അവ്യക്തോപനിഷത്ത്

അവ്യക്തോപനിഷത്ത്

സ്വാജ്ഞാനാസുരരാഡ്ഗ്രാസസ്വജ്ഞാനനരകേസരീ .

പ്രതിയോഗിവിനിർമുക്തം ബ്രഹ്മമാത്രം കരോതു മാം ..

ഓം ആപ്യായന്തു മമാംഗാനി വാക്പ്രാണശ്ചക്ഷുഃ ശ്രോത്രമഥോ

ബലമിന്ദ്രിയാണി ച .. സർവാണി സർവം ബ്രഹ്മോപനിഷദം മാഹം

ബ്രഹ്മ നിരാകുര്യാം മാ മാ ബ്രഹ്മ നിരാകരോദനിരാകരണ\-

മസ്ത്വനിരാകരണം മേസ്തു തദാത്മനി നിരതേ യ ഉപനിഷത്സു ധർമാസ്തേ

മയി സന്തു തേ മയി സന്തു .. ഓം ശാന്തിഃ ശാന്തിഃ ശാന്തിഃ ..

ഹരിഃ ഓം . പുരാ കിലേദം ന കിഞ്ചന്നാസീന്ന ദ്യൗർനാന്തരിക്ഷം

ന പൃഥിവീ കേവലം ജ്യോതീരൂപമനാദ്യനന്തമനണ്വസ്ഥൂലരൂപമരൂപം

രൂപവദവിജ്ഞേയം ജ്ഞാനരൂപമാനന്ദമയമാസീത് .

തദനന്യത്തദ്ദ്വേധാഭൂദ്ധരിതമേകം രക്തമപരം .

തത്ര യദ്രക്തം തത്പുംസോ രൂപമഭൂത് . യദ്ധരിതം തന്മായായാഃ .

തൗ സമഗച്ഛതഃ . തയോർവീര്യമേവമനന്ദത് . തദവർധത .

തദണ്ഡമഭൂധൈമം . തത്പരിണമമാനമഭൂത് . തതഃ

പരമേഷ്ഠീ വ്യജായത . സോഽഭിജിജ്ഞാസത കിം മേ കുലം കിം മേ

കൃത്യമിതി . തം ഹ വാഗദൃശ്യമാനാഭ്യുവാച ഭോഭോ പ്രജാപതേ

ത്വമവ്യക്താദുത്പന്നോഽസി വ്യക്തം തേ കൃത്യമിതി . കിമവ്യക്തം

യസ്മാദഹമാസിഷം . കിം തദ്വ്യക്തം യന്മേ കൃത്യമിതി .

സാബ്രവീദവിജ്ഞേയം ഹി തത്സൗമ്യ തേജഃ . യദവിജ്ഞേയം തദവ്യക്തം .

തച്ചേജ്ജിജ്ഞാസസി മാവഗച്ഛേതി . സ ഹോവാച കൈഷാ ത്വം

ബ്രഹ്മവാഗ്യദസി ശംസാത്മാനമിതി . സാ ത്വബ്രവീത്തപസാ മാം

വിജിജ്ഞാസസ്വേതി . സ ഹ സഹസ്രം സമാ ബ്രഹ്മചര്യമധ്യുവാസാധ്യുവാസ .. 1..

അഥാപശ്യദൃചമാനുഷ്ടുഭീം പരമാം വിദ്യാം

യസ്യാംഗാന്യന്യേ മന്ത്രാഃ . യത്ര ബ്രഹ്മ പ്രതിഷ്ഠിതം .

വിശ്വേദേവാഃ പ്രതിഷ്ഠിതാഃ . യസ്താം ന വേദ കിമന്യൈർവേദൈഃ

കരിഷ്യതി . താം വിദിത്വാ സ ച രക്തം ജിജ്ഞാസയാമാസ .

താമേവമനൂചാനാം ഗായന്നാസിഷ്ട . സഹസ്രം സമാ

ആദ്യന്തനിഹിതോങ്കാരേണ പദാന്യഗായത് . സഹസ്രം

സമാസ്തഥൈവാക്ഷരശഃ . തതോഽപശ്യജ്ജ്യോതിർമയം

ശ്രിയാലിംഗിതം സുപർണരഥം ശേഷഫണാച്ഛദിതമൗലിം

മൃഗമുഖം നരവപുഷം ശശിസൂര്യഹവ്യവാഹനാത്മകനയനത്രയം .

തതഃ പ്രജാപതിഃ പ്രണിപപാത നമോനമ ഇതി . തഥൈവർചാഥ തമസ്തൗത് .

