Velferð nemenda

er höfð að leiðarljósi

í öllu starfi Mánalands

Á Mánalandi er foreldrasaamstarf eftirfarandi:

• Haustfundur - er haldinn árlega í september og allir foreldrar hvattir til að mæta til að fá kynningu á starfinu, starfsfólki, áherslum og ýmsu öðru sem nauðsynlegt er að fá upplýsingar um

• Foreldrasamtöl eru á bilinu 1-2 á ári

• Foreldraráð - Kosið er í foreldraráð einu sinni á ári en í ráðið skal skipa 3 foreldra. Lögum samkvæmt skal vera foreldraráð við hvern leikskóla. Foreldrar eru hvattir til að kynna sér lög um leikskóla á vefsíðu Mennta- og menningarmálaráðuneyti Íslands.

Elstu nemendur fara í grunnskólann síðasta leikskólaárið sitt. Það er misjafnt eftir aðstæðum hvernig skólasamstarfinu er háttað. Það hefur verið frá því að fara einu sinni í viku frá síðla hausti, en líka byrjað á vorönn og þá oftar í viku en jafnframt var einn hópur tekinn upp í forskóla þegar erfitt var að manna leikskólann og því er samstarfið mjög gott á milli þessara skóla. Nemendur hafa farið með kennara úr leikskólanum og eru með kennaranum sem mun svo taka við þeim í 1. bekk að hausti. Því skapast góð tengsl við kennarann og þau þekkja hann því vel og skólahúsnæðið þegar þau byrja. Þau hafa verið að fara með 1. - 2. bekk í listastofuna, íþróttatíma, bekkjatíma, þau heimsækja bókasafnið, borðað hádegismat og verið með í frímínútum.

Mjög gott samstarf er við Tónskólanum en við förum tvisvar í viku þangað til að syngja og stundum fá nemendur líka að prufa hljóðfærin og starfsmenn leikskólans sem kunna á hljóðfæri eru virkjaðir til þátttöku. Þarna læra nemendur lög og vísur ásamt heiti yfir hljóðfæri og allt tengist þetta og eflir málþroska þeirra.

Leikskólinn hefur verið að fara á elliheimilið Hjallatún og sungið fyrir vistmenn, nemendum hefur verið boðið í nónhressingu og þegar má eftir Covid þá langar okkur að fara og spila og spjalla við eldra fólkið. Með þessu erum við að auka málþroskann og efla tengsl milli kynslóða.

Við förum líka í göngutúra, kíkjum í heimsókn, bæði í hesthús og fjárhús og skoðum dýrin. Okkur er líka boðið að kíkja í heimsókn á fleiri staði hér í Vík sem eru þá með dýr eða eitthvað annað áhugavert. Við lærum helling af orðum í svona ferðum, bæði göngutúrum og heimsóknum ásamt því að læra um náttúruna. Við eigum marga velunnara hér í Vík í Mýrdal og erum við þeim ávallt þakklát.