سلّمتلك بالمعجزات

سلمتلك بالمعجزات

ياللي ف إيديك حل العقد

يا واهب الخير للبلد

يا مغيّر العهد اللي فات

سلّمتلك وآمنت بيك

هو انت مين يقدر عليك

ده انتا ف ضهرك ربنا

والحكمه طارحه بين إيديك

سليمان موسوسلك لوحدك

عن مكان كل الحاجات

***

إنت الدّكر

وانت القمر

ودونجوان كل البنات

مين غيرك انت نجم النجوم

على كل مسرح كل يوم

إنت الفتوّه ع الشاشات

***

ياللي بتتفرج عليه .. خليه

هو انت يعني لو قلبت هتلقى إيه

قلّب تلاقي ف حته جمبك شعب مات

قلّب تلاقي رقص وكورة وعهر بنات

قلّب تلاقي أجمل ما فيك بقى ذكريات

قلّب تلاقي ابنك يروح المدرسة

يلقى المديرة معرَّ*ة

وتندفن جواه حيات

قلب تلاقي معدش باقي

غير أبوك السَّقا مات

الله على دي إنجازات

سلمتلك بالمعجزات

محمد سلامه

مايو 2025