Ito na Nga!: Pag-aaral sa Diskurso at Komunikatibong Pahiwatig na Ginagamit sa Blog Tsismis na PEP.ph
Ito na Nga!: Pag-aaral sa Diskurso at Komunikatibong Pahiwatig na Ginagamit sa Blog Tsismis na PEP.ph
Zaila Philippe R. Francisco at Udele Bernice C. Herico
ABSTRAK
Sa makabagong panahon, ang onlayn tsismis o "pag mamarites" ay naging isang prominenteng bahagi ng pampublikong diskurso sa Pilipinas (Cuadra, 2024). Ang mabilis na paglaganap ng impormasyon sa mga onlayn na plataporma ay nagbunga ng mga ‘tsismis blogs’ kung saan ang mga artikulo ay nakatuon sa mga kumukulong balita ukol sa mga kilalang personalidad (Brillion, 2017). Susuriin ng pananaliksik na ito ang isang ‘tsismis blog site’ na Philippine Entertainment Portal (PEP.ph, 2006) at kung paano kinukwento ng mga manunulat ang mga tsismis na kanilang ipinapalaganap. Bagama’t mayroon nang mga pananaliksik ukol sa kultura ng tsismis, karamihan sa mga pag-aaral sa tsismis ay nakatuon sa tradisyunal na anyo nito. Kulang pa ang pagsusuri sa wikang ginagamit sa onlayn tsismis, partikular sa larangan ng showbiz, lalo na sa mga blog site tulad ng PEP.ph. Dahil dito, kinakailangang pagtuunan ng pansin kung paano ginagamit ang wika at pahiwatig sa ganitong plataporma.
Ang pag-aaral na ito ay naglalayong (1) suriin kung paano ginagamit ang wika sa pag-uulat ng onlayn tsismis, (2) siyasatin ang komunikatibong pahiwatig at diskurso ng mga manunulat ng tsismis item, at (3) obserbahan ang kulturang nagpapahiwatig sa tsismis sa kontekstong dihital. Tatalakayin din ang pragmatika at sosyolinggwistikong aspekto ng kanilang estilo upang masilip kung paano naaangkop ang wika sa konteksto ng tagapanood at paano ito humuhubog ng pananaw. Gagamitin ang analisis ng diskurso upang suriin ang wika at estratehiya sa pagpapalaganap ng tsismis, at ang teoryang pahiwatig (Maggay, 2002) para sa pag-unawa sa mga di-tahasang mensahe. Ang pag-aaral na ito ay makapagbibigay ng mas malalim na pag-unawa sa mga paraan ng pagbabahagi ng mga manunulat ng onlayn tsismis, partikular sa konteksto ng dihital na midya at kulturang Pilipino. Sa pamamagitan ng masusing pagsusuri sa wika, pahiwatig, at estilong komunikatibo sa mga blog site gaya ng Philippine Entertainment Portal (PEP.ph), makatutulong ito sa paghubog ng kamalayan tungkol sa kung paano ginagamit ang wika upang makaimpluwensiya ng opinyon, bumuo ng naratibo, at mapanatili ang interes ng mga mambabasa.
Mga susing salita: Marites, Tsismis, Blog site, Onlayn tsismis, Blind item, Pahiwatig
Udele Bernice C. Herico
Si Udele ay nasa unang taon ng kolehiyo sa Unibersidad ng Pilipinas, Diliman at nag-aaral ng kursong BA Speech Communication sa ilalim ng Kolehiyo ng Arte at Literatura. Nagtapos siya nang May Mataas na Karangalan sa Paaralang Sekondaryang Pang-agham ng Lungsod Quezon sa track na Science, Technology, Engineering, Mathematics. Sa kaniyang pag-aaral sa hayskul, si Udele ay nakasulat ng mahigit tatlong papel pang-pananaliksik at noong 2022 ay nakatanggap ng paranggal para sa pagiging Top 6 Finalist at para sa Best Research Video Award sa UP Materials Science and Engineering Summit Research Fair. Siya rin ay naging Pinuno ng Ugnayang Pampubliko at Editor ng English Club sa hayskul mula 2020 - 2022. Sa kasalukuyan, pinagpapatuloy niya ang kaniyang hilig sa pagsusulat at pinapalawak ang kaniyang mga kaalaman sa kolehiyo.
Zaila Philippe R. Francisco
Si Zaila ay nasa unang taon ng pag-aaral sa kursong Pasalitang Komunikasyon sa ilalim ng Kolehiyo ng Arte at Literatura sa Unibersidad ng Pilipinas, Diliman. Noong 2024, nagtapos siya nang May Karangalan sa Mataas na Paaralang Pang-Agham ng Lungsod ng Makati sa larangan ng Science, Technology, Engineering, at Mathematics (STEM). Bilang isang mag-aaral, layunin niyang pag-ugnayin ang komunikasyon at negosyo sa pamamagitan ng patuloy na pag-aaral sa mga larangang ito. Mahilig siyang magbasa ng mga nobela at sumayaw, at aktibo sa pagtuklas ng mga gawaing nagpapayaman sa kanyang pagkamalikhain at pagkatao.