ഉഗ്രമിത്യാഹ ഉഗ്രഃ ഖലു വാ ഏഷ മൃഗരൂപത്വാത് . വീരമിത്യാഹ

വീരോ വാ ഏഷ വീര്യവത്ത്വാത് . മഹാവിഷ്ണുമിത്യാഹ മഹതാം വാ അയം

മഹാന്രോദസീ വ്യാപ്യ സ്ഥിതഃ . ജ്വലന്തമിത്യാഹ ജ്വലന്നിവ ഖല്വസാവവസ്ഥിതഃ .

സർവതോമുഖമിത്യാഹ സർവതഃ ഖല്വയം മുഖവാന്വിശ്വരൂപത്വാത് .

നൃസിംഹമിത്യാഹ യഥാ യജുരേവൈതത് . ഭീഷണമിത്യാഹ ഭീഷാ വാ

അസ്മാദാദിത്യ ഉദേതി ഭീതശ്ചന്ദ്രമാ ഭീതോ വായുർവാതി ഭീതോഽഗ്നിർദഹതി

ഭീതഃ പർജന്യോ വർഷതി . ഭദ്രമിത്യാഹ ഭദ്രഃ ഖല്വയം ശ്രിയാ ജുഷ്ടഃ .

മൃത്യോർമൃത്യുമിത്യാഹ മൃത്യോർവാ അയം മൃത്യുരമൃതത്വം പ്രജാനാമന്നാദാനാം .

നമാമീത്യാഹ യഥാ യജുരേവൈതത് . അഹമിത്യാഹ യഥാ യജുരേവൈതത് .. 2..

അഥ ഭഗവാംസ്തമബ്രവീത്പ്രജാപതേ പ്രീതോഽഹം കിം തവേപ്സിതം

തദാശംസേതി . സ ഹോവാച ഭഗവന്നവ്യക്താദുത്പന്നോഽസ്മി

വ്യക്തം മമ കൃത്യമിതി പുരാശ്രാവി . തത്രാവ്യക്തം ഭവാനിത്യജ്ഞായി

വ്യക്തം മേ കഥയേതി . വ്യക്തം വൈ വിശ്വം ചരാചരാത്മകം .

യദ്വ്യജ്യതേ തദ്വ്യക്തസ്യ വ്യക്തത്വമിതി . സ ഹോവാച ന ശക്നോമി

ജഗത്സ്രഷ്ടുമുപായം മേ കഥയേതി . തമുവാച പുരുഷഃ പ്രജാപതേ

ശൃണു സൃഷ്ടേരുപായം പരമം യം വിദിത്വാ സർവം ജ്ഞാസ്യസി .

സർവത്ര ശക്ഷ്യസി സർവം കരിഷ്യസി . മയ്യഗ്നൗ സ്വാത്മാനം

ഹവിർധ്യായേത്തയൈവാനുഷ്ടുഭർചാ . ധ്യാനയജ്ഞോഽയമേവ .

ഏതദ്വൈ മഹോപനിഷദ്ദേവാനാം ഗുഹ്യം . ന ഹ വാ ഏതസ്യ സാമ്നാ

നർചാ ന യജുഷാർഥോ നു വിദ്യതേ . യ ഇമാ വേദ സ സർവാൻകാമാനവാപ്യ

സർവാംല്ലോകാഞ്ജിത്വാ മാമേവാഭ്യുപൈതി ന സ പുനരാവർതതേ യ ഏവം വേദേതി .. 3..

പ്രജാപതിസ്തം യജ്ഞായം വസീയാംസമാത്മാനം മന്യമാനോ

മനോയജ്ഞേനേജേ . സപ്രണവയാ തയൈവർചാ ഹവിർധ്യാത്വാത്മാന\-

മാത്മന്യഗ്നൗ ജുഹുയാത് . സർവമജാനാത്സർവത്രാശകത്സർവമകരോത് .

യ ഏവംവിദ്വാനിമം ധ്യാനയജ്ഞമനുതിഷ്ഠേത്സ സർവജ്ഞോഽനന്തശക്തിഃ

സർവകർതാ ഭവതി . സ സർവാംെല്ലോകാഞ്ജിത്വാ ബ്രഹ്മ പരം പ്രാപ്നോതി .. 4..

അഥ പ്രജാപതിർലോകാൻസിസൃക്ഷമാണസ്തസ്യാ ഏവ വിദ്യായാ യാനി

ത്രിംശദക്ഷരാണി തേഭ്യസ്ത്രീംെല്ലോകാൻ . അഥ ദ്വേ ദ്വേ അക്ഷരേ

താഭ്യാമുഭയതോ ദധാര . തസ്യാ ഏവർചോ ദ്വാത്രിംശദ്ഭിരക്ഷരൈ\-

സ്താന്ദേവാന്നിർമമേ . സർവൈരേവ സ ഇന്ദ്രോഽഭവത് . തസ്മാദിന്ദ്രോ

ദേവാനാമധികോഽഭവത് . യ ഏവം വേദ സമാനാനാമധികോ ഭവേത് .

