ПМ 1993-cü ildə təkmilləşdirilmişdir və hal-hazırda ПММ adı altında istehsal olunur.

Təşkilati-ştat mənsubiyyətinə görə 9 mm-lik ПМ zabit və gizir heyətini silahlandırmaq üçün nəzərdə tutulmuşdur. Bundan başqa, tapança ştat cədvəli əsasında sıravi heyətin (sürücü-mexaniklərin, xüsusi təyinatlı dəstələrin sıravi heyətinin və s.) silahlandırılmasında da istifadə olunur.

9 mm-lik ПМ aşağıdakı əsas hissə və mexanizmlərdən ibarətdir:

1 - lülə və tətik bəndi ilə çərçivə; 2 - qoruyucu, ekstraktor və vurucu ilə çaxmaq; 3 - qaytarıcı yay; 4 - zərbə-tətik mexanizmi; 5 - vintlə dəstək; 6 - çaxmaq saxlayıcısı; 7 - maqazin

Tapançanın təchiz olunma dəstinə daxil olan ləvazimatlar:

1 - dəri qobur; 2 - ehtiyat maqazin; 3 - silgi; 4 - tapança qayışı

Tapançanın sökülməsi və yığılması

Tapançanın sökülməsi natamam və tam ola bilər.

Natamam sökülmə tapançanı təmizləmək, yağlamaq və baxışdan keçirmək məqsədilə aparılır.

Tam sökülmə tapança çox çirkləndikdə, yağış və ya qar altında qaldıqda, tapançanın deqazasiyasını və dezaktivasiyasını apardıqdan sonra, təzə yağ növünə keçdikdə (mövsümi xidməti keçirmə zamanı) və təmir zamanı aparılır.

Tapançanı sökmə və yığma zamanı aşağıdakı əsas tələblərə riayət etmək lazımdır:

- tapançanın sökülməsi və yığılması masa, səhra şəraitində isə təmiz döşəmə üzərində aparılmalıdır;

- tapançanın hissə və mexanizmlərini sökülmə ardıcıllığında düzməli, ayrılmış hissə və mexanizmlərlə ehtiyatla davranmalı, onları bir-birinin üstünə qoymağa və sökmə zamanı onlara artıq qüvvə və zərbələrin tətbiq olunmasına icazə verilmir;

- tapançanı yığan zaman onun hissələrini digər tapançaların hissələri ilə qarışdırmamaq üçün yığılan hissələrin nömrələrinə fikir vermək lazımdır. Tapançanın çaxmağının və başqa hissələrinin nömrələri tapançanın çərçivəsindəki nömrəyə (nömrə çərçivənin sol tərəfinə vurulmuşdur) uyğun gəlməlidir.

Tapançanın hissə və mexanizmlərinin yeyilməsinin qarşısını almaq üçün tapançanın tez-tez sökülməsinə yol verilmir.