Marcos-Duterte, Walang Pinag-iba?: Ang Estilo ng Komunikasyon at Dating sa Publiko ng Piling Talumpati nina Duterte at Marcos, Jr. sa Panahon ng Halalan
Marcos-Duterte, Walang Pinag-iba?: Ang Estilo ng Komunikasyon at Dating sa Publiko ng Piling Talumpati nina Duterte at Marcos, Jr. sa Panahon ng Halalan
Ianne Anthony D.J. Tan at Sophia Angela C. Ronda
ABSTRAK
Ang pag-aaral na ito ay naglalayong talakayin ang iba't ibang estilo sa publikong talumpati nina Rodrigo Duterte at Ferdinand Marcos Jr. at kung paano ito nakakaapekto sa paningin ng publiko. Gagamit ito ng Communication Accommodation Theory (CAT) upang suriin ang epekto ng estilo ng pananalita sa kredibilidad at awtoridad sa politikal na konteksto. Ayon sa ilang pag-aaral nina Arugay at Encinas-Franco noong 2024, si Duterte ay kilala sa kanyang bulgar at matapang na estilo, gamit ang Filipino at iba pang lokal na wika, kadalasang may pagmumura at matinding pahayag. Si Marcos Jr. naman ay mas gumagamit ng pormal na wika, diplomatiko at kalmado sa pagtalakay ng national issues. Sa kabila nito, pareho silang nakatuon sa malasakit sa masa at isyu ng karaniwang tao. Susuriin ang mga piling talumpati at panayam (prepared, impromptu, at para sa masa) gamit ang Communication Accommodation Theory o CAT. Layunin nitong malaman ang susing karakter ng kanilang diskurso at epekto sa target audience. Binibigyang-diin ng pag-aaral na ang publikong talumpati ay diskursong pampolitika upang impluwensiyahan o pilitin ang masa. Ang estilo ay makapangyarihang kasangkapan sa persuasion o coercion.
Mga susing salita: Estilo ng Pananalita, Paningin ng Publiko
Ianne Anthony D.J. Tan
Si Ianne ay isang mag-aaral mula sa Unibersidad ng Pilipinas na kumukuha ng kursong Speech Communication. Siya ay isang lider-estudyante mula sa Unibersidad ng Santo Tomas kung saan siya ay nagtapos ng may karangalan noong Senior High School sa ilalim ng Humanidades at Agham Panlipunan na strand. Kaya naman, ang pag-aaral ng implikasyon ng pakikitungo ng mga mamamayan at ang paraan ng komunikasyon nila sa isa’t isa at sa lipunan ang siyang pumupukaw ng kaniyang atensyon. Bukod dito, hilig din ni Ianne ang panonood ng iba’t ibang mga isports. Sa kasalukuyan, si Ianne ay isang media staffer mula sa University of the Philippines - Office for Athletics and Sports Development (UP-OASD) kung saan ang kaniyang trabaho ay gamitin ang komunikasyon upang ipakita ang galing at personalidad ng iba’t ibang mga atleta sa komunidad.
Sophia Angela C. Ronda
Si Angela ay isang unang taon na mag-aaral ng kursong BA Speech Communication sa Unibersidad ng Pilipinas Diliman. Bago siya tumahak sa larangan ng komunikasyon, nagmula siya sa isang disiplina na nakatuon sa agham at matematika noong senior high school. Sa kabila nito, mas pinili niyang sundan ang kanyang hilig sa wika, sining, at midya. Nagsilbi siyang Creative Director ng kanilang broadcasting at publishing na organisasyon noong Senior High School, kung saan nahubog ang kanyang talento sa malikhaing pamumuno at produksyon. Lumahok din siya sa Division Schools Press Conference (DSPC), na lalo pang nagpatingkad sa kanyang interes sa pamamahayag at komunikasyon.