ABSTRAK

Bunsod ng paglaganap ng social media, naging plataporma na ito upang magpahayag ng mga opinyon sa iba’t ibang mga isyu. Isa sa mga pamamaraang naging prominente sa pagtaguyod ng political propaganda ay ang Political Vlogging.  Nakita ang mga vloggers bilang representatibo ng ordinaryong tao, na ginagamit ang kanilang boses upang ipahayag ang hinaing ng masa (Gaw & Soriano, 2022). Dahil sa paglaganap nito, naikikita ito bilang mas lehitimo kumpara sa ibang porma ng media tulad ng traditional media (e.g. ABSCBN, Inquirer, GMA, etc.) at ginagamit upang magsilbing primaryang batis ng impormasyon. Makikita ito sa isang prominente at kamakailan lang na umiiral na diskurso hinggil sa naging pag-aresto ng International Criminal Court (ICC) sa dating pangulo na si Rodrigo Duterte sa mga kaso na “crimes against humanity” bunsod ng mga extrajudicial killings na naganap sa ilalim ng nagdaang administrasyon. Dahil dito, nais tukuyin at suriin ng papel ang retorika at taktika na ginagamit ng mga politikal na vloggers sa paghimay ng diskurso na umiiral sa pag-aresto kay Duterte ng International Criminal Court (ICC). Nais din suriin ang paraan ng pagpapakete ng mga vloggers sa kanilang mensahe upang maging batis ng disimpormasyon o magsilbing tagapagtaguyod ng alternatibong diskurso at boses sa mga isyu. Sa pag-aaral na ito, gagamitin ang critical discourse analysis, partikular ang Symbolic Convergence Theory (1982)  at Dating ni Bienvenido Lumbera (1997) upang suriin ang nilalaman ng mga vlogs ng iba’t ibang indibidwal. 2 vlogger ang pipiliin at tig-isang video ang susuriin bawat vlogger upang malaman ang mga estratehiya na kanilang ginagamit. Ang pamamaraan ng pagpili ng vloggers ay batay sa kanilang dami ng engagements tulad ng views at comments. Sa YouTube ang sityo ng pag-aaral dahil sa anyong longform content kung saan mas malayang napapalawig ng mga vloggers ang kanilang mga opinyon. Sa pamamagitan ng pag-aaral na ito, inaasahan na magkakaroon ng mas komprehensibong pag-unawa sa mga pamamaraan ng vloggers upang makapanghikayat ng kanilang manonood. Inaasahan din na makakatulong ang pag-aaral sa pagbabalangkas ng mga estratehiya upang labanan ang disimpormasyon at mga nakakapinsalang naratibo sa traditional media hinggil sa mga sosyopolitikal na isyu. Makakatulong din ang pag-aaral sa pagsusuri at pag-iimbestiga sa mga pamamaraan kung paano maaaring magamit ang political vlogging upang magsulong ng alternatibong diskurso at komentaryo na hindi gumagamit ng paninira at nagpapalaganap ng mapaminsalang pekeng impormasyon sa kalagayang Pilipino. 

Mga susing salita: Vloggers, Political vlogging, Social media, Retorika, Disimpormasyon, Alternatibong diskurso