Francesco Defina

Tarramotu

Stefanaconi, settembre 2005

Iera di notti, l’ottu di settembri

quandu, cent’anni arredi, cumparìu:

‘nta n’àttimu barracchi, genti e tendi

la terra  comu lupu affamatu, s’agghiuttìu.

Catti lu focu, vinni lu scuncassu

pé chiji aggenti nostri, paisani

passaru, amari, di nu malu passu

parenti, amici, vicini e foritani.

Nguscémiti, doluri, chianti e morti:

no ‘nc’era casa duvi s’arridìa!!!

tutti li strati ieranu com’orti,

bresti all’impedi, una no’ nd’avìa!!!

Moriru vecchi, e giuvaneji duci,

comu li muschi!!. Tutti ‘ncastejiati,

misi subba li carri “cruci e nuci”

e nta li fossi poi furu atterrati!!!

Passau lu tempu e di chiju jornu

pocu ricordu nc’è nta lu penzeru!!

però li “vecchi” cùntanu e a cuntornu

chijiu ch’è fazu u fannu m’esti veru!!!

Mò, simu ccà, nui tutti cumbenuti

figghi di chija genti sbenturata

m’arricordàmu tutti li caduti

pòvara genti chi morìu, mpittàta!!!

Volissi Dio, magnànimu e potenti

mu l’avi ‘nglòria tutti a la scordata

e a nui chi simu ccà, serii e scuntenti

pemmu ndi scanza di ‘ssà tempestata!!!

U vrasceri

Quandu d’imbernu la terra s’inchjia

di nivi, jelu e friddu tagghjenti,

nta li barracchi la genti stavia

a lu vrasceri cu focu lucenti.

Nc’era la rota di lignu e d’intornu

tutta a famigghjia si ricogghjia,

li cotrareji cotti di sonnu

mentri lu patri discurzi facia.

Lu ventu friddu di fora friscava,

cadia la cucuja di li jhangazzi,

nta lu vrasceri lu focu pigghjava,

juntavanu sisiji e cinnarazzi.

Di tantu ntantu la mamma, lu focu,

cu la majetta puntuta ttizzava,

po’ la paletta pigghjava nu pocu

e cu la cinnari ntornu ccuppava.

La nanna vecchja cu fusu filava

e li figghjioli a bada tenia;

storiji di maghi e fajetti cuntava

e cu lu caddu lu sonnu venia.

“Lu principinu partiu pe la guerra

e nta la reggia li figghj dassau,

vaci lu sdragu chi bbeni da’ terra

e chiji figghji nci li pigghjiau.

Torna lu principi tuttu arraggiatu,

senti lu chjantu da contessina,

cu lancia e spata lu sdragu è mmazzatu:

su libbari i figghji di la riggina”.

“Domani s’u friddu ndi lu cunzenti

tutti li viti bisogna putari,

all’atra simana chi no nc’è nenti

pigghjamu lu porcu e l’avimu i scannari.”

Subba a buffetta u pirettu du vinu

cu ficu sicchi, nuci e castagni,

nc’era u biccheri pe lu zi Ninu,

ch’era vecchjanu ma senza malanni.

Eranu tempi no tantu luntani,

chi scumpariru pe lu progressu;

eranu tempi chi li vecchjani

cuntanu sempi cu tonu summessu.

Mo’, nta li casi di ferru e cimentu,

nci su li stufi, nc’è l’isolanti,

e chiju mundu friddusu e cuntentu,

paru pe’ tutti, è mortu all’istanti.

Tanti no sannu chi j’è lu vrasceri,

e chija rota di lignu anneruta

chi ricogghjia nu tempu i penzeri

di na famigghjia ricota e dovuta.

Nta certi casi la rota è mpenduta

e lu vresceri ca mànica rutta

ciangi lu tempu da mala cogghjuta,

quandu lu caddu mandava di sutta.

Mo’, nta li siri d’acqua e di ventu,

cu’ scappa o cinima, cu’ pe’ la pizza,

e lu vrasceri ciangi scuntentu

lu cori chjnu di randi tristizza.

Fujunu fora cu machini bboni,

e la famigghjia non è ricogghjiuta.

La mamma aspetta cu lampi e cu troni

nta chjia casa sempi cchjiù muta.

A CHIAMATA

“Veni – dissi la vecchia – ca no pozzu

cchiù mu la tiru chista vita mia,

sugnu tant’anni, oh morti, chi nu morzu

non d’eppi mai rigettu, sorti ria!”

Così dicendu, fici e s’assettau

subba nu vancu pemmu trova paci.

D’un trattu, jà davanti cumpariu

na fimmana cu l’arpa e cu la faci:

“Tu mi chiamasti, jeu su ccà pè ttia.

Forza, camina, no perdimu tempu!

Cogghi li forzi, veni arredi a mmia

datu chi vinni, mò non hai cchiù scampu…”

La vecchia iza a testa e, stranamenti,

nci passanu nguscemiti e doluri:

“E’ giustu, ti chiamai, ma veramenti

lu fici mu ti levi a … Sarvaturi.”

CIARAMEJA

Madonna, ch’esti duci chiju sonu

chi ti rivigghia quandu fora chiovi,

chi veni nta lu friddu e di luntanu

ti faci nta lu cori u ti cummovi.

Ogn’annu di sti tempi nta la ruga

i senti u sonu di na ciarameja.

Ogn’annu quandu arriva chista ura,

a testa, u cori, tuttu si ribbeja.

Lu son unta lu scru si spampina

si mbutta nta li casi di la ggenti

ntinna pe’ novi notti la novina

Duna cumportu a cu’ non’avi nenti.

“Levativi, veniti arredi a mmia!”

-pari ca dici chija ciarameja –

“Veniti, osannamu a lu Missia

facitila sta cosa tantu beja.

Dassati finarmenti di nu latu

li cosi di stu mundu ch’è fetenti.

Fermativi, tirati vui lu hjiatu

pregati cu lu cori stu Nnocenti…

A chistu Bambineju nta la pagghia

datinci onuri, dati servitù.

Scanzati l’odiu, lu feli, l’arraggia.

Chisti su cosi chi non vannu cchiù.”

A MAMMA

“Mamma”. Stu nomi duci

è u primu chi s’impara

quandu unu nesci nta stu mundu

assemi a lu mangiari e

prima assai di l’atri cosi…

T’accumpagna fin’a chi campi,

e puru quandu mori

ca pemmu dici mamma

è duci assai.

Quandu ti senti mali

o hai bisognu, quandu scuntentu sì

di la tua vita ca n’cuna cosa

ti jiu storta, nc’è sulu na perzuna

chi tu chiami e puru mu si vecchiu

di cent’anni… “Mamma, mamma mia!”

Ca tuttu poi scordari nta sta vita:

fatti, doluri, cuntentizzi, affanni

ma chistu nomi no tu scordi mai

ca i mammi sugnu mammi.