الرباعيات "بالعامية المصرية"
Embedded Files
(1)
مالناش ف حد نصيب وكبرنا ما نسينا
ولا حد لينا قريب حتى أهالينا
ونظرة بيني وبينها عشرين سنة أوجاع
يا قلبي لم الدور.. هتحب إيه فينا؟!
(2)
مين غيرك انتي ف الملكوت ؟!
يا غنوة عايشه ف السكوت
يا قلب مش قادر يعيش
يا حب مش قابل يموت
(3)
أجمل رساله كتبتها ، مبعتهاش
وقلبي تاه من وقتها ، ولا بيهداش
يا هل ترى .. الحزن دا قسمه ونصيب
واللا النصيب .. لساه مجاش!
(4)
!فيه ناس تعيش وتموت وناس تموت فتعيش
وانا عشت عمري سنين بشكي ومبخبيش
لا الشكوى داوت هموم ولا حبي كان له لزوم
!يا قلبي ياللي هويت، إهوى، ومتقولليش
(5)
مفتون بعشق الأصول وبصاحب اصحابها
ولا عمر عيني تقول ، للي الكل .. يصحبها
يا لون ، والطبع دُونْ ، وكل شيء مدهون
يا صنف يا ملعون زي اللي جربها
(6)
الكل ماشي بالقناع ومسيره يوم يلدع
ولا حد ماسك ع الشرف وكأنه راح يوجع
هو احنا إيه اللي حصل فينا يا خلق يا هوه
ولا حضن مرة يطمنك ولا ف الصحاب مجدع
(7)
آخر ليالي السنه .. والقلب على حاله
في الحب نجمه سنا بس النصيب .. حاله
فتحت ألف كتاب ، ودُقت ألف عذاب
وغِبت ألف غياب ولا حد قال .. ماله
(8)
على سبيل الإبتسام ، على سبيل الصمود
على سبيل السلام ، وسط العِرَر والدود
على سبيل الجَلَد ، مفيش عذاب للأبد
مفضلش جمبنا حد ، بس الأمل موجود
Google Sites
Report abuse