തസ്യാ ഏകാദശഭിഃ പാദൈരേകാദശ രുദ്രാന്നിർമമേ . തസ്യാ

ഏകാദശഭിരേകാദശാദിത്യാന്നിർമമേ . സർവൈരേവ സ വിഷ്ണുരഭവത് .

തസ്മാദ്വിഷ്ണുരാദിത്യാനാമധികോഽഭവത് . യ ഏവം വേദ സമാനാനാമധികോ

ഭവേത് . സ ചതുർഭിശ്ചതുർഭിരക്ഷരൈരഷ്ടൗ വസൂനജനയത് .

സ തസ്യാ ആദ്യൈർദ്വാദശഭിരക്ഷരൈർബ്രാഹ്മണമജനയത് .

ദശഭിർദശഭിർവിട്ക്ഷത്രേ . തസ്മാദ്ബ്രാഹ്മണോ മുഖ്യോ ഭവതി .

ഏവം തന്മുഖ്യോ ഭവതി യ ഏവം വേദ .

തൂഷ്ണീം ശൂദ്രമജനയത്തസ്മാച്ഛൂദ്രോ നിർവിദ്യോഽഭവത് .

ന വേദം ഇവാ ന നക്തമാസീദവ്യാവൃതം .

സ പ്രജാപതിരാനുഷ്ടുഭാഭ്യാമർധർചാഭ്യാമഹോരാത്രാവകൽപയത് .

തതോ വ്യൈച്ഛത് വ്യേവാസ്മാ ഉച്ഛതി . അഥോ തമ ഏവാപഹതേ .

ഋഗ്വേദമസ്യാ ആദ്യാത്പാദാദകൽപയത് . യജുർദ്വിതീയാത് .

സാമ തൃതീയാത് . അഥർവാംഗിരസശ്ചതുർഥാത് യദഷ്ടാക്ഷരപദാ

തേന ഗായത്രീ . യദേകാദശപദാ തേന ത്രിഷ്ടുപ് .

യച്ചതുഷ്പദാ തേന ജഗതീ യദ്ദ്വാത്രിംശദക്ഷരാ തേനാനുഷ്ടുപ് .

സാ വാ ഏഷാ സർവാണി ഛന്ദാംസി . യ ഇമാം സർവാണി ഛന്ദാംസി വേദ .

സർവം ജഗദാനുഷ്ടുഭ ഏവോത്പന്നമനുഷ്ടുപ്പ്രതിഷ്ഠിതം

പ്രതിതിഷ്ഠതി യശ്ചൈവം വേദ .. 5..

അഥ യദാ പ്രജാഃ സൃഷ്ടാ ന ജായന്തേ പ്രജാപതിഃ കഥം

ന്വിമാഃ പ്രജാഃ സൃജേയമിതി ചിന്തയന്നുഗ്രമിതീമാമൃചം

ഗാതുമുപാക്രാമത് . തതഃ പ്രഥമപാദാദുഗ്രരൂപോ ദേവഃ

പ്രാദുരഭൂത് ഏകഃ ശ്യാമഃ പുരതോ രക്തഃ പിനാകീ സ്ത്രീപുംസരൂപസ്തം

വിഭജ്യ സ്ത്രീഷു തസ്യ സ്ത്രീരൂപം പുംസി ച പുംരൂപം വ്യധാത് .

ഉഭാഭ്യാനംശാഭ്യാം സർവമാദിഷ്ടഃ . തതഃ പ്രജാഃ പ്രജായന്തേ .

യ ഏവം വേദ പ്രജാപതേഃ സോഽപി ത്ര്യംബക ഇമാമൃചമുദ്ഗായ\-

ന്നുദ്ഗ്രഥിതജടാകലാപഃ പ്രത്യഗ്ജ്യോതിഷ്യാത്മന്യേവ രന്താരമിതി .

ഇന്ദ്രോ വൈ കില ദേവാനാമനുജാവര ആസീത് . തം പ്രജാപതിരബ്രവീദ്ഗച്ഛ

ദേവാനാമധിപതിർഭവേതി . സോഽഗച്ഛത് . തം ദേവാ ഊചുരനുജാവരോഽസി

ത്വമസ്മാകം കുതസ്ത്വാധിപത്യമിതി . സ പ്രജാപതിമഭ്യേത്യോവാചൈവം

ദേവാ ഊചുരനുജാവരസ്യ കുതസ്തവാധിപത്യമിതി . തം പ്രജാപതിരിന്ദ്രം

ത്രികലശൈരമൃതപൂർണൈരാനുഷ്ടുഭാഭിമന്ത്രിതൈരഭിഷിച്യ തം

സുദർശനേന ദക്ഷിണതോ രരക്ഷ പാഞ്ചജന്യേന വാമതോ ദ്വയേനൈവ

സുരക്ഷിതോഽഭവത് . രൗക്മേ ഫലകേ സൂര്യവർചസി മന്ത്രമാനുഷ്ടുഭം

വിന്യസ്യ തദസ്യ കണ്ഠേ പ്രത്യമുഞ്ചത് . തതഃ സുദുർനിരീക്ഷോഽഭവത് .

