सरस्वती रहस्योपनिषद्

नीहार-हार-घनसार-सुधाकराभां

कल्याणदां कनक-चम्पक दामभूषां |

उत्तुङ्ग-पीन-कुचकुम्भ-मनोहराङ्गी

वाणीं नमामि मनसा वचसा विभूत्यै || ध्यानश्लोकः ||

या वेदान्तार्थ-तत्त्वैक-स्वरूपा परमार्थतः |

नामरूपात्मना व्यक्ता सा मां पातु सरस्वती || १ ||

या साङ्गोपाङ्ग वेदेषु चतुर्ष्वेकैव गीयते

अद्वैता ब्रह्मणः शक्तिः सा मां पातु सरस्वती || २ ||

या वर्ण-पद-वाक्यार्थ-स्वरूपेणैव वर्तते |

अनादि-निधनानन्ता सा मां पातु सरस्वती || ३ ||

अध्यात्ममधिदैवं च देवानां सम्यगीश्वरी |

प्रत्यगास्ते वदन्ती या सा मां पातु सरस्वती || ४ ||

अन्तर्याम्यात्मना विश्वम् त्रैलोक्यं या नियच्छति |

रुद्रादित्यादिरूपस्था सा मां पातु सरस्वती || ५ ||

या प्रत्यग्दृष्टिभिर्-जीवैर्-व्यज्यमानानुभूयते |

व्यापिनी ज्ञप्तिरूपैका सा मां पातु सरस्वती || ६ ||

नामजात्यादिभिर्-भेदैरष्टधा या विकल्पिता |

निर्विकल्पात्मना व्यक्ता सा मां पातु सरस्वती || ७ ||

व्यक्ताव्यक्तगिरः सर्वे वेदाद्या व्याहरन्ति याम् |

सर्वकामदुघा धेनुः सा मां पातु सरस्वती || ८ ||

यां विदित्वाखिलं बन्धं निर्मथ्याखिलवर्त्मना |

योगी याति परम् स्थानं सा मां पातु सरस्वती || ९ ||

नामरूपात्मकं सर्वं यस्यामावेश्य तां पुनः |

ध्यायन्ति ब्रह्मरूपैका सा मां पातु सरस्वती || १० ||

चतुर्मुखमुखाम्भोजवनहंसवधूर्मम |

मानसे रमतां नित्यं सर्वशुक्ला सरस्वती || ११ ||

नमस्ते शारदे देवि काश्मीरपुरवासिनि |

त्वामहं प्रार्थये नित्यं विद्यादानं च देहि मे || १२ ||

अक्षसूत्राङ्कुशधरा पाशपुस्तकधारिणी |

मुक्ताहारसमायुक्ता वाचि तिष्ठतु मे सदा || १३ ||

कम्बुकण्ठी सुताम्रोष्ठी सर्वाभरणभूषिता |

महासरस्वती देवी जिह्वाग्रे सन्निविश्यताम् || १४ ||

या श्रद्धा धारणा मेधा वाग्देवी विधिवल्लभा |

भक्तजिह्वाग्रसदना शमादिगुणदायिनी || १५ ||

नमामि यामिनीनाथ - लेखालङ्कृत - कुन्तलाम् |

भवानीं भवसन्ताप - निर्वापण - सुधानदीम् || १६ ||

फलश्रुतिः

यः कवित्वं निरातङ्कं भुक्तिमुक्ती च वाञ्छति |

सोऽभ्यर्चैनां दशश्लोक्या नित्यं स्तौति सरस्वतीम् ||

Voice Recording:

Google Sites

Report abuse