichermaasn beruhichd ham, bimmld ä noch ämoll ausgiebich.

"Äs kümmd noch besser!" blärrd er in dan Drubl nai.

Wie mä ölla widdä zu na hie guggn un aa dä Adolf sich widdä bäruichd hod, huäld ä langsam, richdich vüäsichdich, noch a zsammgfalds Bladd aus saina Mabbn und held s huäch.

A boa Segundn, miä is`s bainah wie a Minudn vüäkumma, sochd ä goa nex - ar wäss, wie mäs schbannend machd.

Mid an laichdn Grinsn im Gsechd fengd ä leis aa.

"Dös is haid früh kumma."

Ar weidld laichd mid n Papier und auf eemol bladzd s aus na raus:

"Unnä Bauandraach vän Schbordbladz is gänähmichd!" schreid är.

Widdä ged s luäs. Die Hilde, die haid widdä als Bädienung arbedd, schüddld mid n Kuäpf, wie sa uns gschdandna Mannä dou rümhüpfn und durchanannä schrein siehd. Wenn ich s rachd gsahn hou hod sa sägoar miich a weng aagegrinsd.

Schbader hod sa genuch zä dun, die Gäns und die Glüäs aufzadrouchn.

Bai dä fäddn Gensbrüh felld mä auf eemol mai Vähöä in dä Gämeeschdumm widdä ai un ich souch zä main Nachbä Rudolf:

"Aichndlich heid mä in Ribbndrobb zu die Gäns ai müss loud dess ä aa wos auf saina Ribbn grichd."

Ich grins na aa waachä dan gudn Widz.

Dä Rudolf schaind main Schbaas ned väschdanna zä hamm, wail ä duädanst andward:

"Ham sa dach gemachd. Ouä ar hodd sich ned wöll loss saah.

Ich hou na vurra gsahn, wie ä grad mid sain Eemerla fard is."