مين فينا أدام المراية

موحشتش حد أنا في الأخر .. موحشتش حد ؟!

واللي خانوك واتشمّتوا فيك .. شمتوا بجد ؟!

تعالى نتحاسب وقوللي

مين فينا أدام المراية ؟!

لا حد غيري شاهد عليك

ولا حد باقي غيرك معايه

تعالى نتحاسب وقوللي

أنا ليه بجد بقيت أخاف؟

وعدى فين العمر كله

وفين نزل لحم الكتاف

ومين يرجعني أشوف

اللي عمره ما كان يتشاف

ياما قولتلك الحب حاجه

غير الإنبهار والإستلطاف

يا ما قولتلك

الناس دي مش زيك ضعاف

ياما قولتلك تعالى نهجر

كل اللي في الآخر هجر

أديك لوحدك ف النهاية

مفضلش غير حبة صور

تبص لاصحابها النهاردة

أصنام على صورة بشر

واللي باعك عشان فلوس

هو اللي كان هيشتريك

عشان فلوس .. ويقول قدر

ياما قولتلك

الحب في السكة ساعات

ممكن يكون هو الحجر

والعمر أقصر م الأماني

لا يوم هتمسك شمس

أو تطلع قمر

ادينا ف الآخر هنا

انت وانا

صبري فنا

وضهري ف عز الشباب مني انحنى

وبكره عيد رقم أربعين

لوحدنا

وسط الفجارى

وقلوب حجارة

وأهالي واكله حقنا

ومجتمع من غير وسع

يا قلبي للي زينا

أدينا في الآخر هنا

انت وانا

لوحدنا

لاحد غيري شاهد عليك

ولا حد باقي غيرك معاية

تعالى نتحاسب وقوللي

مين فينا أدام المراية

محمد سلامه
6 يونيو 2025