I MARTA SY I MARIA

Ao amin’ny “Lioka” toko fahafolo

No nakana ity tantara iray ity

Evanjely ho antsika manontolo

Katôlika Malagasy sy Zanatany eto Evry

Zava-nisy fa tsy angano

Tantara marina tokoa

I Marta no nampiantrano

An’ilay antsoina hoe i Jesoa

Tsy nihetsika tan-trano

I Maria ilay iray tam-po

Taitra sy nanganohano

Fa tsy nampoiziny i Jesoa

Nanao raharaha avy hatrany

I Marta, be fanahiana

I Maria kosa tamin’ izany

Namonjy petraka, sondriana

I Maria io tsy mba miasa

Hoy i Marta tamin’ i Jesoa

Ny hevitrao nefa asa?

‘Zaho efa vizaka tokoa

“Marta! Ianao be herehina ihany

Fa i Maria nifidy ny anjara soa

Tsy hoesorina aminy nefa izany”

Hoy ny valin-tenin’ i Jesoa.

Anio ianao mety ho i Marta

Lasa Maria raha sendra raikitra,

Fa ny hany azontsika antoka:

Tena mifameno ny andraikitra

Indraindray alaim-panahy

Ry Marta fa hoe miasa irery.

Ry Maria nefa tena niahy,

Tamin’ny vavaka izay nankahery

Fahafolo taonan’ny CMZÉ

Tsy tonga lafatra nefa tena tsara

Feno “Marta” tena marobe

Ry “Maria” koa anefa tsy diso anjara

Isika CMZE mba te-hivoatra

Ka be ny tonga nikarakara

Nisy anefa ny tsy afaka nanoatra

Tsy omen-tsiny fa zokin’ny any afara

Mety ho i Maria ianao na koa ho i Marta

Samia ho heni-pahasoavan’ Andriamanitra

FISAORANA ho antsika tsy an-kanavaka

Dia isika rehetra  mpiara-mivavaka

FANKASITRAHANA koa anefa

Sy vavaka ho an’ny solontenam-paritra

Ary koa ho an’ny ANCMF

Mba hotsimbinin’ Andriamanitra.

CMZE (2007 - 2017)