തസ്മൈ വിദ്യാമാനുഷ്ടുഭീം പ്രാദാത് . തതോ ദേവാസ്തമാധിപത്യായാനുമേനിരേ .

സ സ്വരാഡഭൂത് . യ ഏവം വേദ സ്വരാഡ് ഭവേത് . സോഽമന്യത പൃഥിവീമപി

കഥമപാം ജയേയമിതി . സ പ്രജാപതിമുപാധാവത് .

തസ്മാത്പ്രജാപതിഃ കമഠാകാരമിന്ദ്രനാഗഭുജഗേന്ദ്രാധാരം

ഭദ്രാസനം പ്രാദാത് . സ പൃഥിവീമഭ്യജയത് . തതഃ സ

ഉഭയോർലോകയോരധിപതിരഭൂത് . യ ഏവം വേദോഭയോർലോകയോരധിപതിർഭവതി .

സ പൃഥിവീം ജയതി യോ വാ അപ്രതിഷ്ഠിതം ശിഥിലം ഭ്രാതൃവേഭ്യോ

വസീയാൻഭവതി യശ്ചൈവം വേദ യശ്ചൈവം വേദ .. 6..

യ ഇമാം വിദ്യാമധീതേ സ സർവാന്വേദാനധീതേ . സ സർവൈഃ ക്രതുഭിര്യജതേ .

സ സർവതീർഥേഷു സ്നാതി . സ മഹാപാതകോപപാതകൈഃ പ്രമുച്യതേ . സ

ബ്രഹ്മവർചസം മഹദാപ്നുയാത് . ആബ്രഹ്മണഃ പൂർവാനാകൽപാഽശ്ചോത്തരാംശ്ച

വംശാൻപുനീതേ . നൈനമപസ്മാരാദയോ രോഗാ ആദിധേയുഃ . സയക്ഷാഃ

സപ്രേതപിശാചാ അപ്യേനം സ്പൃഷ്ട്വാ ദൃഷ്ട്വാ ശ്രുത്വാ വാ

പാപിനഃ പുണ്യാംെല്ലോകാനവാപ്നുയുഃ . ചിന്തിതമാത്രാദസ്യ സർവേഽർഥാഃ

സിദ്ധ്യേയുഃ . പിതരമിവൈനം സർവേ മന്യന്തേ . രാജാനശ്ചാസ്യാദേശകാരിണോ

ഭവന്തി . ന ചാചാര്യവ്യതിരിക്തം ശ്രേയാംസം ദൃഷ്ട്വാ നമസ്കുര്യാത് .

ന ചാസ്മാദുപാവരോഹേത് . ജീവന്മുക്തശ്ച ഭവതി . ദേഹാന്തേ തമസഃ പരം

ധാമ പ്രാപ്നുയാത് . യത്ര വിരാൺ നൃസിംഹോഽവഭാസതേ തത്ര ഖലൂപാസതേ .

തത്സ്വരൂപധ്യാനപരാ മുനയ ആകൽപാന്തേ തസ്മിന്നേവാത്മനി ലീയന്തേ . ന ച

പുനരാവർതന്തേ . ന ചേമാം വിദ്യാമശ്രദ്ദധാനായ ബ്രൂയാന്നാസൂയാവതേ

നാനൂചാനായ നാവിഷ്ണുഭക്തായ നാനൃതിനേ നാതപസേ നാദാന്തായ

നാശാന്തായ നാദീക്ഷിതായ നാധർമശീലായ ന ഹിംസകായ നാബ്രഹ്മചാരിണ

ഇത്യേഷോപനിഷത് ..

ഓം ആപ്യായന്തു മമാംഗാനി വാക്പ്രാണശ്ചക്ഷുഃ ശ്രോത്രമഥോ

ബലമിന്ദ്രിയാണി ച .. സർവാണി സർവം ബ്രഹ്മോപനിഷദം മാഹം

ബ്രഹ്മ നിരാകുര്യാം മാ മാ ബ്രഹ്മ നിരാകരോദനിരാകരണ\-

മസ്ത്വനിരാകരണം മേസ്തു തദാത്മനി നിരതേ യ ഉപനിഷത്സു ധർമാസ്തേ

മയി സന്തു തേ മയി സന്തു .. ഓം ശാന്തിഃ ശാന്തിഃ ശാന്തിഃ .. ഹരിഃ ഓം തത്സത് ..

ഇത്യവ്യക്തോപനിഷത്സമാപ്താ ..