Móttökuáætlun 

Móttaka erlendra nemenda

Þegar óskað er eftir skólavist fyrir barn af erlendum uppruna í Vatnsendaskóla er viðkomandi boðaður í viðtal til aðstoðar skólastjóra eða deildarstjóra. Fyrsti fundur fer fram með foreldrum, nemanda og túlki. Skólastjórnendur tilkynna árgangateymi nemandans um komu hans, hvaðan hann er og hvenær móttökuviðtalið fer fram. Umsjónarkennara undirbúa árganginn fyrir komu nýs nemanda. Aðstoðar skólastjóri eða deildarstjóri tilkynnir jafnfram öðrum kennurum um komu nemandans í skólann og í hvaða árgang hann fer. Einnig er farið yfir stöðu nemandans út frá menningarlegum forsendum hans.  Tekið er saman fyrir viðtal innritunarblað , skólareglur, stundaskrá hópsins, upplýsingar um Frístund - Stjörnuheima fyrir 1. – 4.bekk, upplýsingar um félagsstarf skólans, upplýsingar um mötuneyti og nestismál ásamt upplýsingum um hvernig innritun í mötuneyti og Frístund fer fram.

Móttökuviðtalið sitja foreldrar/forráðmenn, nemandi, umsjónarkennari, túlkur og aðstoðar skólastjóri eða deildarstjóri . Ávallt skal kalla til túlk fyrir móttökuviðtal, einnig þótt annað foreldra sé íslenskt. Hér er mikilvægt að skyldmenni eða vinir sitji ekki viðtalið.  Í viðtalinu fylla foreldrar út innritunarblaðið með aðstoð túlks og önnur gögn varðandi skólavistina afhent.  Óskað er eftir bakgrunnsupplýsingum um nemandann ef mögulegt er

Gerð er einstaklingsáætlun ef þarf, í samvinnu við sérkennara og umsjónarkennara nemandans þar sem kemur fram hvenær nemandinn er með bekknum og hvenær hann er í kennslu í íslensku sem annað mál.  Ákveðin er fundartími eftir fjórar/fimm vikur og er þá staða nemandans skoðuð með tilliti til líðan og hvernig áframhaldið er hugsað hvað varðar kennslutilhögun nemandans.

Móttaka nýrra nemenda

Við móttöku nýrra nemenda er lögð áhersla á hlýjar móttökur og skýrar upplýsingar. Nemandinn og foreldrar eru boðuð í heimsókn í skólann áður en nemandi hefur nám. Deildarstjóri og umsjónarkennarar sjá um að raða honum í námshóp. Þegar nýir nemendur hefja nám í Vatnsendaskóla að hausti þá boða kennarar þá og foreldra / forráðamenn þeirra til sín sérstaklega áður en bekkurinn kemur í skólann. Kennarinn gefur þeim upplýsingar um skólann, sýnir þeim skólahúsnæðið og spjallar við þá. Við komu nýs nemanda í árgang er sérstaklega stuðlað að því að hann tengist þeim sem fyrir eru og er þá m.a. einum eða fleiri nemendum falið það hlutverk að fylgja honum um skólann fyrstu dagana og bjóða honum að vera með í útivist. Ef þurfa þykir hittir  námsráðgjafi einnig nýja nemendur og fylgist með hvernig þeim vegnar á nýjum stað. Þeim nemendum sem hefja nám í 1. bekk er boðið að koma í vorskólann vorið áður. Að hausti er foreldrum 1. bekkjar og 8. bekkjar boðið á kynningarfund í skólanum.