Nakarating ba sa Masa?: Pagsusuri sa mga Estratehiyang Elektoral nina Marcos at Robredo Gamit ang Elaboration Likelihood Model at Konsepto ng Dating
Nakarating ba sa Masa?: Pagsusuri sa mga Estratehiyang Elektoral nina Marcos at Robredo Gamit ang Elaboration Likelihood Model at Konsepto ng Dating
Art Mathieu B. Nool at Hannah S. Montecillanos
ABSTRAK
Mahalagang bahagi ng demokratikong proseso ang eleksyon, kung saan ginagampanan ng mga mamamayan ang kanilang karapatang pumili ng mga pinunong huhubog sa hinaharap ng bansa. Gayunpaman, hindi laging nakabatay sa plataporma o kakayahan ng kandidato ang desisyon ng mga botante. Sa kontekstong ito, layunin ng pananaliksik na ito na suriin ang mga kampanya nina Ferdinand “Bongbong” Marcos Jr. at Maria Leonor “Leni” Robredo noong Halalan sa Pagkapangulo 2022 gamit ang Elaboration Likelihood Model (ELM) bilang teoretikal na balangkas. Ayon sa ELM, may dalawang pangunahing ruta sa pagproseso ng impormasyon: ang central route, kung saan masusing sinusuri ng botante ang mga plataporma at kakayahan ng kandidato, at ang peripheral route, kung saan umaasa ang botante sa paggamit ng apelang emosyonal, simbolismo, at midyang biswal. Sa pamamagitan ng qualitative content analysis ng mga campaign materials, TV ads, social media posts, at publikong aktibidad, layuning ng pag-aaral na ito na tukuyin ang mga estratehiyang ginamit ng bawat kandidato at alamin kung aling ruta ang mas pinaburan ng kani-kanilang mga kampanya nina Bongbong Marcos at Leni Robredo at kung paano ito nakaapekto sa opinyon ng publiko, kredibilidad ng kandidato, at kung paano ito ginamit ng mga botante sa kanilang desisyon sa pagboto. Layunin ng pananaliksik na ito na makapag-ambag sa mas malalim na pag-unawa sa kaugnayan ng komunikasyong politikal, pag-uugali ng botante, at proseso ng eleksyon sa konteksto ng Pilipinas.
Mga susing salita: Estratehiyang Elektoral, Elaboration Likelihood Model (ELM), Eleksyon 2022, Dating, Pag-uugali ng Botante
Art Mathieu B. Nool
Si Art Mathieu B. Nool ay kasalukuyang nasa huling taon ng kanyang pag-aaral ng BS Speech Communication, na may pokus sa retorika at performance. Kasalukuyan siyang interesado sa rhetorical na pagsusuri ng midya, digitally-mediated performances, at mga digital na komunidad.Sinusuri niya kung paano bumubuo ng mga identidad, makabuluhang relasyon, at kolektibong realidad sa mga espasyong digital tulad ng social media platforms, forums, at iba pang interaktibong online na komunidad. Sa labas ng akademya, siya ay isang freelance illustrator at animator, isang heavy metal na gitarista, at tagahanga ng horror media tulad ng mga pelikula, libro, at video games.
Hannah S. Montecillanos
Si Hannah S. Montecillanos ay nasa kanyang unang taon ng pag-aaral ng BA Speech Communication sa Unibersidad ng Pilipinas – Diliman. Nagtapos siya ng Senior High School sa AMA Fairview sa ilalim ng strand na TVL ICT-Visual Graphics, kung saan nahasa ang kanyang kasanayan sa videography, photography, at pag-eedit ng mga bidyo at larawan. Ang kanyang interes sa pelikula at panitikan, partikular sa mga akdang may feministang tema, ay nagsilbing gabay sa kanyang paglalim ng pag-unawa sa ugnayan ng komunikasyon, midya, at kasarian. Para sa kanya, ang midya ay hindi lamang daluyan ng impormasyon, kundi isang makapangyarihan na kasangkapan para sa pagbibigay-tinig sa mga karanasang madalas isinasantabi ng lipunan.