Die Grüber Schbrouch

Die Grüber Schbrouch

Die Grüber Schbrouch,

dös muss ich souch,

is a Kabidl fä sich -

bluäs unnera Glenn,

wenn`s Grüber senn

griechns mid nai dä Wiech.

Dach will sa ees larn,

Dös werd ned vill warn,

Dou ka ä sich noch su geblouch.

Aa wenn er`sch garn will,

dös nüdzd na ned vill

bai unnerer Schbrouch.

Dös wolld ich a weng

An Breußn baibreng.

Dou sochd dach daa Schbradz,

fä saina Bägriff

warn mir brimidiv -

dou war a Legzion grad am Bladz.

"Sie denggn woll, Sie

dös sochd mä su hie?

Dou is fai dä Underschied gruäß!

Dou nüdzd dä ke Buuch,

dös ged Zuuch üm Zuuch!"

Un nouchäd, dou lejch ich luäs.

"A Has`is a Hous

un a Hos`is a Huäs,

a Glas is a Glous

un a Kloß is a Gluäß.

A Naht is a Noud

un a Not is a Nuäd,

a Rad is a Roud

un rot, dös is ruäd.

A Sach`bläbbd a Sach,

ouwer dä Tag wärd zum Douch,

a Drach bläbbd a Drach`,

a Drach wärd ke Drouch.

A Rad is a Roud

un die Stadt is die Schdoud,

ouwer dä Staat bläbbd dä Schdaad

un die Last bläbbd a Lasd,

die Last wärd ke Lousd

ouwer a Ast wärd zum Ousd.

A Klotz bläbbd a Glodz

un a Knorz is a Gnerz.

Rotz, dös is nu mol Rodz

Un dös ohna Scherz.

Verrüggda Kleider sen a Furri,

zun Lauch souch mä Burri,

a Strauch bläbbd a Schdrauch

ouwer Rauch wärd zu Raach,

mai Frau bläbbd mai Fraa,

zu auch souch mä aa

un a Weg is a Waach.

A Baum is a Baam

ouwer a Raum wärd ke Raam,

dä Rahm, dä bläbbd Raam

un Schaum, dös is Jaasd -

sünsd is mä verkaasd.

A Eck bläbbd a Egg

ouwer aus Dreck dou wärd Draag,

a Schreck wärd ke Schraag

un a Zweck wärd ke Zwaag.

A Ratt`bläbbd a Radd,

doch a Blatt wärd a Bloud

un a Draht wärd a Droud.

A Brett wärd a Braad

ouwer a Bett wärd ke Baad,

mai Bett blaibd mai Bedd.

A Gans bläbbd ke Gans,

a Gans is a Gaas,

a Wanz`bläbbd a Wanz.

Sahn Sa, ich kaas.

A Brand bläbbd a Brand,

su odder su

un a Kuh bläbbd a Kuh.

A Suff bläbbd a Suff

..."

"Hörn Se uff, Mann,

hörn Se bloß uff!"

"...

un a Aff bläbbd a Aff."