Dwy brif neges y gerdd yw cofio am y rhai a fu farw yn enw rhyfel a sicrhau na fyddwn ni’n dechrau rhyfel arall. Ein perswadio i gadw heddwch yw bwriad Gwenallt. Mae pawb ohonom, drwy hanes, yn euog am ryfeloedd a marwolaethau, a’r unig berson dieuog, dibechod fu ar y ddaear erioed yw Iesu Grist. Yn y gerdd mae Gwenallt yn defnyddio'r coed fel delwedd i gysylltu’r gwahanol bechodau rydym ni yn euog ohonynt.

Roedd Gwenallt yn credu'n gryf nad oedd gobaith i’r byd hwn oni bai bod dynoliaeth yn derbyn Crist yn Waredwr. Mae nifer o’i gerddi yn trin a thrafod yr argyhoeddiad hwnnw.

Ni ddylem fod yn rhy barod i feirniadu eraill cyn ystyried ein gweithredoedd ni ein hunain yw un o negeseuon eraill y gerdd. I’r bardd, rhyfel yw rhyfel ym mhob oes ac nid yw dynoliaeth yn dysgu o un rhyfel i’r llall.