‘Oes 'na enw ar y coed ma, Dad?

- I mi gael dweud y stori fawr wrth Taid.’

‘Coed Llugwy ydi’r enw arnynt, was,

Ond Walkers’ Wood sydd yn y Betws Guide.’

‘Pam fod y dail ar hyd y ddaear, Dad?

Pam fod eu lliw run fath â crisps yn awr?’

‘Mae popty’r hydref wedi’u rhostio, was,

A’u taenu’n wledd ar hyd y llawr.’

‘Ble ddaeth hon, y ddeilen felen, Dad,

A dannedd mân ar hyd ei hymyl hi?’

‘Mae’i chwiorydd ar y gollen acw, was,

Sy’n rhannu ei gofidiau gyda’r lli.’

‘A hon, run lliw â cheiniog newydd, Dad?’

‘Mae twll ym mhwrs y ffawydd, beryg iawn.’

‘A’r rhain, fel darnau o jig-sô 'ta, Dad?’

‘Y dderwen acw ydi’r llun yn llawn.’

‘Oddi ar pa goeden y daeth nacw, Dad?

Mae’n wyrdd a glas, mae’n sgleinio yn y mwd.’

‘Paced o Walkers’ Crisps ‘di hwnna, was,

Ar ôl y rhai fu’n crwydro Walkers’ Wood.’