ABSTRAK

Kapag pinag-uusapan ang panitikan at lipunan, inaaral na hindi ipinaghihiwalay ang pagsuri sa konkreto at obhetibong kalagayan ng lipunan—lalo na kapag inilalathala dito ang diskurso hinggil sa Karapatang Pantao, ang integrasyon ng diskurso ng Karapatang Pantao sa diskurso ng kultura at mga paraan ng pagturo at pagtaguyod sa pagpapayaman sa diskursong ito (Mclennen & Slaughter, 2009). Tanyag na pangunahing tumututol sa kinasanayang ruta ng pamamahayag ang  pahayagang Ang Bayan na bukod sa alternatibong saklaw ng paglatag ng balita sa dinaranas ng mga batayang sektor at sa mga komunidad sa kanayunan, ibinabalita rito ang mga kalagayan, datos, at mga naratibong mahigpit na nakalapat sa rebolusyonaryong perspektiba at praktika.

Layunin ng mga rebolusyonaryong pahayagan na pukawin ang kamalayan ng masa na silang pangunahing nakararanas ng matinding pananamantala sa kabuhayan at karapatan, at hikayatin ang masang pinagsasamantalahan na magpaorganisa, mag-organisa, magpakilos at sumapi sa rebolusyonaryong kilusan. Ang Agham Bayan, na siyang pahayagan naman ng Liga ng Agham para sa Bayan (LAB), katulad ng Ang  Bayan, ay nilalayong ipakilala at pukawin ang pampulitikang kamalayan ng mga siyentista at teknologo sa kanilang papel sa pagtataguyod ng pambansang industriyalisasyon at pagtatamo ng, pambansa-demokratikong aspirasyon, at sa pamamagitan ng demokratikong rebolusyong bayan. Susuriin sa pagitan ng isang tekstwal na analisis, at pag-uugnay sa dinamiko ng mga alternatibong pahayagan. Pangunahing titingnan at tatalakayin ang diskursong binubuksan ng Agham Bayan hinggil sa kalagayan ng bansa, at sa mga isyu at suliraning kinahaharap sa larangan ng pagtatalaban ng agham at ng lipunang Pilipino.. Pangunahing tututukan kung paano ginagamit ng Agham Bayan ang adbokasiya nito na isulong ang makamasang paggamit sa agham at gamitin ito sa pagsulong sa pambansang kalayaan at demokrasya.

Bibigyan ng matimtimang pansin ang panulat ng Agham Bayan, ang layunin ng bawat isyu at balitang inilalathala sa pahayagan mula Disyembre 2021 hanggang sa kasalukuyan. Pag-uusapan ang mga mahahalagang tala ng Agham Bayan hinggil sa namamayaning kultura ng neoliberalismo at empirisismo sa edukasyon at sa propesyon na parehong pag-aaral at implementasyon ng Agham at Teknolohiya sa lipunan. Tutukuyin ang mga pangunahing suliraning tinatalakay sa mga isyu ang mga susing salita at mga diskursong tinatalakay, at ang pangkabuuang pedagohiya ng Agham Bayan at ang nilalayong ambag nito, kasama ang Ang Bayan at iba pang rebolusyonaryo at progresibong pahayagan, bilang aral at batayan ng pagkilos sa pang araw-araw na galaw ng lipunan. Gayundin, sa pagtingin sa mga kaakibat na tala, sanaysay, malikhaing akda, parehong tungkol sa agham at teknolohiya, o sa iba pang paksa hinggil sa rebolusyon at pagsulong para sa demokratikong karapatan ng mamamayan. Pipili ng tatlong (3) isyu na patungkol sa paggamit ng propesyunal na kaalaman sa agham at teknolohiya sa produksyon at agraryong rebolusyon, ang kalagayan ng agham at teknolohiya sa ilalim ng pangkasalukuyang panahon (sa konteksto ng hegemonya ng mga kapitalistang industriya), at ang layunin ng paghimok sa mga kabataan, mga siyentista’t inhinyerong makabayan, sa kanilang pagsabi at pakikibaka sa rebolusyon.

Mga susing salita: Agham Bayan, Liga ng Agham para sa Bayan (LAB), Bayan, Ekonomiya, Panitikan